無謂問我一生的事 誰願意講失落往事
北韓究竟係一個點樣嘅國家？
喺2019年嘅今日，你總係可以喺網上面，搵到一堆有關北韓嘅文章或者影片。連TVB都可以派個二打六去北韓幫佢哋拍宣傳片（吓？乜嗰條唔係北韓官方嘅旅遊宣傳片嚟嘅咩？），你可以想像到，其實北韓已經冇以前咁「神秘」。幾張平壤市區嘅風景相、幾個對鏡頭有啲敏感度嘅平壤「市民」、幾句似是疑非、加啲悲天憫人嘅感性說話；突然間，整個互聯網都係「北韓專家」，個個都同你訴說北韓「鮮為人知」嘅另一面。
Well, you don’t know shit about North Korea.
如果去過平壤就等於了解北韓，咁我喺金紫荊廣場影兩張相，都可以係香港問題專家啦。
平壤其實只不過係一個規模百倍嘅「機井洞」，住咗三百幾萬「出身成份」最好、政治最正確嘅「核心階層」人士。呢班人絕大部份都係勞動黨嘅最忠實信徒，接受住黨嘅特別供應，真正「食君之祿、擔君之周」嘅「忠義之士」；試問，佢哋既然擔住阿金生條周、又點可能有真相會俾你睇得到。
真正嘅北韓，係喺平壤市區以外嘅地方，一啲北韓官方唔願意俾你睇到嘅地方。由於連睇都唔想俾你睇，去又唔俾你去，所以真正見過嘅外國人少之又少。到頭來，真相都係要靠「口述歷史」。
喺2003年嘅冬春交替之時，我竟然有機會同一個喺「真正北韓」長大嘅女仔，同室共寢咗幾個星期。試問，我又點可以放過，喺佢身上「套料」嘅機會。
只不過，「真相」有時候，可能係我哋嘅「生命中不能承受的重」 — The Unbearable Lightness of Being，喺另外一個角度，其實係heaviness。
Day 5，長白山天池。
冬天並唔係一個去天池嘅好時機。伸手不見五指嘅濃霧、零下十幾度嘅氣溫、徹骨嘅寒風，難怪今日連遊客都非常稀少，淨係得我哋三個喺度傻吓傻吓打霧。
旅行就係咁樣嘅一回事，你可以盡量咁安排你想去嘅行程，但最後都係成事在天，唔係你典吓地扭吓計，講句「我唔制呀」就可俾你扭得開啲雲霧。
「初雪妹妹，呢度就係你嘅起源喇！」我同凍到縮咗係我懷內嘅初雪講。「仲唔快啲吸收天地靈氣。」
聽完我講之後，初雪離開我嘅懷抱、向前行兩步、然後深呼吸。
「啲天地靈氣好凍……」連一個喺北方長大嘅人都話好凍，咁就真係好凍喇。「唔知道我嘅祖先，當年點樣喺呢度生存……」
「祖先……」初雪突然若有所悟咁樣，半自言自語。「我爺爺係敵對階層，我係動搖階層，我家族成份唔好，可能祖先都未必係起源自白頭山嘅朝鮮人……」
「小孩兒，唔好咁樣諗嘢。」東元以「小孩兒」（ 아가 ）稱呼初雪。「人生來平等，我同你都係朝鮮族，並無『成份』、『階層』之分；但凡朝鮮族，都係起源自白頭山，政治並唔可以為我哋嘅出身下一個定論。」
「多謝叔叔。」初雪面露感激之情，向東元道謝。
喺呢段短短嘅對話中，我所思考嘅，就係究竟要喺一個點樣嘅環境長大，先可以令一個普通女仔，有咁根深蒂固嘅「政治自覺」？初雪呢個女仔，喺成長過程中，究竟面對過啲乜？
喺天池打完霧之後，我哋繼續今日嘅行程。
而我今日嘅行程，就係喺公路上面「遊車河」。
喺一個「冇圖冇真相」嘅年代，我要寫一隻故事，同我嘅讀者講「解放軍接手中朝邊境防務，中朝邊境事態可能有變」；咁無論如何，我都要有幾張軍車載住解放軍喺公路上開往邊境嘅照片佐證。
