老母閣開始踏針車

「來！車好矣！提轉去予恁小姐試看覓！試看有佮意無！」

鴻昌看著老母猶閣開始踏針車，心肝頭一陣歡喜一直溢起來。這擺生日禮物送了有合老母的意矣！

針車是鴻昌細漢的時尚媠的記持。鴻昌猶閣小可仔會記得，自從伊會曉家己食飯開始，怹兜規傢伙仔就是圍佇針車邊食飯。暗時老母仔會𤆬怹兄弟仔去共手洗清氣，叫怹兄弟仔乖乖矣坐佇針車邊，怹家己的椅頭仔，共怹小弟仔恬恬矣耍，等怹老歲仔轉來，伊才家己去炒菜煮飯。

彼時陣怹老歲仔佇駛『トラック』，逐次歇睏轉來的時陣，老歲仔的身軀攏有無仝款的味。有時陣足早就轉來，伊的身軀干焦有薰味共『トラック』味，鼻起來芳芳。啥物是『トラック』味？較早的車沒冷氣，若熱天駛車，著愛共窗仔門絞下來通風，車內才袂燒滾滾。但是有一好就無兩好，外口的烏煙，嘛會飛來車內底，共駛車的人薰甲規身軀，親像『トラック』駛過去仝款的烏煙味。怹老歲仔有當時會紮餅，曷是紮糖仔轉來予鴻昌共怹小弟食。老歲仔閣會共怹那食那耍，等老母捧菜來針車頂，才做伙食飯。彼个暗頓規傢伙仔就會使足快活食完。鴻昌感覺足好食，攏加食一碗。

鴻昌小學的時陣，開始會曉寫課題，若是下晡轉來，老母仔猶閣佇做工課，共人改衫，鴻昌就會使共簿仔囥佇老母仔掀起來的針車蓋，那寫功課，那共老母仔講學校內底的代誌。有當時鴻昌會那寫功課，無講話，干焦偷看怹老母佇踏針車。聽著針綴著針車輪仔那車那緊，鴻昌嘛會那寫那緊，課題真緊就會寫完。有當時鴻昌若共小弟仔做伙寫課題，老母仔閣會歇睏，去灶跤煎麵粉粿，沖蜜茶，予怹兄弟仔做點心。到這馬想起來，鴻昌喙內底若親像猶有麵粉粿的芳味，共蜜茶的甜味。

後來鴻昌愈來愈大漢，怹兜搬去較大間个厝，房間較濟間，厝嘛較新較媠。鴻昌怹老母仔感覺佇針車頂食飯，若人客來，實在傷歹看。就拜託老歲仔予怹去買一塊較媠的飯桌仔。彼塊飯桌仔，鴻昌猶閣會記得，是共怹老母做伙去搬轉來矣。而且彼時陣，鴻昌共怹老母仔攏較無一百五十公分，有法度共飯桌仔對街仔寬寬仔扛轉來，這對細漢的母仔囝，真正有夠厲害。

為著厝內底經濟，鴻昌怹老母開始去外口工廠上班，共人車外銷的領帶。怹兄弟仔嘛開始去讀較遠的學校，攏無佇厝內底食飯矣。干焦假日才會使佇新的飯桌仔頂食飯開講。彼隻針車煞予老母仔捒去囥佇客廳角仔，恬恬矣徛踮遐。拄著若有人拜託老母欲改衫補褲，才會捒出來做工課。

有時陣老歲仔會足晏才轉來，伊的身軀有薰味，猶閣有足臭足臭的酒味。若是彼工老歲仔有酒味，鴻昌怹兜就慘矣。有當時老歲仔若隨去睏，怹就足歡喜，會使恬恬矣共飯食予完。有當時老歲仔轉來若看著怹規傢伙仔無等伊，已經吃飽收好，老歲仔就會足大聲喝，那喝那譙。譙外口的人，譙伊佇外口拄著的代誌；講伊做工足艱苦，無閒通好好矣食一頓飯，無閒通好走便所。老歲仔若閣夯性地，猶會叫鴻昌罰站，叫鴻昌徛予好，袂使振動，袂使講話；閣會喝怹老母，譙怹老母。老母仔若看到鴻昌怹兄弟仔驚甲慄慄掣，怹老母仔就會偷偷矣叫鴻昌怹兄弟仔爬起去眠床頂，共被蓋予好，蓋予暗暗，會當誠緊就睏去。閣有一擺，鴻昌怹兄弟仔驚甲共老母仔攬做伙掣，掣甲老歲仔去睏猶閣咧掣。鴻昌有當時會看到老母仔毋敢哭，覕佇灶跤偷偷矣流目屎。鴻昌的印象，是有誠濟暗攏按呢就了去矣。

