話唔記得有冇同你講過，我有一個下屬喺女中醫，女拔萃出生，下巴生喺個頭頂到。表面上講嘢正正常常，但你感覺到佢嘅氣場，語氣，眼神一直都係鄙視緊你，覺得你低佢一等。
呢嗰感覺我問左大概5，6個同事，有高級過佢，有低級過佢，大家都同我感覺一致。甚至我個衣冠禽獸阿叔老細，都係擺到明好憎佢，直頭覺得佢奸。成個辦公室，佢淨係對張醫生同我大姐殷勤親切，其他人佢都係眼尾都唔望。
有一日我放假，佢趁我不在，當眾笑我放咗喺我枱頭幾個XO仔文具擺設，係老人家先至會鍾意。咁衣冠禽獸老細呢，佢應該都真係鍾意我，如果唔係都唔會想拖著手啦，事後就通風報信，話返俾我聽呢件事，同埋已經幫我出左一啖氣，就話叮噹仲咪仲老，咪仲有咁多人鍾意。
我真係想澄清，hello kitty1974 出世，xo仔 喺1993先出世，佢好後生。
當眾比人侮辱恥笑時，我好想擁有反擊已不失禮嘅能力。
