佮宜蘭縣礁溪有關係的代誌—２
2025.1.24.
＜帝君廟＞
（礁溪，咧欲60年前）
彼當陣仔派出所佇帝君廟的對面，宿舍佇後壁，阮兜蹛佇宿舍內底。帝君廟開始改建。
有師傅佇誠大支的石柱頂懸雕刻龍柱，𪜶（in）攏是外地來的，蹛例遮，敢若過年才轉去厝內。古早的人做工課、賺錢誠無簡單，若去外地，交通無方便，就袂使佮厝內面的人蹛做伙。一支龍柱刻好，應該愛幾若年。
無偌久，阮搬去龍潭村，毋知影佗一年完成？這馬廟閣較大，應該經過毋但一擺的增建。
囡仔的時細漢，聽大人講是「帝君廟」，毋捌攑頭看牌仔頂懸是寫啥物名？落尾才知曉號做「協天廟」。
— — —
2025.1.30.
＜二九暝礁溪的街仔路＞
我二九暝彼工的暗時仔搭客運轉來礁溪，看著彼間上大間的甕窯雞餐廳，人客坐甲滇滇滇；彼間誠大間的火鍋店，嘛坐有一半的人。
街仔路的車佮人比台北市內較濟，遐的人看起來是來𨑨迌的，湯圍溝有咧排擔仔，我行入去看覓，看有物仔通食無？攏無想欲食的，就行轉去厝。
— — —
2025.2.2.
＜𣁳冰淇淋＞
昨昏去一間新開的火鍋店吃火鍋。吃煞了後，去提冰淇淋（ping-kî-lîm ），前頭有一个查埔人提２個大碗，先共碗囥佇冰櫃邊仔的桌頂，打開門，一个碗提起來，開始挖黃色的冰淇淋。
挖好，換一个碗，挖另外一桶咖啡色的。頭一𣁳（khat），拄拄仔挖的黃色留佇咖啡色冰淇淋的頂懸，伊無共佊丸黃色的挖起來，隨換清氣的所在挖咖啡色的。這个人是按怎？無顧後面的人。
我挖冰淇淋的時，若欲換口味，會先共𣁳仔（khat-á）佇櫃仔邊，予人囥𣁳仔的觳仔內底的水底洗洗一下，才袂共無仝款的口味濫濫著，後面的人欲按怎食？若無做這个「洗」𣁳仔的動作，嘛愛共黏佇第２桶，無仝款口味的冰𣁳起來家己食。若共無相仝的冰留佇遐，無插伊，是無道德的代誌。
這馬我貧惰講矣！以早，咧提自助餐菜的時，有人直直講話，我會講：「請你們不要講話，口水都噴進菜裏面去了。」
少少的店，壁頂會貼：「夾菜時請不要講話」
註:
𣁳仔（khat-á）—杓子、水瓢
𣁳（khat-）—杓子、水瓢。 舀。
觳（khok）—盛裝米或液體的小量杯，或水瓢。 小盒子。 計算量杯容積的單位。
查辭典