鴻昌怹老歲仔共老母仔那拍那譙，那譙那拍，拍三四十年。到鴻昌娶某生囝，猶閣佇拍，猶閣佇譙。一直到頂幾年，老歲仔年歲到矣，袂使閣駛營業車矣，才開始歇睏，就是人講矣退休啦。實在是年歲嘛有矣，體力較䆀，較袂夯性地，就袂閣拍怹老母矣。毋過老歲仔歇佇厝內底，嘛是坐袂牢，一工到暗出去揣老朋友開講，揣燒酒伴啉酒，轉來到厝猶閣是那喝那譙。有當時閣會啉到無才調家己轉來，閣敲電話轉去叫怹老母仔坐計程仔去接老歲仔轉來。

「你去鴻昌仔遐蹛啦！我免你啦！我家己煮家己食啦！」

有一站時間，老歲仔煞共老母仔趕出去。一絲仔共老母仔趕來鴻昌怹遐蹛，一絲仔閣連鞭來載轉去，講伊袂曉提藥仔，欲拜託怹老母仔共伊鬥提藥仔。閣有一擺，講怹遐老里長選情䆀，欲拜託怹老母轉去投票投予老里長。像按呢，不管載去是投票猶是載去提藥仔，攏是載去連鞭閣載轉來鴻昌怹兜，伊才閣家己駛轉去，連暗頓攏無佇鴻昌怹兜食。老歲仔一點矣攏袂輸少年的，若親像伊家己少年的時陣佇走車仝款，一逝路來回七八點鐘，老歲仔若親像走袂忝，猶閣會使一工走兩逝。但是鴻昌怹老母仔腰脊骨就愈來愈堪袂去矣，無法度一逝路坐兩三點鐘攏無歇睏。毋過疼甲欲死，嘛毋敢拜託老歲仔稍歇睏矣。

有當時老歲仔揣無理由，就一直敲電話揣怹老母，若親像佇共老母仔查勤。若老母仔已經出去行路散步運動，無接著電話，老歲仔竟然會專工拚一逝來譙怹老母，問老母仔是按怎攏毋接伊的電話，害老母仔驚甲攏毋敢出去。老歲仔愈來愈番顛。鴻昌怹老母身體煞愈來愈堪袂牢。

目一𥍉，鴻昌怹老母搬出去家己蹛，已經兩年矣。

兩年來，鴻昌不時煩惱老母仔家己蹛，毋知伊食會好勢，睏會好勢無。逐工若是拄著鴻昌欲下班的時，就是鴻昌開始煩惱的時。

「欲去共老母做伙食暗頓無？」

「曷無，捾便當去共伊做伙食好矣……」

兩年前，老母仔予老歲仔亂甲擋袂牢，一工早起，出去煞無閣轉去。干焦留一張紙條仔，講伊身體堪袂去矣，決定欲出去家己住，無愛閣予老歲仔亂。叫鴻昌毋免揣伊，伊若安排好勢，伊就會轉來揣鴻昌，叫鴻昌放心。猶閣交代，若是老歲仔來亂，叫鴻昌較忍耐咧，毋通共老歲仔起衝突。真正予老母仔料甲準準，老歲仔來揣無怹某，開始亂怹囝拄數，對厝內底亂到厝外口，佇辦公室外口拍鴻昌，拍到警察來處理。到尾仔，老歲仔實在是老矣，無氣力矣，足久毋捌閣來亂鴻昌。鴻昌才敢去共老母仔參詳，接老母仔轉來。

