聖誕至新曆新年之間个大代誌就是 steam 个寒天拍賣，雖然我已經有一大捾電動猶未迌，看著拍賣嘛是共買落去，今仔就來介紹我這回買个電動。
迪斯可樂土（Disco Elysium）
八個月前我就知影《迪斯可樂土》，但是彼陣猶閣無繁體中文，聽講這个電動字足濟閣無簡單，而且閣會共共產主義剾洗，簡體中文足濟攏予改過，所以我當時就決定，若出繁體中文一定共買。
是按怎我會想欲耍這咧，就是看著這篇介紹：《極樂迪斯科》心得：開創自由、意味深遠、獨一無二的角色扮演遊戲。
毋若是調查，閣會當揀欲按怎調查，你用个方法了尾會影響著結果，就是我上佮意个耍法。
死亡靠沙（ Death Stranding）
猶未出進前我就想欲迌矣，本底就誠佮意廢土世界，用送貨个方式走傱世界，嘛誠有意思，而且閣有中文。出佇 steam 了後頭一回拍賣，我就是收著 steam 个批講《死亡靠沙》欲拍賣，才發現寒天拍賣已經到矣，雖然猶閣無時間耍，欲買个慾望擋袂牢，嘛是共卡攄過。
瘟疫傳奇：無辜（A Plague Tale: Innocence）
看著阿姊佮小弟就決定愛買矣（。），我原底就佮意歷史背景个電動，會當親像活過彼个時代，彼陣看介紹講愛用火趕鳥鼠，嘛感覺誠趣味，而且主角才十五歲，拍袂過共伊佮小弟追殺个軍人，干焦會當覕，佮我足佮意个《Siren》仝款。
揣著一篇介紹袂䆀，予逐家參考：瘟疫傳說 無罪：難能可貴的單機遊戲，握緊弟弟的手脫離老鼠海的襲擊。
刀零（Katana Zero）
最近予朋友推个電動，拄仔好推無偌久就拍賣，伊个文佇遮。
本來無咧耍橫向動作，因為最近開始種田，才發現家己嘛是會當耍這款个，誠濟進前跳過个電動就會想欲來耍看覓。看伊介紹講講故事个方法誠厲害，閣是 cyberpunk，就想欲試看覓。
烏影戰術：將軍之刀（Shadow Tactics: Blades of the Shougun）
這个電動是阮小弟共我推薦个，彼陣我講感覺《十三機兵防衛圈》袂歹耍，機兵之間个配合誠趣味，伊就講按呢我應該會佮意《將軍之刀》，彼是有五个忍者出任務，逐个會曉个能力無仝，愛互相配合過關。我聽了想講有一工愛來耍看覓，但是本底這回無欲買，毋過彼工看著拍 1.５折，就隨買落來。
進前我有實况過《落著霧雨个森林》，差不多應該閣來實況別項，若頂懸有想欲看个，會當講予我參考。
