幾年前，我寫歌仔戲劇本，寫𨑨迌耶！毋但韻啊遮的代誌要家己學，台語的每一个詞攏查字典（紙本的），攏總寫兩齣，寫完共［人因－他們］囥佇電腦內面歇睏。
進前，我予政府的教育教作我是中國人，38歲才開始了解台灣的歷史，我講的台語離離落落，退休了後，去學歌仔戲，我才知曉我的台語發音毋好，閣去唱台語歌，只是平時講的機會真少。
我的囡仔已經大漢了，我遺憾𪜶袂曉講台語（一點仔，算袂曉），我捌努力過，毋過沒效果，過去的時間袂閣轉來啊！我自己開始做，開始寫台文。這馬有電腦的字典通查，無困難。十五年前，我佇寫古早背景的小說時（地點佇中國大陸），需要看中國出版的資料，一開始查字典，慢慢仔看簡體字，無偌久，就看得真順啊！所以只要去學，就會曉啊！寫台文嘛仝款，查一擺袂記得，查兩擺，三擺……，總是會記起來。
我逐工佇面冊頂懸（頂面）寫一段，同時貼佇「足英台三聲道磅米芳」的迷眾頁(fans page)（註1），希望共人有互動，若有寫毋著的字，歡迎指教。
１．一開始，我用華語拍佇「對應華語」來揣台文按怎寫，第三工就定定用我知影的字詞佇「詞目音讀」查，確定對啊是不對，定定對。
２．我按拜一開始寫，寫第4篇就寫比較長囉！
３．台語本來沒字，借漢字來寫，漢字無的，另外造字，有的字電腦拍袂出來，本來想會裝「拍台語」輸入法，有一點仔麻煩，就用字典內面的字貼過來就好。
４．我會曉講台語，直接寫漢字，猶未學羅馬拼音，袂曉講台語的人，會使先去學羅馬拼音（台羅）。
５．想到秦始皇的「書同文」，共文字統一起來，是真方便，毋過同時應該有真多其他的文字予人消滅囉！
（2019年寫）
註１：「迷眾頁(fans page) 」是我今仔日佇「足英台三聲道磅米芳」頂面學著的詞，看別人寫的，學起來，用出來，語言才是活的。
註２：台文不會寫，不會唸？ 查這裏
上一篇
