Die Weltgeschichte ist der Fortschritt im Bewusstein der Freiheit
世界歷史是自由意識 ê 進步
Georg Wilhelm Friedrich Hegel聽《台灣人台灣事》230〈台語書裡的地景〉hōo 我心擽擽想 bueh 寄張電子批交 Hena Ma 賢仔媽分張《Thá-kheh》佮《一桶蚵仔》這兩卷冊，總是免用跤頭趺想 mā 清楚知影家己 ê 文筆是豬屎籃仔 kan-ta 有才調 tī 家己 ê 同溫層 tī 屬於我家己獨一無二 ê 部落格交家己 hâm 讀無四角字 ê 翁婿比並。
「Podcast 主持人請逐家分張有意愛 ê 冊，我想 bueh 分張這兩本冊」翁某做陣食早起頓，那看日鬚沓沓仔行入窗仔門 mā 那看受 S-Bahn 擴建需要換路線來 gún 遮揣出路 ê 人潮交車流，帶 hōo gún 啥物感想，畢竟前一段 ê Umleitung 車輛改道有居民掛白布抗議，生份人 ê 借過 ē 損害𪜶 ê 生活品質。
「這是一个好主意」翁喙那講那食 mā 那記錄見著這个生份人。
「是一个好主意，不而過我無彼个才調寫讀冊心得，所致 Das Schicksal wollte es nicht so」我甜甜仔笑應。
「Das ist in der Tat ein Wiederspruch in sich」翁 buē-su 去 hőng 點著笑穴，笑甲險險 hōo 喙內 ê 食物哽著。
翁仔姐有緣千里來相會決定有伊 ê 理由，gún-ê 個性是天佮地 ê 差別，不而過一講著囡仔時 ê「讀書心得報告」齊有相𫝛 ê 記持。讀書心得 m̄ 是屬於個人 ê 眼界，呔討愛有一个氣味，老師意愛 ê 氣味，若寫論文報告 ê 氣味？
囡仔時我捷感覺家己是笨甲 buē 扒癢 ê 囡仔，出社會跟綴世事這河泅過去彼河，我漸漸理解水這个看起來相𫝛 ê 物體，伊從來 m̄ 捌相𫝛，唯一 ê 相𫝛是咱人類 ê 向望。聖經講按著定命，人人皆有死，死後且有審判。我無確定死後敢有審判交輪迴，總是我接受家己 ê 定命無想 bueh 幔別人 ê 追求別人意愛 ê 眼光，抑是假扮家己是正港 ê 金髮美女。
我佮意 Hena 媽分張 ê 少少人收聽 ê 閱讀 Podcast，按呢我就繼續成做彼个少少 ê 收聽者就好，莫 kā 無一絲仔重點攏無 ê 閱讀心得寄 hōo Hena 媽造成伊 ê 困擾。
Das Schicksal wollte es so 運命愛伊就是按呢生，伊自然 ē 交 Hena 媽相拄搪 hōo 伊成做一篇有畫面閣有質感 ê 閱讀 Podcast 紲落來引𤆬讀者行入家己從來 m̄ 捌有 ê 感觸，像廖玉蕙老師 ê《彼年春天》。
世界歷史是自由意識 ê 進步，人類社會 ê 進步是經過算 buē 清 ê 正題 - 反題 - 合題然後繼續正反循環。陳老師 ê 成長年閣交我無相𫝛，不而過人類 ê 故事是按這个圓湠到彼个圓，我《灶雞仔》ê 〈灶雞仔〉主角泅入囡仔時 ê 記持，因為戰亂不得離開家鄉，紲落來連成做人類上基本 ê 需求 mā 因為彼个年閣 ê 限制 hōo 人性存在 ê 理性褪甲賰生理需求 ê 只求代代生湠 ê 人間流星。
阿麗是軍官 ê 查某囡仔，因為食膏仔(強力膠)食甲美人變巫婆，囡仔一个一个生 mā 一个一个送 hōo 人抑是一出世就死亡，遮 ê 流星 m̄ 捌伊 ê 阿爸，因為伊 ê 阿母 mā m̄ 知影𪜶 ê 老爸是佗一位臨時臨曜好心 kā 收留 ê 人。
阿麗 ê 小弟無食毒，不而過因為若《Thá-kheh》ê 少年故事，無到二十歲 mā 行入灶雞仔 ê 恬靜世界。
阿麗 ê 故事看起來交陳正雄老師 ê 囡仔伴灶雞仔一屑仔攏無相干，窮實攏是彼个年代 ê 哀傷。阿麗𪜶姊弟從來 m̄ 捌 uī-tio̍h 階級莫名其妙 hőng 認定只要是遮 ê 階級所教出來 ê 囡仔 m̄ 是刣人放火就是去暗間仔 ê 歧視，也 m̄ 捌 uī-tio̍h 人兩跤，錢四跤擘腹後一頓 ê 菜錢愛按佗落生，呔討人生 ē 行到這个階段？囡仔人有耳無喙，囡仔時跟綴大人 ê 想法為認為阿麗押尾 hōo 車厄𤆬走是好事，大漢認為阿麗 ê 家庭凡勢 mā 有灶雞仔芋仔爸 uī-tio̍h 生理基本交情感寄託 ê 需求。