鴻昌怹規傢伙仔真正予怹老歲仔驚了有落底，轉來以後怹老母也是驚閣拄著老歲仔，驚老歲仔毋知欲閣舞啥物出頭。想想矣曷閣是毋敢蹛鴻昌怹兜，拜託鴻昌偷偷矣共伊佇怹兜外口附近稅一間套房，予伊覕佇遐，予伊家己住。兩年來，老母仔都家己煮，家己食，家己睏。干焦拄著厝的水電問題，才會叫鴻昌去鬥處理。連有當時鴻昌怹大漢查某囝對台北轉來，想欲去找阿媽作伙食飯，請阿媽食較好料的，老母仔都驚東驚西，驚佇路仔拄著老歲仔，予老歲仔夯狂起跤動手，毋敢去，也叫鴻昌莫去。

頂年老母仔生日，已經是伊第三擺家己過生日矣。鴻昌千想萬想，想欲利用送生日禮物的機會，予老母仔較快活矣，免驚東驚西；袂規工攏覕佇房間裡底看電視，攏毋敢出門。

鴻昌想到彼隻凡勢已經牽蜘蛛網的針車。彼隻已經無機會閣看到的針車。自從老母離開，離開彼間伊無閒了規世人，彼間伊用心計較、用心維護的兜；彼隻藏佇客廳，袂當閣轉去踏，轉去共人改衫的針車，嘛閣再拄未著怹頭家娘。

「足簡單，閣買一隻矣。」

鴻昌想規晡，去予伊想到，閣買一隻就會使矣。若掠來予老母仔踏𨑨迌，車一寡生活中用會著的物仔，親像『かばん』曷是鉛筆包仔，攏是這馬足流行的。用北京語講就是「手工藝達人」啦，加減消磨一寡仔老母的驚嚇。雖然無通好買到仝款的針車，欲揣遐爾老的針車也揣無。毋過老母仔遐爾熟識針車，拄著啥物代誌老母仔閣攏家己想辦法，伊一定有法度共針車舞甲會曉啦。

鴻昌去揣著一隻看起來足新，足媠的舊針車。是按怎欲揣舊針車？因為新式的針車，功能傷好，凡勢老母用袂校手，欲閣賣就較無彩。雖然針車是舊的，其實是一个小姐買來用無外久的中古機器。這馬功能真進步，猶閣會使接電腦，已經毋是較早簡單的機械矣。本來小姐是欲買來欲繼續練習，伊較早猶閣佇讀冊的時陣，學校老師教的工夫。想袂到尾仔，公司工課愈來愈無閒，足無時間通好練習，才想欲賣賣矣，較袂拍損。彼隻針車真好運，拄著鴻昌怹老母這款會曉照顧機器的老師傅。

「阿母，這隻針車真巧喔，較早愛兩三隻機器才車會出來的花，這隻伊家己一隻就車會出來矣，這馬你歇睏了，會使掠來踏𨑨迌。祝你生日快樂。」

彼隻針車買來，鴻昌歡歡喜喜共規隻針車整理甲像新的仝款，專工佇老母生日彼工，共針車掠去鬥予好勢，閣共老母做伙掀說明書，做伙研究，共規隻針車研究徹底，試用一擺。才共老母說欲做伊个生日禮物。老母雖然看起來真歡喜，嘛有試車伊寡物件，毋過歡喜一工就過去矣。

「無彩遐的錢。毋著愛攢予囝仔讀冊，掠去還頂手啦。」

「針車踏規世代人矣，恁若買新衫新褲，閣會使提來我共恁改，。這馬欲閣叫我踏，叫我研究，沒氣力矣啦。」

老母仔若親像真無興趣，雖然無當面拒絕鴻昌，毋過看會出老母仔無啥興趣。畢竟伊踏了規世人，本來是伊做工課的家私，這馬煞提來要做生日禮物。是欲叫伊這个老婆仔閣做工乎？

新針車囥佇怹老母仔遐，按呢閣囥佇欲規半年。鴻昌有當時提褲去予伊改，伊閣欲去踏，毋過若共褲改好，伊就閣共針車隨收起來。有當時提布去，予老母試看覓，想欲鼓勵伊加減振動。但是毋管提啥物去予老母仔試，老母仔若親像一點矣攏無想欲踏針車。有一工，鴻昌怹某靜芳，閣提一張手畫的版仔去，想欲鼓勵怹大家閣試看覓。

