《彼年春天》von 廖玉蕙：閱讀台文 ê 好讀本

彼年春天 廖玉蕙

我是低路青 tuì 作者無一个印象，準做作者上熱 ê 年間 mā 拄拄好是我一日愛讀三份報紙上骨力 ê 年歲。

逐禮拜日 ê 透早，教堂 ê 鐘仔聲 tī 8 點呼逐家上教堂做禮拜，敆我喙斗 ê 電台 mā tī 𫝛時放送教堂禮拜，屬世俗人 ê 我 tī 音樂這條路是田螺循舊逝，較行 mā 仝逝無法度換台收聽十條歌有九條是弄舌 ê 電台就 kā 意愛 ê Podcast 會合 tī 這个時間做伙收聽，Hena Ma ê 聲音就此成做人 tī 厝做禮拜 ê 儀式之一。特別強調「之一」決定表示有之二交之二 hām 之四。

2025.5 月聽《台灣人台灣事》第 338 集廖玉蕙《彼年春天》我順 Hena Ma ê 聲音泅轉去閱讀感受。我 tuì 這本散文集 ê 感受猶是焦甲若門埕 ê Bach（溪流）聽 buē 出 Air on the G String，呔討按呢生？聽 buē 出 Bach ê 變化 敢是因為伊按華文轉過來？起因 m̄ 捌讀過 ê《愛母語，毋是愛選舉》329 集就 hōo 我跟綴 Hena Ma 媽 ê 聲音行入李江却台語文教基金會執行長陳豐惠老師 ê 故事，特別是傳後嗣這件代 hōo 那抐鼎那聽故事 ê 我聽甲耳空覆覆。334 請聚珍臺灣 kā 我鬥揣冊，押尾猶是花缽仔種菜：無緣 ê 柳清亮《批字紩出飛絲》mā 是聽甲相𫝛 ê 感受，呔討這本 hōo 文青褒嗦講意愛台語文學 ê 朋友決定愛收集 ê 台語散文集 hōo 我一絲仔情緒齊無？Keine Ahnung ê 歸類讀冊 mā 愛有冊緣，交廖玉蕙老師𫝛款按華文轉台文 ê 劉靜娟老師，伊寫 ê《驚驚袂著等》交 《落西北的下晡》hōo 我 tī 部落格展博士博 ê 時捷想著伊，像記錄 bué 番薯搪著 ê 故事隨想著〈番薯遮爾仔無人緣〉，㨨挐氅氅 ê 過了代想著〈見著表姊妹〉，𫝛款 ê 華文作家 tī 人生行到七八十轉台文書寫，一个文字活跳跳 hōo 我自動切換做影片讀，一个是若人 tī 剃頭店反雜誌，反過隨 buē 記，呔討按呢生？ Keine Ahnung，不而過會使得確定 ê 代誌是文字交語言一直是馬花糋，準做你 kā 手術 hōo 伊成做無仝人，𪜶猶原是雙生仔。

低路人頇顢講閣大舌興喋，所致文字敲到遮猶原愛寫這段「這 m̄ 是讀冊心得，更加 m̄ 是冊評，伊 kan-ta 是一篇挽瓜揫藤呔討按呢生 ê 閱讀行跤花。」

作者廖玉蕙老師是台中潭子人火車經過 ê 鄉鎮，我 ê 阿媽是永靖人 mā 是火車 ē 經過 ê 所在，作者 tī〈火車行過的時〉談著家己 ê 阿姊 tī 觀光號服務擲薪水袋 ê 故事 hōo 我想著囡仔時交阿母坐火車經過永靖 mā-ē 做 ê 代誌，阿母 kā 大舅交代 ê 物件包好勢按車窗擲 hōo 人 tī 月台等火車 ê 阿舅，紲落來敲電話去二水投阿母見轉來 kan-ta 愛去二水無愛來永靖。窮實 m̄ 是阿母無愛轉去故鄉，是囡仔無愛去白汫無素閣有釣假跤 ê 永靖。

作者 tī 𫝛一篇文章 mā 寫著車厄 ê 故事，厝內親情我愛稱呼阿婆 ê 聽講是阿公表兄 ê 牽手少年 buē 堪得環境艱苦選擇挵火車自殺，不而過天公伯認為伊 ê 歲數猶未到所致 hōo 伊斷一支跤腿活到 89 歲。囡仔時轉去永靖阿婆上愛牽我 ê 手去伊 ê 灶跤食伊炊 ê 粿。阿婆 ê 厝是一間灶跤敆食飯廳，食飯廳 ê 隔壁就是阿婆 ê 睏房。阿婆牽我入門，第一件代誌就是 kā 假跤提落來掛 tī 睏房，紲落來攑拐仔一拐一拐去鼎提粿 hōo 我食，我那食粿那看阿婆按有跤變無跤，定定食甲目屎含 tī 目墘，這久想起來 m̄ 知影 ê 人凡勢掠做我食甲傷滿意。不而過，論真講阿婆炊 ê 粿正港是我目今食過上好食 ê 粿。〈火車行過的時〉合該是這本冊 hōo 我上有印象 ê 部份。

這本散文集有記錄按佗一本冊來，像〈火車行過的時〉是《今生緣會》(圓神，1987)，順這个跤跡我 mā 巡家己 ê 閱讀慣勢，四常有原文通讀我 ē 特別揣來讀一回，這久 buē 專工揣冊來餾交人目今 tī 德國僫 kā 冊揣來熥無關係，是我到今猶原㨨一絲膨紗線，呔討冊讀煞 Podcast 紹介 mā 聽過，猶原無見水泱 tī 水面 mā 感受 buē 著文字 ê 聲音，像 Hena Ma ê 分張？

智識青年交文藝青年果真 m̄ 是人人通做，不而過我接受家己幸福 ê 頇顢。