讀《拋荒的故事》第四輯，讀著「草囷/Tsháu-khûn」 hōo 我想著逐年熱人攏 teh 看 ê 麥稿，德文號做啥？
是--lah，buē 用就 buē 要意德文佮英文語辭愛按怎講閣較免講台語。不過，我是連華語 mā m̄ 知 bueh 按怎講。今若 m̄ 是 tī 拋荒的故事讀著草囷兩字，我 mā buē 好奇其他 ê 講法。
「親愛 ê George，我敢...」話猶未講甲畫圓箍仔(Punkte)，gún 翁隨紲喙講「我 ē 想辦法鬥相共。」是--lah，George 是 gún-ê 暗號，我 mā kan-ta 有要事請教喙 tsiah-ē 遮爾仔甜 kā 伊叫 George Clooney。「彼號德語 ê Großer Poo 按怎講」我 kā 進前行尞翕 ê 相片提 hōo 伊看。
「彼就號做 POO POO」聽伊按呢講我隨送伊反白睚(kâinn)「我是德國人總是我 m̄ 是作穡人用 buē 著遮 ê 辭自然 buē 曉」伊笑應。
「POO POO」是我見著遮 ê 作穡人收冬後 ē 駛一台車，彼台車就若狗仔 tī 揣所在擲糞埽 ê 畫面，我就 kā 伊號做 POO POO。
「不而過，這久 ê 我正港愛去 POO POO」翁隨斡頭傱去便所 FKK (解放身體自由)。
Poo Poo ê 台語按陳明仁老師 ê 短篇小說已經得著答案，德文掠日出門搪著作穡人 tsiah kā 𪜶請教，曷華語按怎講？請教 Allwissend Google？我這个年間世界頭十名 ê 軍隊語德語都捎無摠是 bueh 按怎揣華語？
抓一下仔癢，挲一下仔鼻，我想著矣，教部育台語辭典，以草囷請教伊 ê 華語，教典隨賜我智慧生。
- 草囷：農家在屋外空地堆疊成的乾稻草堆。約一兩層樓高，通常是底圓上尖的涼亭狀，可隨時抽取一些乾草來做薪火、飼料、覆蓋菜畦等用途。
- 稻草堆：稻草束。紮成一捆的稻草。
原來𪜶號做「稻草堆」交「稻草束」，現學現賣「牧草束」、「牧草堆」，萬事通 Google 引𤆬我讀「牧草球堆滿草原，走馬瀨農場奇景」，Ach so 台灣 ê 華文照 Google 資料庫來讀 mā 猶無一个固定講法，中國就較統一多數號做「牧草堆」。
好玄宛然鳥仔見著麭幼仔，一粒一粒綴 leh 食甲盡頭，我台語按草囷生湠到「稻草囷」、「草垺/pû」、「草棚」、「草堆」，華語 mā 揣著「牧草堆」、「牧草球」現此時交逐年齊愛相借問 ê Poo Poo 呔會使按呢以鉛粉掖無夠額 kā 準過。當我準備以日文 ê 干し草請教維基百科，種芋仔種出心得 ê 步頻隔門大聲喝「Heuballen」，我順伊 ê 辭請教 Google。
「Google 講無這个物件。」
「H.e.u dann mit Ballen zusammen」翁應。
「你講 Hoi。」
「我確實講 Hoi。」
「無 U 底時變調做 I 抑是 Y。」
「你愛問選擇這个軍隊語 ê 人」向時 m̄ 承認家己 ê 爸母 tshan-tshiūnn 日本時代一部份 ê 台灣人以 buē 曉講家己話驕傲 ê 伊，知機按怎好好回答牽手 ê 疑問。
順翁 ê 調整重新請教萬事通 Google，這斗出現 Heuballen mā 出現正港 ê「Hei」不而過這个「Hei」是英語「Hay Bale」。
2023 上北波羅的海三國交芬蘭 tī 波蘭 ê 田庄搪著「Poo Poo」想 bueh 大聲講我學習 ê 新辭，人順麥稿芳踅一大輾轉來車頂，Poo Poo 台語按怎講我猶想 buē 起來，gún 翁 mā 想無德語，兩人大聲吐一口氣講「無屬家己生活箍仔 ê 物，準做講甲老 ê 語言猶原生張。」當我開始沈落深深 ê 烏暗深坑，罵家己遮笨桶，我想著人已經回歸天家交 Oma 相見 ê Opa Stoll「外國人願意講咱 ê 語言，比 Sie 佮 Du 較重要。」每一个語辭按生份沓沓仔成做慣勢，Poo Poo 自本就交我 ê 生活箍仔無相干，一時記持 buaih 食餌是四常 m̄ 免若 Mn̂g-sng tuì 家己情緒叨撚。人生有 tsuē-tsuē 上熟似 ê 生份需要時間交緣份像〈山城聽古〉這段「藝術是用來生活--ê，m̄ 是商品，che 是我所 m̄ 捌想--過 ê tāi-chì。離開埔里 ê 時，有落 sap-á 雨，kui 個山城罩 tī 濛霧內底，看--起來就是 1 幅畫，我是 uì 畫內面走--出來 ê，畫外口 ê 世界實在是單調 koh 無味。」
草囷抑是草垺 m̄ 是 m̄ 捌出現 tī 我 ê 生活箍仔，囡仔時轉去阿媽兜，門一拍開就是田，彼塊 hōo 屘姨偷偷仔提去當掉 ê 田，伊 ê 景緻從來 m̄ 捌固定過，像我 tuì 伊 ê 注目。攪擾心緒 ê 妖魔鬼怪除了社會合群要求猶有家己驚綴人 buē 著 ê 見笑。
過去 ê 心不可得，現在 ê 心不可得，未來 ê 心不可得，啥物攏不可得 ê 行向空，呔討我愛遮爾仔計較遮 ê 空？呔討我 buaih 去享受這个成住壞空 ê 過程？
這久 ê 草囷成做空，成做歷史 ê 草囷 ē 跟綴 Hegel 分張 ê 智慧 Die Weltgeschichte ist der Fortschritt im Bewusstein der Freiheit 世界歷史是自由意識 ê 進步，我小小宇宙 ê 爆炸閣形成是記持 ê 疊磚仔交冒險。
這 m̄ 是讀冊心得 mā m̄ 是冊評，以上。
