Ich bin zu arm, ich kündige als Hausfrau für meinen Mann.
Uī-tio̍h gún 翁，我 kā 頭路辭掉，我有夠可憐
Ich bin zu arm.我有夠可憐
Ich putze das Haus für dich immer kostenlos.
Uī 翁日日無料摒掃厝內
Ich bin zu arm.
我有夠食虧
Ich koche Mahlzeiten für dich mit Herz und kostenlos.
Uī 翁一屑仔攏無窮分 ê 日日用心款三頓
Ich bin zu arm.
我有夠克虧
Ich schlafe mit dir jeden Tag ohne charge.
逐日交你無料誠懇睏鬥陣
Ich bin zu arme, ich möchte die Bücher aus Taiwan kaufen.
我有夠散食，想 bueh 按臺灣 bué 寡冊
Das kostet nur 30Euro, und mein Mann sagt "Du musst selbst bezahlen."
冊費 30 歐圓 niā-tiānn，gún 翁 kā 我講你愛家己納數
Oh, ich bin zu arm.
哦，天公伯矣，我呔會 tsiah 食鹼
Tsa̋ng 踮 Books 揣冊 bué 冊當 bueh 算數想著這站仔 hōo gún 翁仔姐又閣熥 buē 離 ê 漚古代，気持ち buē 喨隨刁意故 tuì 翁講「借問先生，咱敢會使得請你 kā 我鬥相共一下？」
「你付臺灣 ê 冊錢，我納德國 ê 關稅」tī 我猶未開喙伊 ê 拆白已經實實櫼櫼 hōo 我食著鹼，越頭隨揤過數來消敨腹內彼葩沓沓著 ê 火。
「Gún 老母會使得透世人大大典典食翁飯，你 buē 使得」自咱交伊來往咱清楚知影咱無彼个才調 kā 規張紙畫一尊觀音，像勥母遐爾仔大面神，咱交伊自來往到結婚，一直是粗糠還粗糠，冇粟還冇粟，從來 m̄ 捌 kā 偏過，總是這敢若無蓋像翁仔姐，特別是這條數是伊主動出喙 kā 咱吩咐「你從來 m̄ 捌要求過菜錢，mā 無要求生活費 hōo 我感覺家己從來 m̄ 捌致意你 ê 需求仝款。」
我個人 m̄ 知別人按怎過龍鳳生活，總是我有家己 ê 財庫，無屬於我 ê 部份我 buē 開喙要求伊愛投資，像𪜶勥母按呢，萬事大細事齊愛𪜶老爸投資，無投資閣起呸面講伊無愛伊無照顧伊。𪜶兜勥母大大典典 kā 翁討錢飼虛華，我做 buē 夠，起因阿母有交代「查某人會使得無結婚，buē 使得無厝無錢。」
阿母無 bué 厝，m̄-koh 經濟獨立甲罕得 kā 阿爸討錢 bué 東 bué 西，特別是家己佮意 ê 物，像出門割香兼旅行，伊從來 m̄ 捌 kā 芋仔爸討報名費。
「你顧外，我顧內，按呢就有夠額」見擺 hōo 翁問，我敢有啥物想 bueh bué ê 物，我齊按呢回應，起因我 tuì 化妝、bué 新衫、換新手機仔齊無興趣，唯一有興趣 ê 代誌是 bué 冊。
