錦荔枝的滋味 von 洪昭淑
我 tuì APP 系統無興趣，所致這个態度 mā 影響我 tuì Podcast ê 興趣，這幾日《錦荔枝的滋味》讀煞隨上網搜揣廣播劇。廣播劇有揣著，m̄-koh kan-na 揣著 Podcast，tuì APP 無興趣 ê 我隨放棄收聽，2023.01.13 又閣相𫝛 ê 透早那款早起頓那聽德國西南廣播電台放送𪜶 ê Podcast。早前，無論 Podcast 聽甲偌爾仔興趣趣原仔 buē 起心動念上網掠 Podcast ê APP，是啥物因端 ē 遮爾仔排斥(pâi-thik) APP 窮實我 mā 無啥知影，總是伊 hōo 我 ê 感覺就佮電子冊𫝛款足虛足空無意神。
13 這日電台放送按瑞士來 ê DJ BOBO hōo 我聽甲 m̄ 願按呢有頭無尾就結束，隨上網清彩拍一个往過捌看過目 m̄-koh m̄ 捌聽過 ê Podcast「亞特聊聊天」隨出現 Soundon 這个系統隨揤落去讀細節，無讀 m̄ 知影一个 Podcast 竟然有遐爾仔 tsuē ê 系統，照慣例 Google 大神引𤆬我揣著 tsiâ 我就優先使用這个系統。
檢采是我頇顢，舞規半晡 ê 結果是會使得聽卻無法度揣其他 ê 節目 tsiah 發見我愛註冊，隨照起工註冊又閣搪著問題，我 ê 密碼 m̄ 著。Ua--leh 你 mā 幫幫忙忙一下，我 ê 口座佮密碼 tsiah 拄註冊 mā tsiah 拄驗證這時呔 ē 講密碼 m̄ 著。
隨照𪜶 ê 規定閣申請一擺密碼，結果原仔是無效 -- 放棄，換來大神 ê 系統我 ê Podcast 之路就無閣綿精若《Ich bin dann mal weg》其中一段「一直 tī 路 neh 來來去去，永遠行 buē 跤到。」
因為想 bueh 收聽 DJ BOBO 完整 ê 訪問，我揣猶原 tī 面冊泅捌看過目 ê 亞特聊聊天，紲落來順亞特聊聊天 ê 跤步繼續生湠其他 ê 節目，像「台語 tsin 輾轉」 。
「台語 tsin 輾轉」mā 是猶 tī 面冊泅就捌 ê 節目，總是猶是 m̄ 知影是啥物因端，自第一斗見面到今，m̄ 捌 tuì 𪜶 ê Play 鍵起心動念過，這斗 uī-tio̍h 收聽 DJ Bobo 完整 ê 訪問，我 mā 順紲 kā 𪜶揤 Play 鍵，紲落來一集接一集聽落去，像亞特聊聊天按呢，我這个怪癖 m̄ 知敢是按遮來，無愛連續劇愛影戲，無愛電視，愛戲院。
窮實電視佮影戲 mā 無宛 2 體，總是影戲 hōo 我有法度自在選擇時間佮意愛 ê 戲齣，電視是𪜶選擇𪜶 bueh hōo 你看 ê 戲齣佮時間，像烏貓姊年間 uī-tio̍h bueh 看「流星花園」m̄ 管偌爾仔厚話偌爾仔想 bueh 佮朋友繼續喋詳攏愛趕 tī 9 點進前轉到厝 tsiah 有法度 kā 伊收藏 tsiâu-tsn̂g。
這个 tsiâu-tsn̂g mā 愛看電視台 ê 歡喜，像囡仔時愛 ê「喬琪姑娘」到今 m̄ 捌收藏完整，喬琪姑娘 ê 故事我貧惰寫，就請別人代我出聲：
APP 按裝好見著別人留話，我 mā 跟綴寫寡感想 tsiah 發見這件這件代誌，呔討有遐爾仔 tsuē 人無法度離開社群媒體 ê 因由，gún 翁就是其中一个，伊 m̄ 知影有幾組 E-mail 佮社群媒體 hōo 伊逐日無閒𩑾𩑾。
Tī 我感想寫好，發送鍵揤落去 tsiah 發見，無社群口座 ê 我 tī Podcast 世界是 Hello Kitty 有目有耳無喙，按呢 mā 好，因為這个限制直接消敨我 ê 紅龜生蟲，龜怪 ê 厚話屎。我真𠢕叨撚家己呔討 bueh 寫遮 ê 話，特別是生份人。呔討有這款性地，我想這交警總猶未離開有關係，準做我 ê 留話無啥特別，我猶原感覺伊真鑿目，像投稿上刊真歡喜，過無偌久隨感覺家己真展風神。
