當首爾仍是叫漢城的那些年（肆拾捌）

喺一段正常嘅感情生活入面，理論上，我哋每日無時無刻，都係愛緊同一個人。所以理論上，應該日日都係情人節。

好地地咁咪幾好囉，偏偏我哋又要阿茂整餅，走去揀一日做「情人節」。咁即係點呀？我明明日日都已經愛緊你，點解喺每年情人節，我又要對你表示「我愛你」？咁我喺呢日愛你，其餘嗰 364 日係咪唔使愛你？

媽，我好亂呀！

平日五百（港幣；下同）一打玫瑰，情人節賣兩千。平日五百一餐燭光晚餐，情人節兩千。好明顯，情人節並唔係向荷包同銀行戶口示愛嘅日子。

人類都係喜歡作繭自縛。

（條副題我係玩緊嘢，真正韓文唔會咁寫，應該係「Chloe 의 어린 시절 꿈이 이루어집니다. 」；寫返出嚟費事俾人叉輪廚。）

1998 年 2 月 14 日，星期六，情人節；係我同 Chloe 嘅第一個情人節。

呢個亦係 Chloe 咁大個女，第一個有男朋友嘅情人節；今次第二次拍拖嘅佢，之前嗰段關係，等唔到呢一日。

如果以女仔平均由十二歲開始，就夢想有個完美嘅情人節嚟計，廿二歲嘅 Chloe，發呢個夢發咗十年。今年，1998 年，佢終於「叫糊」。而佢嘅 Valentine，就係我：起晒躲嘅「Heartless little shit」。

如果，呢次我搞「喎」咗 Chloe 個情人節，亦即係話，我親手摧毀咗一個少女嘅十年夢想。

God save Chloe Kim。

早上八點，跑步時間。

原本係五點半嘅，但自從 Chloe 週末入嚟過夜之後，我就冇可能五點半起到身。因為佢瞓覺嗰陣，鍾意用佢嗰 42 吋拑住我條腰同下盤，我動彈不得，只能夠趁佢轉便先可以甩身。

今日，除咗跑步之外，仲要去花店攞花。我喺宿舍附近嘅花店，訂咗一打白玫瑰。Chloe 鍾意白色，俾一打白玫瑰叫醒，感覺應該唔錯。

「小美，」我拎住紮花坐喺床邊。「起身喇！」

「蠢蛋早晨，」Chloe 睜開惺鬆睡眼，望一望我。「玫瑰花呀！多謝！」佢彈咗起身收花，錫咗我一啖。

Chloe 攬住紮花，個樣有啲感動。佢用力聞一聞其中一朵玫瑰，然後打咗個乞嗤。

食完 Chloe 煮嘅愛心早餐，我哋準備開始今日嘅行程。其實今日嘅行程，係 Chloe 安排嘅；佢安排咗今日做「睇樓日」。

經過我哋嘅研究 — 主要係佢嘅研究，我哋決定 — 主要係佢嘅決定，喺漢城龍山區嘅「龍山 2 街洞」落腳。嗰區係美軍龍山基地嘅座落位置，距離漢南洞教會都係步行距離（幾遠同幾斜吓嘅步行距離）；Chloe 認為，嗰區多外國人住，特別係美國人，對我嚟講，生活會方便啲，容易融入啲。

為咗盡快可以實現同居生活，Chloe 決定唔嘥時間，連情人節都用埋嚟睇樓。其實都好嘅，起碼救咗我一命，唔使我安排晒全日節目，淨係搞靚一餐燭光晚餐，咁出事嘅機率就會大大降低。

換衫出街。我發覺今日 Chloe 著衫著得好奇怪。因為我哋會去燭光晚餐，所以佢著咗套 royal blue 嘅晚裝；但同時，佢喺晚裝底又著咗條牛仔褲。之後，我見佢將件晚裝嘅裙襬捲起，用扣針扣住喺裙身，好似迷你裙咁。