Tī 我猶 m̄ 知影台語有出台文冊進前，一本新冊會使得 hōo 我食五頓大象牛排，所致我捷踅無料冊櫥揣冊轉來讀，自《落/Làu台語-瑞士ê台語社》ê 社長 A-kuan 紹介我讀《大士爺厚火氣》hōo 我發見台文這塊從來 m̄ 捌發見 ê 新天地，我就捷請博客來 kā 我鬥相共寄冊到德國，寄到我沓沓仔 m̄ 敢落單，起因運費交關稅疊起來 mā 會使得食五頓大象牛排。所致當翁無事餾粿，我就順這个願請伊鬥相共，伊 mā a̍t-sá-lih 應好，這久實實櫼櫼請伊鬥相共，伊隨反僥，像勥母仝款，前一秒講人尻川後話，後一秒講我那有講 ê 賊仔較惡人卸責任。
火愈挓愈旺，硩 tī 心肝穎 ê 彼口怨氣無消敨中氣 buē 敨，越頭準備六月蚶，粒粒臭 kā 伊臭甲烏空去，伊 mā 若發現家己總愛哭呻別人 tuì 伊毛呼龜粿粽，紅包清彩送，這久 ê 伊 mā 相𫝛，心搭甲血管去，喙卻糊瘰瘰甲爛塗 buē 糊得壁，空喙哺舌。
「我 m̄ 是刁意故按呢講....」發見家己交爸母相𫝛無出門講十分話隨 tuì 我會失禮。
我啥物攏好講話，講著錢這件代誌，我規个人隨做 Mǹg-sǹg m̄-nā 喙脣一粒珠，講話 m̄ 認輸閣鹹篤篤。
「Gún 臺灣人鳥鼠尾齊無膿，我知影，總是 gún m̄ 捌目睭掛斗概，見人物就愛，大大典典做伸手牌，自交往到渡蜜月我 m̄ 捌 hōo 伊出一仙五銀 ê 車費，這久你若嫌我死坐活食欶你 ê 血食你 ê 肉吮你 ê 骨，我會使得離開，無要緊。」
「我 m̄ 是刁意故按呢講....」清楚知影家己又閣一條索仔，拍規百个結，選擇莫加話 ê 餾粿，總是這款態度 hōo 我腹內火愈著「著啦，恁德國人講香港抗爭是龜怪 ê 時行 m̄ 是歧視，我講幾仔百遍我無才調一日食六頓是歧視恁德國人 ê 傳統，話攏你講齊著。」
聽著牽手 kā 𪜶強辯勥母無水準 ê 展風神捎出來剾洗，伊知影代誌大條矣，信用卡隨捎出來講「我講話算話，只不過捷有 ē 長短跤話 ê A -ta-mah-khòng-ku-lī，像 gún 爸母漚搭，顧人怨。」
目今是那食棺材本那手面趁食，有 ê 堅持會使得嫁雞綴雞飛，嫁狗綴狗走成就對方，特別是對方總算理解家己 ê 爸母是偌爾仔乞食攑蠓捽，假仙假觸，顧人怨。
「我無講恁爸母漚搭，顧人怨，是你講--ê」卡片收落來，喙那畫線。
「這是實事。」
「一句話三千六重，你真正 m̄ 通掠做萬項代齊有法度跟綴恁兜 ê 跤步掠做出山請醫生，猶有藥通醫」我那攄數那講。
「我 m̄ 知影敢有藥通醫，總是我清楚知影，我閣繼續承𪜶 ê 癖，我交 gún 小妹相𫝛婚結萬斗猶是無較縒。」
我無興接續這个話題，起因我 ê 人氣已經敨甲開開開，斡頭 kā 卡片 hâinn hōo 伊「我代表臺灣政府感謝恁德國人 tuì gún ê 經濟支持。」
2025.04.29 收著聚珍臺灣按臺灣寄來德國 ê 冊，想著 2021.11.28 牽手十外冬 gún 兜 ê 手曲猶原屈入無屈出，飼鳥鼠咬布袋 m̄ 管我按怎自立無倚伊食穿，猶是融溶 buē 入這个簡單屬 gún 兩个人 ê 家庭 ê 齷齪，隨斡頭巡哀傷，練跤花看彼久交這久。
2021 按臺灣徙岫到德國 ê 第 4 冬，我猶原順初初 ê 約束逐年轉去臺灣 3 月日 hōo 慣勢做十一哥 ê 翁有時間 kā 伊感受 ê 束縛敨掉自在做家己，我 mā 是。總是這款主張是孤人綿豉主意 ê 妥協(thò-hia̍p) m̄ 是雙人仝心同感 ê 結果，伊成做舊鎖枷猶未拍碎，新鎖枷又閣來添 ê 狗走豬來➀ hōo 我按算留踮臺灣莫轉來德國生活。總是，一想著別人兜 ê 死坐活食是該然，我 ê 自立是欶人血，我就 m̄ 甘願，準做這段姻緣是我主動要求。
