天色是卵仁，大地發新穎
Der Himmel wie Eigelb, das Land bekommt neue Sprossen
翁仔姐那行跤花那栽跤花Wir gehen, wir gucken, wir reden
這秒 ê 家己成做頂一秒 ê 家己
Dieser Moment war letzte Moment
翁仔姐那行跤花那栽跤花
Wir bummeln, wir gucken, wir plaudern
偝仔內 ê 斯當時是 gún 翁仔姐 ê 現此時
Die Briefmarken im Rucksack waren aus BRD Zeit, aber unsere Zeit ist DE
翁仔姐那行跤花那栽跤花
Wir bummeln, wir gucken, wir plaudern
時間若水沖，一直向前沖
Die Zeit geht immer weiter
時間 mā 若流星 m̄ 捌 uī 任何人停跤
Sie bleibt nicht stehen für niemand niemals, niemals
翁仔姐那行跤花那栽跤花
Wir bummeln, wir gucken, wir plaudern
時間無留戀，四方隨个隨人去
Die Zeit, sie braucht nicht alles zu begleiten
Alle sind eine Sternschnuppe zu ihrer Zeit
翁仔姐那行跤花那栽跤花
Wir bummeln, wir gucken, wir plaudern
時間笑 gún 綿精 ê 留戀，gún 笑時間 m̄ 留戀
Wir lachen und sehen unsere Beharrlichkeit im Leben
收著電子批通知，心火隨著，我沖 ê 咖啡 buē 敆喙斗呔討好禮閣來啉一杯？我需要出去消敨這葩佬仔火。
「發生啥物代誌」聽著牽手按恬靜甲聽無蠓仔聲步頻無閒𩑾𩑾 hōo 規日交巧手機仔大麵炒圓仔，膏膏纏 ê 翁擔頭關心。
「Kā 我討個人資料做稿費過數 ê 單位，這久寫電子批講我 ê 投稿無敆𪜶 ê 風格 buē 刊登」我講。
「佬仔」翁隨講 mā 徛起身隨款家私交牽手做陣去出敨火氣。
我需要理解這葩火是 uī-tio̍h hőng 退稿 ê 譬相抑是 uī-tio̍h 個資 hőng 騙去，資料匧仔揣轉來巡，我 ê 筆尾較實無𪜶出資單位 ê 人文雅，總是𪜶 buē 使得按呢對待人，反起反倒，特別是 ka̋ng 討個資了後。
佬仔，諞仙仔，術仔，乞食攑蠓捽仔，水鬼假做城隍，假仙假觸。我若迎神放炮一路罵到田岸路，gún 翁 mā 恬靜聽我罵伊聽無 ê 語言。
「我家己 mā 愛負責任」uī 佬仔著火誠不值，大大吐一口氣後，我講。
「按怎講」翁問。
「四常來講，個資是過數 tsiah-ē 出現 ê 要求，我 ê 投稿猶未出現就愛寫清楚 ê 個資 hōo 𪜶，這用跤頭趺想 mā 知機有貓膩」我講。
「按呢 bueh 按怎，𪜶若提去烏白糝做」翁問。
「無法度按怎，唯一有法度 ê 代誌就是講我人無 tī 台灣，若是個資 hōo 𪜶烏白糝做」我講。
「凡勢𪜶照政府模式來作業」翁講。
「𪜶 m̄ 是政府單位，準做政府單位 mā 附一个個資使用交保護說明聲，𪜶啥物攏無直接要求我愛照𪜶 ê 表填資料」交翁討論這件代誌，我愈講愈受氣，m̄-koh mā 清楚知影 uī 這款代誌受氣無價值，另外這个單位若誠實出問題，警方揣著我有才調證明，我人無踮台灣。