「銀美蠢蛋，你搞乜呀條裙？」我問佢。

「咁我哋今日要出去成日吖嘛，」Chloe 一邊整一邊解釋。「夜晚又燭光晚餐，咁我扣起條裙，著牛仔褲，用大褸同頸巾遮住。到晚飯嗰陣放返佢落嚟，除咗條牛仔褲，就變返 dress up；咁咪又可以 formal 又可以 casual 囉！」

有時候，你唔可以唔服 Chloe 嘅創意。

「蠢蛋，你好靚仔呀！」佢望住我著我嗰套 Calvin Klein 黑西裝嗰陣咁講。但我硬係覺得，黑恤衫襯黑西裝，有啲似古惑仔。不過算啦，鬼叫呢期興咩。

地鐵3號線，往漢城方向。今日 Chloe 高咗好多，因為佢著住對三吋踭；再加上佢點都要拎埋紮花出街，成車人望住我哋兩個。

「點解你要拎埋紮花出嚟呢？」我俾人望到周身唔聚財。

「因為係我男朋友送㗎！」Chloe 仍然表現得好興奮。「我第一個有男朋友嘅情人節喎，真係好開心㗎！」

見到佢咁開心，而且佢口中嘅男朋友就係我，其實我都幾冧嘅；如果少啲閒雜人目光會好啲𠻹囉。

去到位於龍山山腳近綠莎坪大路嘅地產公司，見到個代理，嚇一跳。整乜個代理成個李登輝總統咁嘅樣？！家陣台灣總統好難撈咩？點解要過嚟韓國𢯎老襯？

李登輝（其實我唔記得佢真名）準備咗四個盤俾我哋睇；佢一開聲就叫 Chloe 做「金太太」，𠱁得佢鬼咁開心；薑係老嘅辣，呢個阿伯代理真識撈。

韓國習俗，「金小姐」嫁人後，就會變成「金太太」，唔會冠夫姓。好明顯，金小姐好受「金太太」呢一套。

（按：呢個要解釋吓，其實「先生」、「太太」、「小姐」呢套係外來語，都係戰後先有嘅嘢。韓文本身冇呢套名詞，有嘅係已經好少用嘅 군 (Goon/君)、양 (Yang/孃)，同埋男女通用嘅 씨 (Ssi/氏)；用法同先生太太小姐亦唔同。）

拍咗拖兩個月就想嫁？你會唔會快咗啲呢？都係睇樓啦。

第一個盤喺梨泰院 1 洞，即係港人熟悉嘅梨泰院 Nike 店對面嘅山上，個地理環境好似跑馬地鳳輝台山村台之類咁，要上一條斜路，再上樓梯，然後先到嗰條街；Chloe 著住對三吋斗零，行到上去都已經想掉頭走。

個盤係天台屋（屋塔房/옥탑방 ），即係仲要行多兩層，冬天行到上去都出汗；next!

第二個盤喺返龍山 2 街洞，唔使上咁多斜路，但係樓下係間韓國餐館，我喺二樓都聞到泡菜味，Chloe 話驚聞得多會冇心機煮餸；next!

第三個盤都係龍山 2 街洞，係近南山塔嗰邊，即係半山。我見到 Chloe 聽到個位置就面都青，於是我同李登輝講，都係唔睇呢個單位。太高喇，就算啱，出入都唔方便。

最後一個，就喺地產公司隔兩三間屋，山腳位置，屋後冇幾遠就係基地範圍，對面就係超級市場。

唔，有啲似樣喇。

入到屋，單位喺地下，面積約 400 呎，一房一廳。間房好大，同個廳各佔一半，房有門口出庭院，中間用日式樘門間開。間屋其實係一間獨立屋，樓上係業主住，樓下租俾人。由於韓國屋嘅樓梯通常喺屋外，所以分層租都唔會係問題。

