閣來無矣

健文是阮學校一个誠好的老師，伊佮我同齊調來阮學校，做人簡單樸實，同事誠十年，干焦聽過伊𤆬囡仔比賽，毋捌聽過伊的閒仔話。伊佮我是誠好的同事。

有一年，調來一个查某老師，鄭靜美老師。學校派伊佮健文仝年級，健文若親像對伊小可一見鍾情，若佇走廊拄著，靜美老師除了頕頭，猶閣會對伊微微笑，健文攏會歡喜足久。靜美老師表現活跳，做工課嘛真用心，逐種活動攏主動參加，誠緊就受著全校的呵咾。

但是健文若毋是訓練囡仔，就是留佇教室裡底，改囡仔的簿仔。雖然怹是隔壁班的同事，煞親像無熟似，完全無關係。伊共靜美老師連話攏誠少講，若有班級的代誌，嘛是叫囡仔去聯絡。隔轉年靜美老師就閣調去隔壁莊的學校做主任矣。紲落來規學期，健文伊攏踅神踅神，嘛無𤆬囡仔去比賽矣。

「隔壁莊爾爾。鐵馬踏兩下就到矣。」我共伊鼓勵。

「我踏過去嘛無揣伊的理由。」伊煞共我按呢回答。

按呢閣過欲半學期，伊來揣我，共我說伊欲調學校矣，原來是隔壁學校來揣健文，拜託健文調去學校𤆬球隊。

「你調過嘛無見伊的理由。」我共伊捌說過的話閣說一擺。

「若仝學校，上無猶有相對面走過頕頭的機會。」伊講的時陣目睭金鑠鑠。

「閣來呢？」我問伊。

「閣來無矣。」