當以為自己好清楚方向時，到靜落嚟呢刻，先發現面前原來係模糊不清。
恐慌來自未知嘅環境，白茫茫一遍，雖然清楚見到身邊人逐一被帶走，離開困局，但你又好似見唔到佢哋將來嘅路，無咩參考價值。然後又唔知幾時開始，發現好多人唔知唔覺咁消失咗係眼前，換上唔同嘅名字。改朝換代，時移勢逆，無一樣野你係可以掌握得到，只可以等人去畀個陷阱你踩，講句其實幫緊你。爾虞我詐嘅世界，佈滿住宏大嘅人生道理，包裝住自利嘅出發點，但無論如何，咩都唔係問題，最緊要係你願唔願意去玩呢個遊戲，只要你參加呢個遊戲，價值觀就有機會由你去決定，你變成主流、指標、代表人物，甚至係某個世界嘅中心點。你有無諗過，只要努力做好自己，就可以成為一小眾人嘅標準？真係無吸引令你想試下去玩呢個遊戲？當然，只係有機會，唔係一定得，但唔做就一定無。類似呢啲金句、真理，係現實中都聽唔少，問題唔係你相唔相信會成功，而係當你留係困局，除咗放棄，其實你根本就無得選擇。
咁不如，咩都唔好諗，做咗先算。反正，唔做就企係到，做咗，點都叫做行咗一步？又唔係輸唔起。
不過呢... ...最令我搞唔清呢個世界嘅係... ...
點解我成日都好似畀咗好大壓力喺身邊嘅人到？到底我做錯咗啲咩？
(好想用emjio，因為我唔用，啲人就覺得我鬧緊人、串緊人、講野有刺、落閘放狗、自以為視... ...等等。)
點解？
十三郎
[ 屬精神分裂系作者 ]
出版/作品包括《DSE幻想校園》系列、《留給世上的未來》、《錯的人生，對的人》、《叛神軍團》