至於我影嘅「軍車」上面，究竟係咪載住解放軍、架車係咪去緊邊境、去到邊境究竟係咪接防、或者係某軍頭載住條女遊車河、定係載住廿七軍入天安門廣場屠城，呢啲都仲可以再慢慢斟酌 — 擺明係看圖作文，作得有幾大就憑良心。我從來都唔係亂作嘢嘅記者，但係所謂「有圖有真相」，其實都只不過掩耳盜鈴；一個記者立心要坤你，基本上都可以呃得吓人。
但呃人嘅前題，首先都要影到軍車先有得傾。
喺一條數百公里長嘅國道上面搵軍車，又係另一項「專題記者漫天打鳥」嘅例證。漫漫長路，冇頭冇尾，都唔知點搵。
八個鐘之後，我哋決定投降。
「也許不是這天吧……」東元嘆咗口氣。「讓我再問一問東順，看看他有沒有比較確定的日期和行車路線。」
我見初雪喺車上面瞌著咗，所以我決定先返去延吉，再作打算。反正，急亦不在一時；兩個星期、三個星期，我死唔信我連一張相都影唔到。
返到酒店樓下，已經係黃昏時份。
「明天你打算怎樣？」東元問我。
「軍車這事情，就拜託你了；」我答佢。「明天我打算去瀋陽，然後轉大巴往丹東，看看鴨綠江那邊的情況；你能幫我訂兩張機票嗎？」
「當然可以；」東元笑一笑。「想帶小妹妹每往大城市走走嗎？」我點頭。
「初雪這女孩很單純很可愛，對你也真的很關心；」東元繼續講。「你出了事那天，她可憂心得要緊，吃的不多，晚上也睡得不安穩，整晚在看鐘呢！有這樣的一個女朋友也不錯啊！可是，她的身份也……著實尷尬了點，要把她弄過來，不容易啊……」
東元可能諗多咗，但唔係冇道理。如果我真係要申請初雪嚟中國定居，可謂困難重重……
但到目前為止，呢個都唔係我需要擔心嘅事情；我同佢，距離呢個諗法仲好遠。
晚飯過後，又係我對抗誘惑嘅時候。
經過幾個晚上嘅共處，我證實咗初雪既唔鍾意戴bra、亦唔鍾意著褲瞓覺。每晚返咗酒店梳洗之後，佢都堅持佢嘅真空凸點加長腿，喺房裏面自由自在咁活動。睇電視、食零食、飲汽水、然後攬住我瞓覺；我就嚟谷精上腦。
所以，我決定將注意力，由佢個胸同對腳，轉到去佢嘅背景同故事。
「初雪妹妹，」我輕輕摸一摸睇緊電視嘅初雪塊面。「不如講啲關於你嘅嘢俾我聽吖！」
「咁你想知啲咩呀？」佢轉身坐直個人對住我。
「不如講吓你屋企吖。」專訪通常都係咁開頭㗎啦。
「我屋企……」佢認真咁諗。「就好似今日喺天池嗰陣講，我爺爺係『越北者』（ 월북자 ），解放戰爭（韓戰）過後，爺爺被視為『敵對階層』，送去再教育（集中營）；幾年後被編配去惠山嘅郊區務農。我哋屋企到我呢一代，已經係第三代農民。」
「我爺爺講過，農村嘅生活，幾十年都冇變。我自細長大嘅地方，亦都係我一直生活嘅地方。爸爸媽媽根據國家嘅指示去種田，我同兩個弟弟就去返學讀書。屋企雖然窮，但基本嘅糧食都係足夠嘅，有時滿足咗生產配額之後，甚至可以有多餘嘅榖物，可以去市場賣。」
「後來，一場雨災之後，我哋嘅收成盡毀。」初雪放低手上嘅零食，然後繼續講。「然後，有幾年日子，地上面都種唔出植物，爸爸話水土流失得太嚴重，可能要好多年先可以再種得出以前嘅收成。我哋全村都開始要等待國家嘅配給……」
「最初，我哋都仲可以配給到少少嘅糧食，但係好快就停止，佢哋話糧食要留返俾城市嘅人。於是，我哋就開始上山打獵，同採摘野菜。但係呢啲嘢唔係日日都有，上山嘅人越嚟越多，搵到食物嘅機會就越嚟越低……」
「就係你之前同我講，捱餓嘅日子？」我問佢，佢點頭。
「幸運嘅日子，我哋每日總會有一餐，可能係野菜、可能係動物、可能係山貓野狗、甚至爬蟲、鳥類。有時候，可能幾日都冇嘢食，爸爸就會去挖樹根，然後煮嚟食。但係都係得個飽肚，食樹根唔暖㗎！食完個人都係好凍，亦冇乜氣力……」