我 m̄ 是無自信，不過我真正無愛交人盤撋，我愛成做無聲 ê 自在，總是這是想法，畢竟我猶是平凡人，我猶有慾望想 bueh 知影家己做這件代誌 ê 竹目到第幾節。因為讀冊認捌著《錦荔枝的滋味》有出廣播劇並分張 tī Podcast 就隨跟綴「高雄廣播電台」ê 跤步一集一集仔聽，聽甲痴迷 buē 記持隔轉工愛作穡愛有眠。
第一斗認捌淑昭老師是關懷廣播電台 ê 歇熱出名人台語演講，聽淑昭老師演講進前，我 tuì 台語 ê 認捌 kan-ta 兩款，一款講甲真老 buē 咬螺絲，像鄭安住老師，一款是講甲螺絲食 buē 離像我按呢。
猶未聽淑昭老師演講進前，我掠做淑昭老師 ê 台語合該然是厝邊隔壁 ê 聲線，無疑悟代誌 m̄ 是涵空龜我想 ê 遮爾仔簡單，若講安住老師是台灣傳統戲曲 ê「末」交「生」，淑昭老師是「旦」交「生」兼「丑」。
淑昭老師 tī 關懷電台分張採訪漁民 hōo 漁業電台聽眾聽聲認人 ê 故事 hōo 我笑甲目汁㴙㴙滴 mā 想著跳 Tango ê 畫面，互相跳舞 m̄-koh 莫相看。
彼是我第一斗認捌豬哥亮、廖峻、澎澎、卓仔、天天開心主持群以外 ê 線頂台語聲調，聲線優美含深深感情。
Uī-tio̍h kā DJ BOBO「我交 gún 牽手來往進前，我問伊未來敢有按算有囡仔，伊回答 buaih，我隨感覺伊是一个值得交往 ê 對象」ê 訪問聽 hōo 煞戲，我向 Podcast 申請口座，紲落來 Schwein gehabt ➀順推薦我認捌高雄廣播電台《錦荔枝的滋味》ê Podcast。
自第一集收聽到煞戲我一直掠做廣播劇 ê 演者齊是專業表演者，押尾 tsiah 知影廣播劇 ê 聲音演員交淑昭老師無相𫝛，𪜶 ê 專業無一个是聲音表演，這 hōo 聽甲耳仔覆覆 ê 我想著人 tī 意大利 Verona 搶著尾票 ê Nabucco，現場無啥特別 ê 現代設施，表演者需要 kā 無論自來抑是後到 ê 才能敆入 Arena di Verona hōo 伊成做河溪星光閃閃 ê 暝。
收聽廣播劇《錦荔枝的滋味》ê 暝，寒人下晡 4 點 buē 到金烏泅入睏神 ê 世界，月娘天星因為雲尪 m̄ 願退，只好順伊 ê 囡仔性靜靜等待猴齊天來揣伊 ê Maserati。我一个人恬靜咂一杯燒茶交眾生旦淨末丑過新年，紲落來直接向聖誕老阿公下願「人講食魚食肉 mā 著菜佮，廣播劇聽煞 mā 愛敆紙芳。」
廣播劇 uī-tio̍h kā 文字轉做活跳跳 ê 聲音，所致伊交世間每一本以文字先出世 ê 文學相𫝛齊愛經過斷骨接枝交轉骨 ê 過程，所以當我聽廣播劇 ê 時我 tuì 各主角 ê 背景無產生任何共嗚，按聽覺轉做原汁原味 ê 紙本囡仔時 ê 記持沓沓仔轉來，特別是女主角 ê 小妹 uī-tio̍h 家境選擇去工廠做女工交搪著看起來若害仔，窮實是愛某 ê 好翁婿 ê 故事齊 hōo 我想著大我 14 歲目今轉去塗州賣鴨卵已經 21 冬 ê 大姊。因為伊放棄繼續讀冊，我這个交其他軍眷子弟無相𫝛福利 ê 囡仔 m̄-tsiah 有才調大大典典心肝放 hōo 冗 kā 5 冬 ê 私立學校順順利利讀 hōo 煞，不而過大姊 ê 姻緣路就無女主角小妹 ê 好字運，伊行 tī 卯字，人猶未倒四塊枋「小星」已經來入門。