我同阿「金太太」對呢個單位都幾滿意，於是問價。李登輝話，呢個單位租四十萬圜，即係約二千八港紙。聽落唔貴，即使喺呢區，呢個係價頂。

我問 Chloe 覺得點，佢點頭。

就係咁，我哋終於搵到屬於我哋嘅 home sweet home。

返去地產公司，簽好臨時租約，擺低二十萬圜訂金，租屋嘅事總算落實；比我哋預期順利。

行出門口嗰陣，我聽到 Chloe 自言自語咗句「金太太」。佢察覺到我望住佢，即刻收起笑容，同我講：「你恨吓先啦，追多我十年八年，我再考慮吓啦！」

「好呀！」我答佢。「十年後再講啦！」佢扁嘴，打咗我一嘢。

我哋截咗架的士，上去老地方（室內 office 嗰邊），等 Chloe 化妝同除牛仔褲。原本呢個係步行距離，但因為佢對三吋踭，都係搭的士穩陣啲。

六點半，汝矣島 63 大廈頂樓餐廳。

我拖住一個濃妝艷抹嘅 Chloe，準備燭光晚餐。我知佢唔鍾意，所以唔敢講出口，但係佢化咗個濃妝之後，真係好似金喜善；沿途嘅路人都 confirm 呢個事實。

但係餐廳個 receptionist 唔識死，叫咗佢一聲「金小姐」。

「佢點知我姓金㗎？」Chloe 問我，因為張檯係用我個名訂嘅。

「你估吓你化晒妝個樣似邊個？」我答佢；佢皺眉，扁一扁嘴。還好 Chloe 大方得體，並無分毫港女氣質，唔會隨便搵間餐廳嚟出氣。

我哋叫咗兩 set 五個 course 嘅晚餐，開咗支 Château Mouton。

食完 dessert，我拎咗份情人節禮物出嚟；Chloe 都拎咗份禮物出嚟。

我揀咗條 Tiffany 嘅心型鍊墜送俾 Chloe，仲有張寫住「Be my Valentine」嘅卡。雖然唔係乜嘢貴嘢，但我相信，Chloe 唔係計較禮物價值嘅人；佢會喜歡我送個「心」俾佢。

Chloe 先拆禮物，當佢見到條心型鍊之後，好開心咁講咗句「多謝」，然後就開始眼紅紅；呢個傻妹真係好眼淺。

當一個大眼韓妹含住兩泡眼淚、情深款款咁望住你嗰陣，莫講話條鍊，連條命都俾埋佢；買一送一，不另收費。

我幫佢戴起條鍊，佢攞咗個化妝鏡出嚟照一照，我見到佢滿足嘅表情。

Chloe 送俾我份禮物，上面有張卡，寫住「 바보에게 바보가 」，可以譯成「蠢蛋致蠢蛋」；卡裏面寫住「 사랑해요 ！」，呢句唔使譯啦。

到我拆禮物，Chloe 原來送咗隻 Oris 嘅自動表俾我。我打爛表面嗰件事，佢真係好上心。以佢嘅收入，呢隻表應該用咗佢好多積蓄。我都唔係計較禮物價值嘅人，我只係戥佢肉赤。

我換咗我隻爛表落嚟，戴上新表，然後同佢講咗聲「多謝」；佢好甜咁笑。

飯後，我提議搭的士返屋企，但 Chloe 話唔好，佢話今日我洗咗好多錢喇；於是我哋去搭地鐵。

返到馬頭驛，我見 Chloe 已經行到跛吓跛吓；梗係啦，佢好似從來未試過著高踭鞋著足成日，腳踭都損晒。

結果我孭佢返宿舍。唔好睇佢咁瘦，啲骨重到呢，孭起上嚟都幾係嘢。

返到屋企，我散晒。

Chloe 坐咗喺我大脾，伏喺我耳邊，慢慢一句一句咁喺我耳邊講「多謝」；我有留意，佢講咗十四句。

我問佢，點解係十四句嘅？有特別意思？

「我由八歲開始，已經渴望有個浪漫情人節；」佢星星眼望住我。「今晚你滿足咗我十四年嘅願望，所以咪多謝你十四次囉！」

八歲……金小姐，你會唔會早熟咗少少呢？

（待續）