「咁嘅日子過咗幾耐？」
「兩三年前，開始種得返比較好嘅榖物，於是環境轉好。」初雪神情凝重。「但係，我爺爺同最細嘅弟弟，都等唔到呢一日……」
「佢哋過咗身？」我問佢。
「係，爺爺喺飢荒第二年就病死咗……」佢開始眼濕濕。「爺爺臨去嗰陣，同我講佢好肚餓；我搵唔到嘢食，於是斟咗杯水俾佢。爺爺飲完冇耐就去咗……。然後弟弟……有一日，我同爸爸要上山摘野菜，佢話好攰唔肯去。到我哋返嚟，佢都仍然瞓緊覺。然後……到夜晚……一直都再冇醒過嚟……嗚……嗚……」佢越喊越厲害。
我輕輕攬住佢、幫佢抹咗啲眼淚，但係佢完全冇停止嘅意思……
「弟弟死咗之後，爸爸覺得，咁餓落去唔係辦法……佢驚下一個會係身體已經唔係咁好嘅媽媽……佢好想大家都有啲嘢食……但係佢又唔忍心食人肉……」初雪完全停止唔到佢嘅眼淚，但堅持繼續講落去。「於是，佢將弟弟同同村嘅申大叔交換，換咗兩隻野兔……弟弟呀……嗚嗚……」
「佢將弟弟俾咗鄰居去食？」我知我唔應該咁問，但係聽到嘅嘢太震撼，我控制唔到自己。
初雪點頭，眼淚滑落得更快。「佢抱咗弟弟交俾申大叔，然後拖住我走。我唔肯走、抱住弟弟條屍……我要攞返弟弟……爸爸將我抱走，我掙脫咗，然後衝入申大叔屋企，我要攞返弟弟呀……但係已經太遲……我睇到佢哋切咗弟弟隻手落嚟……啲血一直流……嗚……弟弟呀……」講到呢度，初雪開始嚎哭。
我從來冇諗過，《史記》裏面嘅「易子而食」，會發生喺二十世紀末嘅現代，仲要係一個我認識嘅人親眼所見。
「嚟咗中國呢半年，我每次食得好飽嗰陣，都會……都會諗起弟弟……嗚……」初雪仍然淚流滿面。「我同自己講，我要食埋弟弟嗰份，我希望佢可以感受到，姐姐食飽肚嘅感覺……弟弟成世人……都未曾試過食飽……姐姐冇本事俾嘢你食……唯有代你食飽啲……」
我唔知道，如果睇住自己親人俾人煮嚟食嗰個係我，我仲可唔可以神智健全咁企得返喺度。我對初雪嘅堅強，實在另眼相看。然而，呢一刻我亦都唔知道，點樣可以令崩潰嚎哭嘅佢恢復過嚟……
喺冇晒辦法嘅情況之下，我唯有用最原始嘅方法：我將佢抱咗上我大脾坐低，然後喺檯面嘅零食包裏面，拎咗一排朱古力俾佢揸住，再幫佢抹眼淚。
大約十分鐘之後，初雪開始冷靜落嚟；然後，佢開始食朱古力。撇除佢嘅悲慘經歷，佢的確係一個好容易𠱁嘅女仔。
「哥哥呀，」食完朱古力後，初雪望住我。「我就算餓死，我都唔會食人肉……」
「我知你唔會。」我一邊講、一邊摸住佢個頭。
即使佢真係食過人，喺面對生存同死亡之間嘅決擇，我根本冇可能、亦都冇資格怪責佢。我哋喺呢個商業社會爭扎求存，有邊一日唔係人食人？
「但係，我突然好想咬你！」佢都未講完，就已經喺我膊頭上面咬咗一啖；還好，佢唔係太用力，我唔算太痛，只係留低咗個有朱古力嘅牙印。
咬完之後，佢繼續伏喺我懷中。然後，佢同我講：「俾你抱住嘅感覺好幸福㗎！如果以後都可以係咁就好喇。」
其實，喺不知不覺間，我對呢個女仔，都產生咗一份憐愛，希望可以好好照顧佢，等佢有好日子過。只不過，理智話俾我聽，我哋之間，係冇可能嘅。
無謂問我今天的事
無謂去知不要問意義
有意義無意義 怎麼定判
不想不記不知
無謂問我一生的事
誰願意講失落往事
有情無情不要問我
不理會不追悔不解釋意思
無淚無語 心中鮮血傾出不願你知
一心一意 奔向那未來日子
我以後陪你尋覓好故事
無謂問我傷心事
無謂去想不再是往時
有時有陣時不得已
中間經過不會知 不會知
（待續）
本故事人物及情節如有雷同，實屬巧合。
