轉涼喇！越凍就越唔想起身，越唔想起身份早餐就越無機會食。好似講到好爭分奪秒咁，其實係架，只要你排隊排超過3分鐘，個日無就會遲到。你可能返工都唔想遇到咁盡，咁有時嘅嘢，走咗班車，走咗架Lift，甚至開大開耐咗，加加埋埋分分鐘都夠你坐定定食埋個早餐先返工。時間同金錢嘅概念應該係一樣，慳得就慳喇。
講返個早餐，今日終於有心機啲去排隊買返份餐蛋治（呢間嘢真係好旺），咁排隊個陣就開始諗下飲咩⋯⋯記得上兩次係飲奶茶同鴛鴦，我唔係特別好港式咖啡，但鴛鴦Ok。
講下題外話，鴛鴦呢杯嘢真係好體現到本土嘅青春文化。以前去7仔任飲，最鍾意就係無個樣整個樣，當正自己係調酒師咁，六七款嘢飲逐樣加上去，之後癲到熱飲都玩埋，猜輸就乾咗杯有汽華田佢、芥末好立克，真係飲你唔死都痾你三日，鴛鴦就令我諗起呢啲咁嘅輕狂歲月（唔係杯嘢嘅味道係咁青狂，只係溝嘢飲嘅做法令我有回憶即）
當面對住茶餐廳四寶，咖啡、奶茶、檸茶、檸水，個味道好似禽日先飲完，你真係好想晨早溜溜有返啲衝擊，有啲新嘅味道咁，但係就杯杯都叫唔落手！呢個時前面位靚女打救咗我！（係真係平民化靚女，可遇亦可溝個種），佢叫咗杯「茶走」，我聽到都已經覺得口渴喇！咁一嚟同個靚女把聲好聽有關，二嚟係我將「茶走」呢個元素放咗係自己嘅故事作品到。
有一個貪錢，但又無咩見識個社會嘅女仔，好想自己發明自己一種茶餐廳嘅飲品，之後名成利就。不過呢個唔係個故事嘅主線，只係造就佢嘅個性即，因為個故事主要係講音樂夢想，即係《Slow Music》嘅阿宜。
又講返呢份早餐，嗰時我就想叫杯茶走，不過又唔知點解，好唔想同個靚叫同一杯嘢，於是到我走埋去之後，就叫咗杯鴦走。咁作為一個寫作人，呢啲咁單方面嘅感情處理，絕對可以FF到一個愛情故事出嚟，不過今次我只係想講下我同呢杯鴦走嘅個經歷，個靚女就隨風喇……(買外賣早餐大家得個幾十秒一齊咁啱企係到，我就唔信有咩愛情故事發生)。
我攞住杯鴦走一直向地鐵站嘅方向行，一路行就一路玩手機，成個過程都無理到呢杯嘢飲，都可以係話大家雖然走埋同一條路，卻同床異夢，佢都唔知點解我要買佢返嚟，我亦好清楚，宜家未係飲佢嘅時候，我新DOWNLOAD嘅「轉校生」就嚟死喇，啱啱先整到水機同爐頭，資源已經少到只可以去得一次探索，返到嚟咩都無就要轉生架喇！係呢啲咁全亡之秋嘅情況下，我更係擔心個GAME多個杯嘢飲。就係入咗地鐵之後，轉捩點出現，入面嘅人想出嚟，出面嘅人想入去，就係呢個十月圍城嘅場面下，我要係車廂閂門個十秒之前跟住先鋒衝到出去。
就係兩股勢力衝擊嘅時候……我杯鴦走同餐蛋治差啲成份飛咗出嚟，之後就唔洗諗全車箱嘅人一定無人走得甩，特別係死衝要上車嘅人。好彩，個袋係扎實咗，佢只係水平線咁俾我強行係兩件西裝之間條隙到拉咗一杯熱飲同件三文治出嚟，其實我會擔心個兩個西裝友件衫囉。話晒都係「咖啡仆奶茶」，佢哋瀉出嚟嘅漬，一啲都唔簡單架，仲要係晨早溜溜，著得西裝返工即係要有形象咁去見人喇，咁我都唔知你點算喇。
不過係個時我都突然意識到一樣嘢，我買咗個杯鴦走，其實佢真係可能會突然走咗去人哋件衫到，而唔會俾我飲落口。我想同杯鴦可以平安返到公司，安安定定咁飲佢落肚，原來一啲都唔容易，好多時就係我太大安指意，路就一定係咁行，所有嘢都會係我預期之內發生，人生就應該係可以掌握之內，最緊要係，唔好定得條底線太高，樣樣嘢都會順風順水。
但實情係，原來呢個世界真係可以無底線，你越係退而其次，唔好有期望，你都係會遇到挑戰係底線嘅事，最傷嘅係，到時你想拉返高條線，你就要俾其他人辛苦多一倍先做到想要嘅結果。即係個種，你明知前面係死路，如果你唔行，最後都係餓死係到；但如果你去行，分分鐘可以會開到另一個出口都未定。
唔好意思，玄咗又遠咗，我都係講返杯鴦走嘅結果做收尾。
終於我可以坐定定去享受呢杯鴦走，之前飲過奶茶同鴛鴦，係有品質保証。當我折開個膠袋，諗住去飲嘅時候，發現見到個蓋爆爆地、又裂裂地，心諗頭先個兩個西裝友真係好險，首先佢哋都唔想迫，如果再倒瀉埋，佢哋真係超級黑仔，可能都係我簡接造成嘅……不過我都係想飲嘢即……宜家見到杯嘢安然無恙，都好感恩。於是我就用力一飲……
苦嘅！頂……佢唔記得落鍊奶呀！
完
作者：多媒體廢作人
作品：2016《叛神軍團》、2016《Slow Music》、2016《筆示驅魔傳》、2017《DSE幻想校園》、2017《格子控的執著》、2018《混個半神當就這麼難嗎？》。個人網：https://andy729hui.like.community/
