雖罔，我做 ê 代誌 hōo 人看 buē 上目，甚至捷有好心人好意點揬 m̄ 通繼續食 m̄ 著藥，人參一石。
賣麵--ê 看人撒麵，我 mā 𫝛款。別人認定 ê 蠓仔叮牛角，徒徙勞無益，是我 ê 食著藥，青草一葉 ê 對症下藥。起因，醫生較𠢕開藥進前 mā 愛向咱請教「借問先生你食藥仔敢 ē 過敏？」
魂舒確定無啥欠 B12、鎂、鋅 hōo 我記持䆀無頭神，總是讀過 ê 資料無一字一字鏨 tī 手摺簿仔，讀入心肝穎 ê 文字猶是一陣透心涼 ê 清風，吹過隨無見無風 ê 賰三日無餾，𬦰上樹。所致寫部落格正港是一件好代，起因伊 hōo 無愛寫字 ê 我有才調拆字爿 hōo 伊順碼號 ABCDEFG 到 Y 鬥 1 到 5 ê 碼號成做一字 kā 遮 ê 無閣餾 ê 往事留做記錄。
「咱愛按呢做....」當 gún 翁又閣爸母上童以愛包裝伊 ê 控制慾，我想著料理社團搪著 ê 𠢕人女子。
我 kā 你建議，遮 m̄ 是臭頭仔包頭巾 hōo 你防蠅(風神) ê 所在，不過我建議你成做我 ê 迷眾學習引底里人 ê 手路。
我個人無清楚這是建議抑是搝客，不過伊確確實實認定家己是引底里，tī 這个角勢推廣伊 ê 迷眾頁是 uī-tio̍h 救蒼生，特別是我這類下階層 ê 蒼生。
這位引底里 tī 我參加 ê 社團有解救偌 tsuē 迷途羔羊(bê-tôo ko-iûnn)我無研究，總是伊燃茶 ê 工夫交翁兜勥母相𫝛 ê 𠢕，伊 ê 茶鈷永遠有水 hōo 伊呻甲噪人耳。
勥母，我遮爾仔十全 ê 𠢕，恁遮 ê 人竟然無一个人寶惜。
引底里小姐，我遮爾仔十全 ê 𠢕，恁遮 ê 蒼生竟然 m̄ 知愛跟綴我 ê 跤步，特別是我是過鹹水 ê 人。
Gún 翁 hōo 𪜶爸母上童呔討引𤆬我想著這位引底里小姐？
「龍眼好食核烏烏，阿英都無愛你矣，你猶閣綿死綿爛咧求伊，你哪會遮戇啦！」面對引底里小姐 ê 建議抑是邀請，我齊好禮甲 kā 推辭，引底里小姐猶原若教典 ê 造句，阿英都無愛你矣，你猶閣綿死綿爛咧求伊 ê 煩，總是引底里小姐是電腦一關 buē 閣相拄搪 ê 人物，翁 ê 我遮爾仔愛你，你卻 hōo 我慼心 ê 傳香火 hōo 我興做盲腸（鯤島計畫/粉紅色小屋）kā 臭死。
不過，做賊一更，守賊一暝，我拍死賣雜細，得無一枝針，gún 翁是嚨喉 m̄ 知疼 ê 性地，前一秒喝臭甲 ē 死人，後一秒講一屑仔攏鼻無臭味 ê hōo 我心狂火著到無興做盲腸隨在伊 ê huînn-ti̍t 是伊興賣棉被 bué 烏魚，我一屑仔攏無興甕喙 m̄ 縛，醃缸喙，縛 buē 密。
早前綿綿精精苦勸我這个臭頭 m̄ 通遮爾仔愛包布，防蠅(風神) ê 引底里小姐敢有成做伊向望 ê 出名人？
人講這人生，海海海海路好行，m̄ 通越頭望，望著會茫...人生海海，海海人生，別人認定 ê 枵狗數想豬肝骨 tuì 我來講凡事有結束，只有兩條煙腸 ê 無要意➀，buē 茫 buē 綿爛追求目今 ê 伊お元気ですか，不過愛 hōo 爸母上童 ê gún 翁需要好好 kā 轉骨 hōo 伊清楚知影情緒叨撚交磺火應效 tuì 我無路。
寫著引底里人格，我想著這段德英心情練跤花。
