【開講讀者投稿】：娘花〈一个雞籠囡仔戇神的時陣 〉

彼工，爸仔囝的車 tng 欲駛去入高速。阿囝袂記得路矣，來的方向佮去的方向……眼中干焦賰來往的車閣有歸片的平厝仔，毋是定定看著。噶瑪蘭平原一望無盡，看無海--ê，山嘛遙遠，雄雄，伊 soah 感覺驚惶。毋知對佗轉，轉去彼个濟山、倚海的所在，chhāi 一粒親像雞籠仔的山，有通倚有通靠。

遮是噶瑪蘭的地盤呢。

伊想起來老爸捌講過，𪜶遐，古早是蹛著凱達格蘭的 Bassayer [註 1]，起一個大庄仔頭叫 Kimauri[註 2]。𪜶嘛 kā 漁港附近號一個地名叫 Pataw，今馬變作八斗子[註 3]。倚山通蹛，倚海通吃，Bassayer 的人 gâu 做生理，kā 彼寡紅毛番仔弄甲分袂清東西南北。遮的噶瑪蘭敢有平 gâu？不管是雞籠也是宜蘭人， 這馬攏講台語，無定著連台語也袂曉，啥人猶閣會記得古早古早，啥物平埔族啥物原住民？現在的囡仔，倚海 soah 驚海，連東西南北攏分袂清。

「揣無路喔？啊山的方向就是轉去的方向。戇神啥啦！」

「阿爸，你閣會曉認山頭喔？」

「認啥潲，雪山山脈鑽過，就是咱雞籠啊啦。遮閣有別的山呢？緊行啦，敢若 會落雨，愛轉去收衫。」

註 1：Bassayer，多譯為巴賽人、馬賽人，為凱德格蘭族支系。
註 2：Kimauri，多譯為金包里社、大雞籠社，為範圍涵蓋現金山、萬里、基 隆地區的舊社。
註 3：八斗子，與北投(Pak-tâu)地名同為凱達格蘭語 Pataw 演變而來，讀作 Peh-táu-á。