Deep V 熱褲大專生

離開中學要著校服的階段，轉而係大專校院返學，感覺係自由嘅、奔放嘅，學生鍾意著乜就著乜，我呢啲七十後嘅小講師，真係識件旦治咩!

有一個同學仔，經常都著無袖背心返學。係，日日見親佢都係著低胸Deep V背心仔。咁冬天呢，當然都係背心，最多佢只係加件褸咁大把。

我問佢：「老老豆豆你日日都著背心，冇人覺得奇怪咩?」

「有! 上次返大陸過關時，個邊防檢查完證件，專登叫停我，問我點解外面得8度，你都著背心?」學生答。

「咁你點答佢!」

「好在冇乜著衫，如果唔係佢會懷疑我私藏毒品或者走私。」

其實，呢個日日Deep V的學生是男同學，而且唔係香港先生的大隻鋼條身型的!

另一單仲靈異，我通常泊好車都係行上Office，有一日行行下，舉頭一望，未到中秋，但點解見明月，仲係南月球，有啲鬼鬼祟祟的肉在熱褲邊緣走出來。我惟有不停心唸道德經，上一級樓梯有如取西經的煉歷一樣。

當然，大家唔好有咩幻想是什麼索女，而是另一個男同學，老實說，我有啲擔心佢係街會被人非禮。

唔知呢兩位Deep V或熱褲男，依家出嚟做野後，會唔會仍然保持初心，繼續咁著返工?

--------------------------------------------------------------------------
請看官來 https://www.facebook.com/littlelittlelecturer 給我一個讚吧!