佬仔，諞仙仔，術仔，乞食攑蠓捽仔，水鬼假做城隍，假仙假觸，kā 最後 ê 無四序擲 hōo 青蘢蘢 ê 田園，眼前 ê 白色交紺色紫草沓沓仔成做玫瑰花穎，Das macht den Kohl nicht fett，草花 buē hōo 我大箍，一想著草花交我 buē 合作 mā m̄ 捌 kā 我舞大箍過，我越頭微微仔笑對翁講「我 kā 蠓仔講甲若大象➀，草花又閣 m̄ 捌 kā 我舞大箍過➁，閣是我 ê 香腸崎➂，免要意」，gún 翁 mā 綴 leh 接句笑講「萬事總 ē 結束，kan-ta 2 支煙腸➃。」
Rosa Luxemburg 講 Freiheit ist immer die Freiheit der Andersdenkenden 別人認定 ê 自由永遠佮咱無相仝，別人認定 ê 藝術永遠佮咱無相仝，自家己行 m̄ 著箍仔閣願意行入𪜶做 ê 囮，怪 tsiâ。
巡田園翻田塗讀著栽欉 ê 新聞事件「註銷文化」hōo 我想著 2021 kā 家己按面冊註銷交按本底綿豉致意 ê 台語復振文化箍仔 kā 家己註銷 ê 代誌。
我愛台語文，不過往過參加 ê 箍仔 hōo 我感覺...well，頇顢形容就請《翻身．番身》作者劉承賢教先生頭 ê 一段話代替我形容「老實講我無食褒袂死--lah，若猶會要意欲寫、欲愛人讀，攏是為著台語！頭前講為著比賽咧寫，he uân-nā 是攔頭，咱to毋是倒咧餓，a̍h有影hiah要意hia-ê獎金，閣再講，若欲比賽，kám毋免寫予評審佮意，干干仔咱無按呢想，干干仔咱to欲寫家己愛寫--ê，欲寫家己感覺有意思--ê。」投稿進前我清楚知機家己 ê 文學氣質無符合對方 ê 氣口，不過我猶是想 bueh 投稿，起因有投稿彼若死窟仔水 ê 思路 tsiah 有機會活轉來，畢竟我十外冬 m̄ 捌講過台語。
初初骨力投稿，骨力參加台語線頂活動到今，我猶是請《翻身．番身》作者劉承賢先生話頭 ê 一段話代替我形容「毋tsiah咱自來無按算欲閣出冊，to不管咱感覺家己寫了有偌好拄偌好看（家己褒較袂臭臊），嘛是家己寫hōo家己暢--ê，極加hōo身軀邊ê搭粒--ê罔讀，看伊會呵咾--幾-句-仔袂。」
《翻身．番身》作者劉承賢先生 tī 話頭 mā 寫著「實在講，有一站仔我嘛懶屍懶屍，想講咱寫tse，看無ê人看無，看有ê人嘛無定著會看，有看ê人to也無定著看有內底ê機關.....按呢是何mih苦--leh？」我以台語文做主體 m̄ 捌搪著劉承賢先生 ê 狀況，m̄-koh 我確實因為台語文有角勢通投稿，死泉步頻成做活泉，像頂懸天色是卵仁，大地發新穎遮 ê 文字步頻開始濆水，然後我成做挖石油 ê 人挖到今。自 2021 kā 部落格轉型做台語文為主 ê 石油窟，我行過紅龜生蟲，龜怪 ê 氣持ち，搪著生份人來送罐頭，無回送罐頭 ê 我捷感覺真失禮，kā 家己按痞客邦註銷 ê 想法又閣浮起來。押尾想著現實生活我 mā 愛交生份人互相送罐頭「Hallo」一聲，這个無聊 ê 情緒叨撚隨走甲無看人，𫝛時我 mā 大大典典享受家己意愛 ê 社交「我隨意，你儘量」 。
想 bueh 寫字趁所費就愛接受魔鏡、魔鏡，世間上𠢕展筆花 ê 人是 tsiâ，囡仔時因為老師 ê Mobbing 我下願大漢開一間學校，按 kan-ta 煩惱學校大細事 ê 囡仔到萬項萬事齊愛擘腹 ê 社會人士，我理解彼是較早睏較有眠 ê 理想，像這斗 ê 經驗 mā 引𤆬我知捌投稿愛掠出版者愛 ê「氣味」像魔鏡回應白雪公主𪜶後母 ê 問題。
M̄ 管別人愛啥物氣味，部落格是我 ê 圖書館，我 ê 研究室，我 ê 文章是我主意 ê 藝術作品。
➀ Aus einer Muecke einen Elefanten machen 一隻蝨母嗙甲水牛大，一分田嗙甲幾若甲，鳥鼠空當做圓拱門，Buē 直，刣雞用牛刀，磕著就司公姨媽
➁➂➃ Das macht den Kohl nicht fett, Das ist mir Wurst wie Hüller, Alle hat ein Ende, nur die Wurst zwei, 免要緊、免要意、免顫悶