當 Mǹg-sǹg、遛穗仔、蝦仔手、害仔、三斑無請家己來，你 ē 按怎反應？
心狂火著交伊成做相拍雞仔?抑是直接 kā 𪜶當做空氣處理？
遮 ê 問題 tī 猶未接受邀請 ê 2018，我 m̄ 捌愖過，起因一搪著無佮意 ê 人，我就自動青盲兼臭耳聾。2018 kā 面冊社交湠到箍仔外，我實踐 Montesquieu➁ ê 點揬「你 tuì 家己講 ê 歹話總是 hőng 相信，好聽話煞 buē。」
這久翻頭看彼久，活活 ê 生活有一堆無請自來 ê Mǹg-sǹg、遛穗仔、蝦仔手、害仔、三斑 hōo 家己 uī 𪜶舞豬舞狗，呔討無事斡入網路繼續掠豬弄狗討齷齪？這久翻頭看 2018 正港是閒甲掠蝨母相咬 mā 閒甲煮火炭來食➂。
現此時 ê 家己翻頭看 2018 ê 掠豬弄狗，我 mā 欽佩家己面對翁愛爸母上童 ê 傳香火，我 ê 忍受力一冬無夠，遮 ê 掠豬弄狗有才調交𪜶耍兩冬，這是大細目，懸低耳抑是人生 m̄ 是馬場➃ ê 四界是挑戰，唯獨 gún 翁是一塊按我 ê 餅行過➄ ê 人？所致我有飽滇 ê 耐性交 m̄ 捌見過面 ê Mǹg-sǹg、遛穗仔、蝦仔手、害仔、三斑來往，甚至 uī 𪜶寫論文？這久翻頭愖遮 ê 往過實在是食飽換枵。
總是我 mā 感謝遮 ê 食飽換枵，無 m̄ 捌見過面 ê Mǹg-sǹg、遛穗仔、蝦仔手、害仔、三斑 ê 枵飽吵我 buē 得著等待，食一杯仔茶➅看世界 ê 智慧，像這久別人做無議量交我一屑仔齊無底代 ê 智慧。
2022 申請註銷 ê 愛料理無才調 kā 註銷 ê 冬後，除了收新聞猶是新聞 ê 電子批捅又閣收著網路 Mǹg-sǹg ê 留話 hōo 我發見我拍斷手骨顛倒勇 ê 家己，我 ê 台文愈寫愈進步，起因當我翻頭讀 2021 哭呻文，彼語句是漚搭甲免別人點揬修正，我家己先嫌交我一屑仔攏無要意網路 Mǹg-sǹg 分張 ê 芥辣醬➆。
德文俗諺形容舊 ê 無走，新 ê buē 來是「若你盤底無留菜尾，明仔載就好天」hōo 我想著囡仔時無珍惜一粒米，百粒汗序大齊講 ê「大漢嫁貓翁」，人生大細事宛然食飯盤，你 bueh 日日餾菜尾 hōo 家己食甲走腹抑是日日款新菜 hōo 家己自在跳 Tango 抑是 Walzer 齊是家己 ê 選擇。
我歪喙雞無愛熥菜尾，自然 buē 留菜尾 hōo 家己嫁貓翁，像這久舊文重熥，無需要 ê 歹銅舊銅免留做寶惜命命 m̄-koh 會使得舊枝新妝。
➀ Alles hat ein Ende, nur die Wurst zwei --- Egal
➁ Charles de Secondat, Baron de Montesquieu 孟德斯鳩
➂ Ich koche vor Wut --- 心狂火著，風火著，掠狂
➃ Leben ist kein Ponyhof --- 人生充滿挑戰
➄ Du gehst mir auf den Keks --- 煩
➅ Abwarten und Tee trinken
➆ Seinen Senf dazu geben --- 發表個人意見
➇ Wenn du deinen Teller leer isst, gibt es morgen gutes Wetter.
2022.03.11
