行到佗位，攏愛鑢馬桶（台文）

台北的厝本來是我的，查某囝結婚生囡仔了後，讓予in蹛，變做我無房間，轉去台北陪查某孫彼幾若工，暗時轉去新店睏。

囝婿蹛入來了後，我看查某囝有時陣佇鑢馬桶，伊講：「加一个人用，加較臭。」嗯！伊有鼻著臭味，誠好，本來攏是我佇鑢耶！

查某囝有佇鑢，毋過嘛是誠臭，我不時愛去加工一下，掛手橐仔，用菜瓜布落去鑢，有臭味，是因為尿滓黏佇細縫中，用長長的鑢仔去鑢無路用，愛用手佮菜瓜布才鑢會著，用水就好，毋免用清潔劑。

落尾，我看查某囝共這項代誌分予囝婿，伊鑢幾若個月了後，技術有進步，較袂臭，我毋免遐捷鑢啊！

新店厝內，我一入門，去便所洗手，我的房間邊仔，有一間便所，是我佇用，後生轉來嘛是用這間。洗身軀是另外一間，我用的彼間我家己鑢，另外２間不時攏鼻著臭尿薟，我感覺真艱苦，我一禮拜蹛２暗，逐擺轉去，就愛提手橐仔佮菜瓜布去鑢，我共３个囡仔講：「當作我真愛鑢馬桶。」

彼个人毋捌鑢馬桶佮拭塗跤，這馬阮２個人無講話，無交往，各人行各人的路，啥物話攏毋免講，大細漢逐家平安無代誌就好。

（2023.10.21.）

（歡迎指教！）

教育部臺灣閩南語常用詞辭典

Giorgio Trovato on Unsplash