彼是一個銀角仔袋仔个版仔。日本人畫的版仔，攏囥佇網路頂懸一個網站，予人免費使用。鴻昌怹某靜芳佇電腦頂懸看到，就共布版仔印出來。想講凡勢大家是無圖通好參考，才會攏無興趣耍針車。靜芳閣去布街揣一塊足古錐的布，順紲共布版仔做伙紮去大家遐。

「阿母，我紮一張布版仔來予你看覓。是欲做一個銀角仔袋仔，拜託你共我教。我佇電腦頂懸看人寫佇網路的說明，若親像照版仔共布形剪予好，落針抑是轉頭斡角的所在，記號做予好，閣來就會使用針車，共零件車做伙組合起來。歹勢，我毋捌學過針車，實在看無欲按怎操作，想講來拜託你共我教。我較憨慢，你愛教較慢矣。」

「啊！原來這馬猶閣有這種跤路。我學車衫學遐久，就是無學到拍版仔啦。袂曉畫版仔是足輸面矣！」

老母仔看到印佇紙頂的版型，目睭規个金起來。原來老母仔少年的時陣佇工廠的訓練，無教量寸尺，嘛無教畫圖。干焦教會曉看版仔用鉸剪剪布，會曉用針車共布車做伙。

「來，靜芳，你共我講網路欲按怎揣，先予我研究看覓，我就知影欲按怎共你教。」

老母仔毋但目睭金起來，連頭殼嘛清楚起來。竟然共這馬少年的仝款，欲對網路頂揣資料。講起來嘛好氣嘛好笑，鴻昌怹老母較早佇厝內，干焦顧彼隻烏烏的厝內電話，手機仔佇台灣流行遐久，老歲仔攏袂使怹老母去辦。講查某人辦手機仔是欲討客兄？

老母仔離開厝這幾年，為著老母仔的安全，鴻昌怹兄弟仔共老母辦一隻手機仔，猶閣是會使用網路彼種，就是北京語講矣「可上網」啦。加上老母仔本來就加減會曉用電腦，這兩三年，因為免無閒厝內底矣，時間走誠濟出來，老母仔若親像轉去讀小學的時陣仝款遐爾認真，竟然開始會曉家己查資料！閣會曉走圖書館借冊轉去看！

靜芳共網路的資料予怹大家了後，老母仔揣著足濟版仔，有衫有褲有袋仔，猶閣有這馬誠流行的「杯仔套」，就是予人套佇紅茶杯仔外口，予人好勢捾彼種布套仔啦。若是有足媠的版仔型，就拜託靜芳鬥相共印出來予伊去剪布轉去做。本來靜芳攏載怹大家去布街剪布，想袂到老母仔恬恬矣共車牌仔號碼記起來，到尾仔為著無愛共序小齪嘈，攏家己坐『バス』去布街剪布。看到老母仔規个精神起來，鴻昌愈來愈放心。

親像老母講矣，這擺比伊做小姐个時陣猶較厲害，伊會曉畫版仔矣，毋但會曉完整車一領，猶閣會曉量寸尺訂做，做甲合合合！毋過有小可仔麻煩，有當時鴻昌去看怹老母，老母會共鴻昌喝忝！講伊這馬一步䆀，有時陣為著一點仔車袂媠，曷是車了䆀去，攏會拆了閣車，車了閣拆，舞甲足晏才睏。鴻昌共伊笑講：

「妳若親像猶佇工廠做女工，驚做無完，無通歇睏，佇拚件矣乎？」

講甲兩個母仔囝笑甲欲死。古早做工真正愛拚件，較早做完較早歇睏，彼種䆀習慣真正足䆀改矣。今年老母仔學會了，袂閣趕時間矣，若做了忝，就共針車禁掉，去外口行行矣，毋免一定欲趕轉來繼續拚！

「來！車好矣！提轉去予恁小姐試看覓！試看有佮意無！」

頂禮拜知影大漢孫欲閣轉來矣，規禮拜毋知佇無閒啥，昨暗敲電話予鴻昌，講伊閣車一跤『托特包』欲予怹大漢孫，叫鴻昌下班斡去提轉去。老母閣開始踏針車矣！鴻昌心肝頭一直歡喜起來！