〈師生〉「...有夠狡怪！比共產黨閣較可惡...」hōo 我想著人講媠䆀無精差，有人緣較有差。無班導緣 ê 我是師生這段 ê 砉蟲、敗類，一搪著「業績」需求，我隨升級做金含「恁老爸是車輪黨無你加入車輪黨按呢敢好？」，我 ê 學生生活過了無快樂，不而過猶是有快樂 ê 日子，現此時 ê 外語基礎無搪著若師生 ê 主角陳文平，我這啥物攏頇顢 ê 人合該然 buē 發覺家己有淡薄仔語言天份 mā 佮意這个天份。
〈選舉 ê 故事〉想著囡仔時特別 ê 選舉文化 hōo 我認為投 tsiâ 攏相𫝛 ê 態度 mā 想著平常時 buē 來探望因為中風倒 tī 眠床 ê 芋仔爸 ê 彼篷人 tuì 伊 ê 關心交我 ê 攀親掛故 hâm 大姊 ê 同學 uī-tio̍h 小小里長選舉 mā 行過交春福仔 bueh 相𫝛 ê 經驗，只不過伊較無春福仔運途行 tī 卯字「去予人摃斷兩支跤骨、擲佇便所。」
〈管區--ê〉雷公義老先生 ê 故事，是我囡仔時五湖四海之人因為世局齊 tī 這塊島嶼生湠 ê 一部份，阿國仔總算良心發現 ，「正式開放大陸探親」，阿爸阿母阿姊無踮厝，下課就去𪜶兜食饅頭做伙看京劇 ê 山東阿爸包袱仔款款 leh 以無某無猴轉去老厝過伊上押尾 ê 日子，我 ê 芋仔爸交管-區--ê 相𫝛，台灣囡孫某囝齊叫轉來翕全家福，大包細包、歡歡喜喜，倒轉去揣伊離開幾十冬，無見面 ê 故鄉佮親人 hâm 留踮匪區交 gún 阿母 bueh 仝歲 ê 查某囝。芋仔爸交管-區--ê 無相仝，伊轉去生活齊一月日，轉來台灣 mā 清楚知影我交二姊 ē 偷偷仔 kā 寫 hōo 伊討親情 ê 草紙囊仔提去燒掉，這件公開 ê 秘密到伊永遠歇踮人生半路 tsiah 成做家鄉 ê 島嶼，伊攏無出一聲嗽過。
芋仔爸 bueh 轉去進前，阿母驚伊交別 ê 兵仔翁婿相𫝛一去 buaih 轉來，交代 gún 姊妹仔家己愛較巴結過日子，想 buē 到阿爸按省會首都騎馬搬兩粒山頭轉去日思夜夢 ê 家鄉，連查某囝 mā 成做上親 ê 生份人 kā 伊當做金庫，伊想 bueh 結束轉來台灣，總是自來 ê 血緣鏨 buē 掉交 tuì uī 伊受苦 ê 親人有迒 buē 過 ê 對不住，就隨眾人意管待伊敢誠實是親情，只要有要求就小小倒相共，畢竟金庫有限，爸母墓曠愛翻新，時間到轉來台灣，就此無閣過去中國，不而過出資 hōo 阿母綴團去伊出世 ê 國土行踏閣出資 hōo 阿母做一軀新衫去遊伊故鄉 ê 隔壁省。
我 ê 阿爸、阿母兩位阿姊現此時攏蹛仝一位，厝內三位囡仔台語講甲上無輾轉 ê 我這久翻頭想我 ê 口音敢是食著芋仔爸 ê 喙瀾，像舐這个音我揣無 gún 兜慣勢 ê 講法，凡勢 gún 兜 ê 台語，特別是我 ê 台語已經透濫著芋仔爸交管-區--ê 鵝仔講做蚵仔，相 tsim 走對相 tsing，西瓜變做死瓜，拜神成做敗腎。現此時 ê 人認為雙語甚至多語言 ē 造成囡仔 ê 學習困擾，我斟酌翻頭看囡仔時我從來 m̄ 捌有這个困擾，甚至受惠多語 ê 致蔭 tī KK 音標學 buē 好 ê 年代，豐沛 ê 多語成做我 ê 音標，雖罔我 kan-ta ē 曉一个系統，彼就是四角字，不而過我清楚標明這是倚台語音，這倚客語音，這倚小鳳阿母 ê Paiwan 抑是農伯伯牽手 ê Amis。
我無愛外甥仔點燈火，一切照舊 mā 無愛田螺循舊逝，較行 mā 仝逝，猶是愛寫這 m̄ 是讀冊心得 mā m̄ 是冊評，這只是一篇筆者跟綴陳正雄老師 ê 小說光景行入家己 ê 人生光景 ê 心行尞來記錄 In diesem Blog glaube ich an Magie tī 這个部落格我相信神奇。
