2018/06/23嘉徽 ê 台文分享會

tEH KapTsa-hng sī guá sóo pān ê Tâi-gí bûn-tsiunn hun-hióng-huē, kóng-tio̍h tsia, guá tsin-tsiànn tsiok huann-hí, ē-tàng ta̍t-sîng guá ê sim-guān.

Tsit kài ê ua̍h-tōng tī teh kū-nî nî-té ê sî-tsūn tō ū tsit ê kè-uē ê siūnn-huat, m̄-koh kan-tann ū siūnn-huat sī tsua̍t-tuì bô-kàu--ê, ài ū si̍t-tsiàn-la̍t, ióng-kám kiânn-tshut ka-tī ê kha-pōo tsiah sī pān-huat.

Tī hun-hióng-huē kóng--tio̍h, guá tong-tshoo ē khai-sí siá Tâi-gí-bûn sī in-uī beh kau Siā-tāi ê kong-khò, tú-á khai-sí beh siá ê sî, tann-á tio̍h 2 siânn niâ, ū-kàu tshi-tshám--ê. m̄-koh ū sim ū guān, koh ū Kim-hua lāu-su ê kóo-lē, ah guá mā siūnn beh liān Lô-má-jī, kā i liān hōo hó, kuat-tīng beh jīn-tsin siá. m̄-koh, guá ē-tàng siá kah ē-sái pān hun-hióng-huē he mā sī guá ka-tī ê phah-piànn.

Tī tsit ê kuè-tîng, kî-si̍t kóng bē-thiám he sī phiàn--lâng--ê, m̄-koh in-uī tse sī guá ka-tī sóo kah-ì, sóo suán--ê, sóo-í guá tō án-ne tsi̍t pōo tsi̍t pōo khuann-khuann-á tsò, m̄-bián hām pat-lâng pí-phīng, tsò siōng hó ê ka-tī.

Guá sóo hun-hióng ê bûn-tsiunn, ū sàn-bûn kap 1 phinn té-phinn siáu-suat, siá tsia ê bûn-tsiunn tāi-pōo-hūn lóng sī sing-ua̍h tiong ê tāi-tsì.

Ū khuài-lo̍k--ê, mā ū pi-siōng--ê, siōng ài kám-siā--ê tuā-kong-sîng tō-sī Kim-hua lāu-su, tong-tshoo tō sī i tshuā guá jīn-bat Tâi-gí Lô-má-jī--ê.

Nā m̄-sī i ê khan-kà koh ka guá ê phah-piànn, ah koh ū gún pē-bú ê tsi-tshî, mā bô tsit-má ē-tàng tsò Tâi-gí lāu-su、siá Tâi-bûn, sīm-tsì pān hun-hióng-huē ê guá.

Tsin to-siā tsa-hng lâi ê lāu-su kap tsit-kuá-á siōng-khò si̍k-sāi ê pîng-iú. Tsi̍t ê sîng-kong ê ián-káng-tsiá mā sī ài ū thiann-kuan tsiah ē sūn-lī、uân-buán, koh tsài kám-un ū lâi ê lāu-su kap pîng-iú! Lóo-la̍t!

嘉徽 ê 台語文章分享會(漢羅版)

作者:Ko Ka-hui日期:20191010

昨昏是我所辦 ê 台語文章分享會，講著tsia，我真正足歡喜，會當達成我 ê 心願。

這改 ê 活動 tī teh 舊年年底 ê 時陣就有一 ê計畫ê 想法，m̄-koh kan-tann 有想法是絕對無夠 --ê，愛有實踐力，勇敢行初家己ê跤步才是辦法。

Tī 分享會講著，我當初會開始寫台語文是因為 beh 交社大 ê 功課，拄仔開始 beh 寫 ê 時， tann-á著2成爾，有夠慘--ê。m̄-koh 有心有願，koh 有金花老師 ê 鼓勵，ah 我嘛想beh 練羅馬字， kā 一練 hōo 好，決定 beh 認真寫。 m̄-koh, 我會當寫 kah 會使辦分享會 he 嘛是我家己ê打拚。

Tī 這 ê 過程，其實講 bē-thiám he 是騙人 -- 人 --ê， m̄-koh 因為 tse 是我家己所 kah-ì，所選 --ê，所擺我就按呢一步一步 khuann-khuann-á 做，m̄ 免 hām pat人pí-phīng，做上好 ê 家己。

我所分享 ê 文章，有散文 kap 1 篇短篇小說，寫 tsia ê 文章大部分 lóng sī 生活中 ê 代誌。.

有快樂 --ê，嘛有悲傷 --ê，上愛感謝 --ê 大功臣就是金花老師 ，當初就是伊 tshuā 我認bat 台語羅馬字 --ê。

若 m̄是伊 ê 牽教koh 加我 ê 打拚，ah koh 有阮爸母 ê 支持，嘛無這馬會當做於老師、寫台語文，甚至辦分享會 ê 我。

真多謝昨昏來 ê 老師 kap 一寡仔上課熟識 ê 朋友。 一 ê 成功 ê 演講者嘛是愛聽官才會順序、圓滿，koh tsài 感恩有來 ê 老師kap 朋友!勞力!

*寫於2018/06/24勇於實踐~嘉徽的台語文章分享會後