Ē kì-tit tíng kò gue̍h ê 21 hit-kang, guá khì Sîng-tāi tsham-ka Aulinpikho pe̍h-uē-jīt tui~tui~tui~ê pí-sài, tse sī tsuân-kok tē it kài ê Pe̍h-uē-jī pí-sài.
Tsit ê ua̍h-tōng sī guá ê Tâi-gí lāu-su kóo-lē guá khì tsham-ka--ê, guá phō-tio̍h sió khuá kín-tiunn ê sim-tsîng, tō tsē hué-tshia ka-kī khì ah！
Guá thê-tsá beh puànn tiám tsing kàu hiān-tiûnn, tsē tī guā-kháu ê í-á tī hiah tán sî-kan kàu beh ji̍p-khì pí-sài, tsi̍t-ê sî-tsūn mā-sī koh sió-khuá kiann-kiann. Sî-kan tī beh kàu ê sî , tō ū kang-tsok jîn-guân kóng ē-tàng ji̍p-lâi sing tshue ling-khì, sim-tsîng pàng khin-sang, guá to kín ji̍p-khì tsún-pī, koh hām pinn á ê a-tsí si̍k-sāi hām i kóng-uē, sūn-suah tiâu-tsíng guá ê sim-tsîng hōo khah pîng-tsīng--leh！Kuè bô guā kú, kóng beh khai-sí pí--á.
Guá iáu sī ū tsi̍t-tiám-á kín-tiunn. Tē it kuan khó suah, beh kong-pòo tsîng tsa̍p miâ ê sî , sim-lāi siūnn kóng ing-kai ē tio̍h--lah, kiat-kó guá tsin-tsiànn ū pâi--ji̍p-khì neh！Guá pâi tī tē sì--ê, án-ne tō sī beh koh tshian-piànn tē jī kuan ah ooh！Si̍t-tsāi tsiok tshì-khik--lah！
Tsiúnn kàu-siū sī tsú-khó-kuann, khuànn-tio̍h i guá tsiok kín-tiunn--ê！Guá ē kì-tit tē it tiâu tê-bo̍k tō kòng-tò tshit ê lâng, tshūn 3 ê lâng teh pí niâ , tsai tiûnn ê pîng-sím kóng án-ne sing pí tsîng 3 miâ, pí tsit-ê--á tio̍h tshut--lâi-ah!
Ah guá--leh？Tshūn tshit ê lâng lo̍h-khì pí, guá tō sī kî-tiong tsi̍t-ê, pí kàu guá tsia ê sî-tsūn , khèh-tio̍h tē 6 mâi, hit ê sî-tsūn kî-si̍t guá ū tsi̍t-tiám-á m̄-kánn siong-sìn , kài-sîng teh tsò bāng neh！
Guá ê Tâi-gí lāu-su mā tī hiān-tiûnn, i kóng guá tsiok gâu--ê, koh ka guá lám, guá sim-lāi tsin-tsiànn ū-kàu huann-hí--neh！Hó-ka-tsài guá ū thiann Kim-hua lāu-su ê uē, lâi tsham-ka tse Tâi-gí Bûn-huà li̍k-sú-sìng ê pí-sài.Ǹg-bāng guá ē-tàng uī Tâi-gí kè-sio̍k phà-piànn--lo̍h-khì lah！
漢羅版
會 kì-tit頂個月ê 21彼工，我去成大參加Aulinpikho pe̍h -uē-jīt tui~tui~tui~ê比賽，tse是全國第一屆 ê白話字比賽。
這 ê活動是我ê台語老師鼓勵我去參加--ê，我抱著小可緊張ê心情，tō 坐火車家己去 --ah！
我提早beh半點鐘到現場，tsē tī外口ê 椅仔tī hiah等時間 到 beh 入去比賽，tsi̍t-ê 時陣 mā-sī koh小可驚驚。時間tī beh到ê時，tō有工作人員講會當入來先吹冷氣，心情放輕鬆，我tō緊入去準備，koh hām 邊仔 ê阿姐熟識hām伊講話，sūn-suah調整我ê心情hōo khah平靜--leh！過無guā久，講beh開始比--á.
我iáu是有tsi̍t-tiám-á 緊張。第一關考suah，beh公布前十名ê時，心內想講應該會著 --lah，結果我真正有排 –入 - 去 neh！我排tī第四 --ê, án-ne tō是beh koh 車拚第二關ah ooh！實在足刺激 --lah！
Tsiúnn 教授是主考官，看著伊我足緊張--ê！
我會 kì-tit 第一條題目tō kòng-tò 7 ê人，tshūn 3 ê人teh比niâ，在場 ê評審講án-ne先比前3名，比 tsit-ê--á tio̍h 出 -- 來-ah!
Ah我 --leh？Tshūn 7 ê人 lo̍h-khì比，我tō是其中tsi̍t-ê，比kàu我tsia ê 時陣，khèh-tio̍h 第6名，彼ê 時陣kî-si̍t 我有tsi̍t-tiám-á毋敢相信，kài-sîng teh作夢neh！
我ê台語老師mā tī 現場，伊講我足gâu--ê，koh ka我lám，我心內真正有夠歡喜 --neh！Hó-ka-tsài我有聽 Kim-hua老師ê話，來參加tse 台語文化歷史性 ê 比賽。Ǹg-bāng我會當 uī台語 kè-sio̍k 打拼 --lo̍h-khì lah！
附註:已刊登於台文通訊罔報(Tâi-bûn thong-sìn Bong-pò)第300期
原文網址:台語比賽(Tâi-gí pí-sài)
比賽 ê人、台語老師 kap 我
我kap老師ê合照
會當ná看ná聽:
