Tsuē-tsuē 人講，看家己 ê 阿母抑是姊妹隨知影查某囡仔攏 ē 搪著 ê 問題「換冬」➀，gún 阿母 tī 我來洗進前身體猶少年，總是子宮荏就 hōo 伊提早下班歇睏，我兩个阿姊天公伯傷疼痛𪜶 mā 早早 kā 𪜶招轉去塗州賣鴨卵，所致我無見本通參考來洗換冬 ē 生做啥物款，總是現代醫學發達佮人人攏是放送頭 hōo 我有機會認捌來洗準備 bueh 換冬進前 ê 症頭，像投資衛生棉 ê 錢愈來愈省。
我知影現此時有 ê 人 ē 講無人講衛生棉愛講紮布，向時 hőng 笑講行 buē 出夜市仔 ê 蚵仔煎已經成做國宴名菜，英語無 ê Mukbang(食播) tī 2020 mā 成做英文辭，所致 m̄ 捌使用阿媽紮布 ê 我自然順第一斗接觸跟綴教我按怎轉大人 ê 大姊講「衛生棉 uē-uē-sing-mî」。
教育部台語辭典收英語 ê Menopause 做「更年期 king-liân-kî」我鈍舌僫講這个辭就跟綴收看德國醫學節目較捷聽著 ê Wechseljahre 換冬做 Menopause ê 台語，講著 Menopause 德語 mā 有這款較白話 ê 講法，die Menopause。Menopasue 按古希臘語「逐月出血結束」來，我 ê 逐月日愈來愈無穩定 mā 無醫師分張 ê 按家己 ê 阿母抑是阿姊大約仔會使得了解你 ê 大姨母 buaih 來吵家抐宅 ê 模樣，所致上網路請教各教授賜我智慧生，各位網路教授分張「身體 ē 磕 buē 著就懶屍佮氣持ち磕 buē 著就起磅、睏 buē 落眠等等。」我順網路教授 ê 點拄一條一條繩，我無氣持ち磕 buē 著就起磅、睏 buē 落眠 ê 問題，這个到今至少猶無困擾著我 ê 問題，我想凡勢交我固定做運動佮食甲有豐沛有相干。懶屍這个問題就真僫處理，特別是大姨母 bueh 來相揣進前，規身人是會呼雞 buê 歕火 ê 忝，準做我啥物代誌攏無做。這个現象 tī 烏貓姊年間罕得發生 m̄ 知敢是人講 ê 欠血。我無愛食下水不過我愛食豬血湯抑是豬血糕，人猶 tī 台灣搪著大姨母來加加感覺腹肚鬱鬱腰微微仔痠，這久徙岫來德國，腹肚鬱鬱腰微微仔痠走甲無見半項，換會呼雞 buē 歕火，這个現象是 hoo-lú-bóng tih 起狡怪，抑是食物方式改變？遮 ê 紅肉比臺灣俗價，總是我 mā 罕得食，有紅甲若英國皇室上愛 ê 紫蘿蘭色 ê 紺草花我喙白交伊無才調做朋友，敢是按呢，所致一搪著大姨母來吵家抐宅隨成做無風 ê 雞胿？𠊎毋知，Whatever，據在伊，畢竟無四序 ê 日子 mā kan-ta 這段期間，不過彼位無聲無說自動來報到 ê 凝心需要請伊出門，抑無日子 ē 過甲甕喙 m̄ 縛，醃缸喙縛 buē 密。
這个莫名其妙 ê 凝心需要 tī 車日子露營進前揣出答案，抑無好好仔歇假 ē 舞豬舞狗處理這个 m̄ 知敢是換冬𤆬來 ê 情緒。
頂站仔阿羅𢯾一箱工作福利品 hōo 我，其中包括框金 ê 鱷梨仔 10 粒。我愛食鱷梨仔總是我較按怎愛食猶是無法度逐日食一粒，畢竟我 m̄ 是田螺無才調較行 mā 仝逝，像 gún 翁兜 ê 傳統。
阿羅分張 ê 鱷梨仔 m̄ 是廠商退轉來彼款歲壽已經行到日斜西 ê 貨是鮮沢按南非農場送來 ê 合作社 ê 新鮮貨，遮 ê 鮮沢貨需要隱，一斗隱 2 ~3 粒無問題，一斗隱 10 粒是足恐怖 ê 代誌，因為食 ê 速度捙拚 buē 過伊變老 ê 速度，特別是無隱伊 mā 自動轉大人 hōo 你逐 buē 著。
德國人 ê 鱷梨仔大多數是敆生菜、麵抑是麭，我驚膨風特別是查某人準備換冬欶一喙空氣 mā 歕雞胿 ê 人生坎站，我需要斟酌控制家己 ê 喙斗，所致食 buē 飽脹 ê 卵包鱷梨仔麭抑是透寡橄欖油、蒜頭、芳料草做青醬敆麵 ê 食法齊 m̄ 是早起三朝當一工 ê 第一个選擇，總是眼前 ê 鱷梨仔宛然現此時 ê 囡仔無到十歲就做姑娘矣，啊，頭疼矣，愛按怎處理，擲潘桶，世界有遮爾仔 tsuē 人無飯通食，特別是這久 ê 新聞「加薩囡仔問講，是 m̄ 是去天堂就有肉通食...」，我 ê 世界遮爾仔美好，人生遮爾仔幸運，我 buē 使得遮爾仔討債像 gún 翁𪜶兜 ê 傳統，特別是勥母，一隻雞腿吃無幾喙就擲潘桶。是講我自來就抾拾無討債，總是目今搪著雞胿 hōo 歕落去抑是維持，這是一个大問題矣，不可 tuì 家己豆乾 hàu 媽祖，清清彩彩！
「我 ê 體重猶原 71.4」這睏仔小工比我做較 tsuē ê 翁步頻分張久年不見 ê 數字，這句話宛然雷公摃雷點揬我這件代誌，bueh 生一公斤 ê 肉愛食甲 7700卡，這个 7700 卡是扣除(tû)自身新陳代謝後 ê 數字，gún-ê 胃自 2021.8 做陣掠肥食瘦就訓練甲一日食 1800 ~ 2300 差不多盡磅，一搝著膨紗摠這个自我叨撚兼恐嚇 ê 無聊代隨走甲無看半个影。
2025.05.17 暗時 9 點翁仔姐準做坐踮電視機頭前看歐洲歌唱比賽，自認家己有才調排入前十名 ê 德國表演看煞睏神 mā 來相揣，總是讀中央社新聞讀著瑞典代表唱芬蘭瑞典語 hōo 手指頭仔做千斤秤 kā 睏神講時間猶未到較晏捷來揣。排 tī 23 號 ê 瑞典表演結束，猶閣有兩位表演者心一橫千斤秤 kā 伊楗甲 25 號阿爾巴爾亞歌者演唱結束，歌唱得名明仔載透早就知影，來睏。翁仔姐兩人手牽手做伙唔唔睏甲日頭做鬧鐘仔叫 gún 起床。
人精神隨 kā gún 翁做枕頭享受每禮拜日 ê 福利：掠龍 mā 那聽伊 ê 早起新聞「德國第 15 名，奧地利第 1 名，瑞士第 10 名，法國第 7 名，希臘 ê Nana 第 6 名，西班牙第 23 名....」
「德國 15 名無意外，法國第 7 名這絕對是判裁分數懸過觀眾投票，像以色列是觀眾投票 tsuē 過裁判分數」我紲話。
「法國交以色列 tshan-tshiūnn 你講--ê，m̄-koh 𤆬領德國 ê 頭人無歡喜」翁講。
「伊 ê 光映映已經過矣，tsa̋ng-ê 表演無論穿插抑是歌曲交伊𤆬領 ê 彼年揣無啥無相𫝛 ê 特別」我講。
逐禮拜日半點鐘 ê 掠龍福利結束，我看一下仔手機仔「9 點」以我慢跤慢手 ê 出菜速度 m̄ 通食傷過腥臊，抑無一頓早起頓食甲變中畫頓，按呢 gún 翁仔姐愛啥物款 ê 早起頓？那洗面洗喙那反大腦圖書館有啥物通免沐油煙閣通食甲哽胿 ê 料理。
控間按浴間仔換甲廚房猶 tuì 菜蔬果子五穀貓貓相，驚伊曝日頭愈曝愈熟 ê 鱷梨仔步頻成做玫瑰花芳 kā 我 ê 雙目按第一料理區踅去第二料理區，啊，我知影矣，今仔日來出前幾日 mā 是 uī-tio̍h 解決痟貪軁雞籠 ê 鱷梨仔牛奶凍醬。
2025 歐洲歌唱比賽無啥特別 m̄-koh 觀眾留話比表演者閣較吸引目睭仁，自頭笑甲尾，德國人真正𠢕 ka̋ng 剾洗閣無垃圾話。Tsa̋ng mā 發見一件代誌，向時捷出現 ê 英文沓沓仔換做家己 ê 語言，像向時捷唱英語 ê 德國交荷蘭這斗換唱德語交法語，愛沙尼亞唱義大利語，上特別 ê 是瑞典，這斗總算無閣唱英語換唱芬蘭瑞典語，這斗 ê 變化是歐洲少年人沓沓仔發見 kā 別人 ê 語言惜命命不如 kā 家己 ê 語言惜命命閣較重要 ê 愈在地愈國際？
➀ Wechseljahre/更年期
2022.05.18 + 2025.05.18
