以早，我對「死亡」的想法是，人的身軀袂堪得，纘袂牢，生命停止，死去。
這幾若年，看著一个講法，有咧修鍊的人嘛咧講的是，是靈魂決定欲去矣！而且是靈魂先離開，浮佇空中，看著倒佇眠床頂的身軀。靈魂離開了後，心臟佮喘氣才停止。
修佛較有功力的師父，知影啥物時陣欲離開，事先共熟似的人告別。
猶閣有講靈魂不滅，有前世、來世的講法，死只是身軀死去，靈魂去到較快樂的所在，若是有彼个需要佮願望，會使閣投生，閣活一擺，完成伊帶來的任務。我感覺這个講法，予拄著死亡的人，伊的心內的煩惱佮驚惶減少一點仔，身邊的人較袂艱苦、毋甘。
我家己對死亡是無咧驚，較驚的是破病袂振動，佮彼款痛，毋知欲拖磨偌久？
上好是我家己知影當時欲走，會使共代誌交代好勢。
我看活到真濟歲，閣身體健康的人走甲緊。阮翁有一个同學，伊的老母生十幾个後生，伊是上屘的。老母活到九十幾歲，猶蹛佇庄跤，有一暗，坐佇搖椅看電視，就轉去。王永慶彼工拄拄飛到美國，人無爽快，一、二工就走矣！所以保持我家己的身體健康是上重要的代誌，其他的就毋是我會當決定的。
