賊王, 打劫王, 殺人王

當年葉繼歡攞住枝AK47去打劫金鋪，轟動一時，大家都稱他為賊王。

我係度諗，如果葉繼歡生係今時今日嘅香港，佢還會踏上賊王之路嗎？肯定不會。

佢會放棄成為少女漫畫家嘅夢想，轉行做銀行基金佬。然後再和政府勾結打劫全香港人嘅財產，美其名「保障退休的強積金」。打劫金鋪也就是打劫一間金鋪而已，仲要係搵命搏。依家基金佬係合法每個月老笠全香港打工仔份糧呀！你話邊個勁啲？

如果佢要成為變態殺人魔，今時今日仲攞住個電鋸衝嚟衝去？過時啦！佢只要放棄成為少女漫畫家嘅夢想，俾心機讀書，然後投考教育局政府工。當葉繼歡成為咗教育局局長，佢就可以推出什麼「TSA」、「BCA」等等嘅殺人機器，繼而可以不斷殘殺學生，將佢哋推向絕望嘅深淵。最屈機嘅係社會上冇咩人會控訴局長，大家都會怪責被害嘅學生點解唔堅強啲，點解抵受唔住啲精神傷害，最後加一句「我哋個代仲辛苦啦～」。

話說頭來，如果香港社會重視藝術創作，葉繼歡可能就會放棄做賊，而成為一個少女漫畫家了。