前註：
我的朋友Angel，彼个前男友實在有夠譀，我一定欲共話講出來。原本我欲用華文寫佇我的面冊頂懸，設公開，閣貼佇Angel的面冊頂面，伊講伊處理家己的情緒已經共氣力用了了，佮伊已經無關係，無欲閣講矣！我想著改用台文寫，貼佇遮。
- - - - -
TO Angel 的前男友
你講你愛著別人，無愛Angel，就趕緊欲共20年的感情切掉，叫伊緊咧搬出去，閣叫伊袂使公開講，若是講出去，就是咧公審你—若是你做的代誌是「正常」的，是按怎伊袂使講？袂使講伊的經驗、伊的心情佮伊的想法呢？
你是一个大人矣！代誌是按呢做的喔？你講你無愛，人嘛袂當強迫你繼續愛，毋過彼个「家」是Angel佮你同齊成立的，伊搬走就無代誌？彼間厝是伊生活誠久的空間，有誠濟物仔、敢若是囝兒的動物，抑有生活過誠濟的日子。你按呢做，敢講一點仔攏無啥物感覺？
你愛著別人，對伊來講真傷心，叫伊趕緊搬走是閣較大的傷害。
感情若結束，愛互相討論一下，好好仔講再會，遐仔經過的代誌攏袂消失無去，無管你會記得，抑是袂記得，經過的代誌會永遠留佇恁的身軀佮心肝，抑有潛意識內底。
雖然伊這馬搬出去矣！
１．你猶是會使揣伊講講一下，好好仔講再會，遐是恁互相性命的中間一段誠長的日子。你會使共伊會失禮，嘛毋免講失禮，你對你家己的情慾忠誠，毋是對某一个人忠誠，彼嘛是誠好的一種做法。
２．若是你這馬揣伊講話做袂到，只好等下一擺。
下一擺，你若閣再無愛彼个人，你愛好好仔佮對方講講一下，好好仔分開。
若是對方先無愛你，你愛要求對方佮你講講一下，才隨人行隨人的路。
向望遮仔話會當傳到你的面頭前予你看著，做人做代誌毋通傷譀，你已經大人大種，毋通做這款漚屎代誌，我毋捌你，干焦知影你已經毋是少年人。我毋是講少年人就袂曉處理代誌，這佮年紀無關係。
