(臺語)國中生的煩惱

2023/02/09閱讀時間約 1 分鐘
五月份過咧欲了矣,鳳凰花共校園妝甲紅記記、媠噹噹,我才發見三年的學長、學姊已經強欲畢業矣!我心內毋但有淡泊仔毋甘,嘛有一屑仔對三年的期待佮向望。
三年會是我佇國中的最後一冬,因為這一冬愛面對國中教育會考,升學、考試的壓力會愈來愈重,想到遮,我定定煩惱甲一粒頭兩粒大、操煩甲袂食袂睏得。阿母知影了後,笑我驚驚袂著等,代誌都猶未發生咧,家己就先煩惱起來khǹg。
阿母叫我先沓沓仔想,思考未來較想欲做啥物工課,才閣來考慮是欲讀高中、五專,抑是職業學校?紲落來才閣來想看覓欲達到這个目標,應該愛加強啥物科目,愛有偌濟分數才會當安全達成?
聽了阿母的話,我猶是真煩惱,煩惱成績無理想。阿母知影了後,閣共我安慰講:「考試毋是上要緊的,成績嘛毋是上蓋重要的。這馬咱國內學校遮爾濟間,升學的管道嘛蓋多元,只要有心想欲讀冊,免驚無學校通入。上要緊的,是你的意志愛堅定。」「樹頭徛予在,就毋驚樹尾做風颱。咱的意志若掠會定,將來人生路就袂行偏去。毋過若準連鞭學泅水、連鞭學peh樹,按呢顛倒事事項項攏學袂成。」
阿母這寡話,親像海邊的燈塔,予我安心佮方向,這馬我知影愛思考家己想欲行啥物款路,才通決定未來準備的方向。
為什麼會看到廣告
5會員
65內容數
留言0
查看全部
發表第一個留言支持創作者!