手機仔內个辦公室戀愛

　　恁敢有用過柑仔蜜時鐘？我為著寫這篇才去查，原來柑仔蜜時鐘是踮 1980 年代 就發明矣，彼其實毋一種時鐘，是一種管理時間个方法，原文叫「pomodoro technique」，pomodoro 就是意大利文个柑仔蜜，可能是對一種柑仔蜜形个計時鐘來个，予人共欲做个工課分做 25 分鐘一段，逐段中央歇睏 5 分鐘，算講一種予人專心个方法。

　　毋過這佮 ACG 有啥物關係咧？因為最近我發現一个共柑仔蜜鐘佮電動濫做伙个 app「戀愛柑仔蜜（LoveTodo）」，你會當踮這个 app 內底安排今仔欲做啥物代誌、開偌濟時間，開始做 app 就會幫你計時，期間攏袂當用手機仔，予你專心做代誌。

　　講到遮佮一般个柑仔蜜鐘攏仝款，無仝个所在是，app 內底會有「同事」陪你做工課，做伙拍拚愈久，感情當然就愈深，會當看閣較濟佮彼个人鬥陣个故事，這个部份就是標準个戀愛電動。伊相準个是查某耍者，所以內底「同事」有五个查埔佮一个查某——無毋著，嘛有查某角色。

　　而且這个電動嘛會當抽卡，逐張卡有伊个故事，若逐工完成固定个任務就會當提著抽卡用个花。我上袂當了解个是，這馬猶閣袂當開錢抽卡，電動內底嘛無廣告，公司到底按怎趁錢咧？

　　共生活變做電動，應該算講最近流行个觀念，尤其是提到佗就耍到佗个手機仔電動，電動會設計拄拄仔好予你小可出力就做會到任務，人若得著報酬就會閣較骨力，做袂到會想欲放棄，傷簡單會無聊，柑仔蜜鐘个 25 分鐘應該就是彼个「拄拄仔好」。