我予查某孫聽囡仔歌，我家己嘛咧學唱，逐條歌攏會曉唱。
有一條歌的歌名是：＜指甲花＞，歌詞是：「番鴨，番鴨，
挽指甲花擦指甲，擦跤盤，擦跤縫，
規隻跤，紅紅紅。」
以番鴨規隻跤紅紅紅，來佮指甲花做鬥陣講，唱起來誠趣味，毋過，我感覺怪怪。
是華語講的「話語權」的意思，番鴨袂曉講話，出在人講，笑伊規隻跤紅紅是因為伊愛媠，用指甲花擦的，本來欲擦指甲，袂曉節力，規隻跤攏擦甲紅紅紅。
歌詞佮講古、講笑詼話的內底，誠濟這種情形，毋但動物、植物，猶有對無仝國、無仝族群的人，生無仝款的人，笑in佮咱無仝款的所在，做無仝款的代誌。這馬佇台灣有真濟無仝族群的人，有想到這點的人，就愛注意家己講的話，是毋是有得失著別人。
笑動物，in袂曉應；若是笑著某乜人，抑是一寡仔族群的人，有可能會出代誌。較濟拄著的是，批評、議論查某人的外表、媠䆀，甚至有性的意思，若按呢，會予人罵，有的人毋知影伊是按怎予人罵？想講是講耍笑爾爾，伊認為的笑詼，予人礙虐、無爽快、心肝頭艱苦，一點仔嘛無好笑。
