高鐵車站，「年長」的窗仔口顛倒較慢（台文）

３年前，提著「敬老卡」了後，自然去「年長」的窗仔口買票。一、二擺順利買著。

有一擺，「年長」的窗仔口排誠濟人，有十幾个人，排我頭前的小姐徛一分鐘，就行去一般的窗仔口，我佇咧想欲綴伊去無？有一个服務人員行過來講：「彼爿嘛會使買。」我趕緊行過去。

昨日，我佇台北站，當咧窗仔口問話的阿婆，誠濟歲，慢慢仔講，一項一項問，我就隨行去一般的窗仔口排隊，毋免等，誠緊就買著票。

下晡，佇新竹站，我看「年長」的窗仔口有一个人佇買票，無人佇排隊，我就佇「年長」的這邊等，想袂到，彼人敢若佇買某一工的票，有ＸＸ票、愛心票，猶閣買４張，佮來回票，舞規半晡，我直直看隔壁彼爿一般人的人數，排七、八个，十外个，開３个窗仔口，無的確比「年長」這爿較緊。

按呢我知啊！後擺愛先看一般人彼爿排隊的人數，閣有開幾个窗仔口，除非年長的這爿無人佇買，抑是彼爿排誠長，就儘量去彼爿買，至少有３个窗仔口，袂予一個人窒著。（10/14修正）

（2023.10.13.寫）

註:

和華文的意思不一樣的字：

行—走

走—跑

緊—快

其他的查這裏

Lisanto 李奕良 on Unsplash