是，是我主動要求結婚 mā 是我主動要求接續過冬鳥感情，總是人生有無仝 ê 階段 buē 使得要求人生每一个階段齊愛相仝 ê buē 使得變化。2011 hōo 我放 buē 落心 ê 阿母轉去塗州賣鴨卵，我 ê buē 閣重敧爿，隨交翁討論徙岫到德國到大細項，遮 ê 大細項按 2011 討論到 2017 無一跤貨櫃 kan-ta 一跤皮箱 ê 臺灣大細項 m̄ 捌因為暫時失業交伊是 gún 翁就愛擔我 ê 額，mā m̄ 捌因為失業，我 tī 德國 ê 萬項萬代就愛伊負責，更加 m̄ 捌規張紙畫一尊觀音，大面神大大典典 kā 伊討東討西，討無隨張隨投 hőng 知，2021.11.28 因為疫情無轉去臺灣，想 bueh 接續 ê 娛樂因為伊成做茶鈷呻我傷過自立 hōo 伊無機會惜牽手，隨攢這項 hōo 伊疼牽手，結果猶原外甥仔點燈火，一切照舅(舊) hōo 我認真愖呔討我愛按呢倔強克虧家己。
2025 翻頭看 2021 惜某疼牽手 ê 活動，無閣田螺巡舊逝，較行 mā 仝逝，這是一件好代 hōo 我想著《春光閘袂離》〈冰山下底 〉ê 這段對話「現此時愛睏柴堆試苦膽....」，「能源tī我身軀頂，能源tī我心內面；tī冰山下底過七十冬，雖然四界碰壁，毋過毋捌凍傷。」向時睏柴堆試苦膽 ê 感情路成做現此時 ê 能源，雖然四界碰壁，m̄-koh 毋捌凍傷，起因我 mā 是〈雷公摃袂死ê〉。
人生僫得圓滿，世事袂得齊全，你應該kā心情放予輕鬆，kā眼光囥予遠，毋通為著tsia-ê小可仔代誌就來齷齪。我是電公摃袂死ê，天大地大ê代誌，mā無才調擾亂我ê心情，你有啥物困難，有啥物僫排解ê心事，攏做你照實講予我知！雖然我無能為力，總是會使替你想辦法排解憂悶➁。
人生年閣無相𫝛，世事齊 buē tsiâu-tsn̂g，tī 彼段敢若看 buē 著空 ê 日子，我唯一 ê 信念就是 kā 心情放 hōo 輕鬆，kā 眼光囥 hōo 遠，相信齷齪 ê 問題有辦法 kā 伊送去焚化爐燒做烌。我是電公摃 buē 死--ê，這久翻頭看烏貓姊搪著 ê 龜鱉叨趖，我 m̄ 知影家己是按怎行過來，總是我清楚知影無平靜 ê 家己，無平靜 ê 人生，像這久無人通排解 ê 心事貧惰照鏡自我對談就照實寫踮部落格 hōo 部落格解我 ê 憂悶並引𤆬我順家己記錄 ê 跤跡看往擺交目今 ê 家己。
2025 翻頭看惜某事件，爸母囝 ê gún 翁確實有改變，無閣一成不變愛歹查埔厚同年，歹查某厚姑姨。2025 翻頭看往時 ê 家己，我實踐家己 ê 約定，別人兜 ê 代我從來 m̄ 捌插手所致 m̄ 免熱情分拆大細項，順部落格近來 ê 跤步巡田園確實無閣巡著分拆別人兜 ê 長短跤話。
頂站仔 hōo 爸母上童 kā 牽手舞甲連吐一氣大氣攏無興 ê gún 翁 mā hōo 我見著奶喙仔沓沓仔 teh 斷 ê 現象，2025 是好吉兆，我相信。另外電公摃無死 mā 無才調處理 ê 自來交葛蠻皮就學習「Tsām 薰蛇，翁姓黃某姓賴，大佗趖去覕，蛇仔走四散...」➂。
➀ 筆者 ê 感情路搪著兩斗爸母囝，一對臺灣爸母，一對德國爸母，簡單一句，交我來往 ê 對象，𪜶爸母齊佮我對沖。
➁ 〈雷公摃袂死ê〉楊逵經典台文有聲讀本《春光閘袂離》
➂ 〈斬薰蛇〉王羅蜜多仝名台語散文集
