Báng-kah 街仔路--ni̍h

Góa mn̄g thiⁿ

Lí kám chin-chiàⁿ ū chi̍t ê lâng tī téng-bīn khòaⁿ--gún

Lí kám sī che it-chhiat hiau-hēng koh bô-sūn-sī

Oai-ko-chhi̍h-chhoa̍h ê sè-kài ê chhòng-chō-chiá

A̍h-sī-kóng tùi-bīn lâu-á-chhù lāi-té ê pâng-keng

Lí tng teh hām m̄-chai tó-ūi lâi--ê sio-kàn khùiⁿ-oa̍h.

Góa mn̄g i

Lí teh khòaⁿ sàⁿ？

Lí kám ū chin-chiàⁿ teh khòaⁿ？

A̍h-sī kóng lí kan-na sī teh suh chhia-lō͘ ê khong-khì chiâⁿ hun

Chò thian-jiân ê bah-thé khong-khì chheng-chēng-ki

Kō͘ I ê ài lâi thê-chhéⁿ jîn-lūi m̄-thang khò-sè hoat-tián.

I bô chhap--góa

Kek-tiām-tiām ná chhiūⁿ góa lâng bô tī hin ê khoán

Chòe i suh ka-kī m̄-chai tó-ūi lâi ê hun

Kā góa ê būn-tê suh--ji̍p-khì, kā hì phùn kah kui ke-lō͘

Bōe-su ang-î teh mn̄g-sū hit-khoán

M̄-koh góa bô tī hin, mā bô lâng kā mn̄g

Ū siáng chhap--I？

Ū siáng chai-iáⁿ--I？

Ū siáng se̍k-sāi--I？

Ū 1 kang I chŏaⁿ bô--khì, khì tó-ūi？

Ū siáng ē ē-kì-tit--I？