台灣敢若意愛以「數量」來推斷市草空間，世界有 tsuē-tsuē 整體「數量」無到台灣 5% ê 角勢，屬於𪜶家己 ê 符號猶原健欉 m̄ 捌消失，比台灣加 30% 數字 ê 所在外添厝邊 ê 數量，𪜶 ê 符號 mā m̄ 捌因為遮 ê 優勢 hōo 比祖先閣較幸運 ê 人成做 Spelling Bee 甚至 hōo 以文字做食穿 ê 人有才法繼續三跤步一坎店快樂生湠。台灣人 tī 底時慣勢看外國 ê 月娘較圓較媠，低路人無才調分拆，不而過順 Hegel ê 智慧來表達，無按心肝穎接受「...這款擘腹踏差 ê 驚惶，自本就是一款錯誤➁」齊是無較縒 ê 話術妝娗。德國腓德烈大帝(Friedrich der Große) uī-tio̍h 心靈 ê 平靜，伊起造交法國皇宮無啥無宛 2 體 ê Schloss Sanssouci（忘愁宮）紲落來交代每一个人 ...., den hier mus ein jeder nach seiner Fasson Selich werden. 每一个人 tī 這个所在攏愛得著屬於家己 ê 快樂，文學 mā 是，敢 m̄ 是？呔討別人寫「閒仔話」是世界經典，台灣作家以台語文寫「親情五四三」是行 buē 出文學 ê 懸度，以華語文寫「閒仔話」就是歌德 ê Marienbad Elegy 瑪麗恩巴德輓聯(buán-liân)？
賣麵 ê 人看人撒(suah)油，西瓜倚大爿 ê 人鋪面蟶(than)，浸水蚵永遠以晶晶體來妝娗伊 ê 看 buē 上目交數想 ê 金光閃閃。
《錦荔枝的滋味》讀煞接紲踅網路揣讀本，關鍵字引𤆬我䀐著出名人分拆台語文文學 ê 市草交未來 hōo 我又閣成做一隻貓，想 bueh 按伊 ê 文字實踐 Hegel ê Was ist Wirklich ê Idealism 來正題 - 反題 - 合題，不而過我較想 bueh tuì 這段分拆講 Thomas Mann Buddenbrooks 內底 ê 這段話 Was ist das. ---- Was --- ist das..... 這是啥物，這是...啥物....，準做我揣無這段話 ê 意思 “ Je, den Düwel ook, c'est la question, ma très chère demoiselle! ➂” ê Je, den Düwel ook, 我猶是知影 Thomas Mann 正港以德語寫德文 m̄ 是以法文包裝「德文」ê 晶晶體講我是這類文學 ê 專家，像山瑞香。
華文會使得寫〈麵線婆的電影院〉➃德文會使得 kā 以英文轉譯做德文來紹介中國家族 Frau Duan feiert ein Fest ê 故事，呔討台語文 buē 使得以「閒仔話」、「家內事」按圓湠圓？
廣東目鏡隨人佮意，閱讀 mā 是，別人 ê 四序自在交我無相干，我感謝願意寫小說抑是散文 ê 台語文作家，因為𪜶我勻勻仔行向墓壙 ê 台語 m̄-tsiah 有目今 ê 機會通順順仔寫做麵線藤 m̄ 是行向《台灣人台灣事》電子報《台語‧生活》第五期這段話「Tsit-má逐家上欠缺ê就是 你ē當講出一句好ê台語，正確ê台語，若是咱有能力寫一篇文章iah是一句完整ê話，m̄免用詩ê表現來表現ê時陣，我感覺對推展台語較有幫助。」（249 【台語女性書寫】 王薈雯， 6:58）
合該然 mā 是泅 Google 海泅著 ê 訊息，淑昭老師 ê 第二本小說已經落筆，我以耐性交時間盤撋，恬靜等待淑昭老師 ê 新作品。
這 m̄ 是讀冊心得 mā m̄ 是冊評。
➀ Schwein gehabt 好字運
➁ ... dass diese Furcht zu irren schon der Irrtum selbst ist ... von G.W.F Hegel
➂ .... 這是一个問題，我上親愛 ê 小姐
➃ 《喪禮上的故事》甘耀明著
➄ Yan Ge 出世 tī 四川，交親人蹛踮都柏林
2023.05.27
