初雪（結局篇）上

三星期前，我上嚟中國東北做嘢；其中一個原因，係想放低我同Chloe啱啱完結嘅五年「苦戀」、重新上路。

三星期後，我陷入另一段註定冇結果嘅苦戀 — 我同初雪嘅戀情，亦都即將會完結。

我哋成日聽到嘅甚麼「經歷一段刻骨銘心嘅戀愛之後，我已經冇能力再去愛第二個」之類嘅說話，其實都係呃鳩你膝頭哥唔食辣椒醬嘅「鳩噏當秘笈」語綠。論刻骨銘心，你好難「刻骨」得過我同Chloe；但係我亦都毫無問題咁愛上初雪。

因為呢個係邏輯問題：我今日食飯啃親，唔代表我以後食飯都會啃親。就算我日後食飯仍然啃親，呢個都係嗰餐飯嘅問題，同「食飯」呢個概念無關。唔講啃骨，就當我琴日食滯咗，最多咪今日唔食飯或者食少啲囉；點會以後都冇能力食飯喎？

如果你因為啃咗條刻好骨銘心嘅魚骨而決定以後唔食飯的話，咁我都冇乜說話好講……你自便啦。

我覺得，我哋都要學會認命。

認命唔係叫你放棄追求你想追求嘅嘢（或者人）。認命係當你追求唔到之後，俾返個位你自己喘息一吓，唔好趕到自己咁絕。

我同初雪，正在學習緊認命。

Day 20，長春市滿州國皇宮博物院。

應承咗初雪喺我臨走之前，再帶佢去一次大城市，如今都應該找數喇。不過今次唔係瀋陽，係滿州國嘅「新京」長春。

我從來唔會喺「滿州國」呢個名稱前面加個「偽」字，因為如果要研究「法統」呢樣嘢，喺中國，冇人比溥儀同袁世凱更加實至名歸、合法合情— 一個係世襲罔替嘅「皇帝」、另一個係經合法國會選出嚟嘅「大總統」。

可能，我哋俾國共兩黨嘅黨史家愚弄咗太耐，冇人會放低偏見去諗吓呢樣嘢。

溥儀嘅滿州國，係日本嘅傀儡政權，但「傀儡」唔等於「偽」。人哋喺自己嘅土地上面當政，選擇附庸邊個、跟邊個大佬、做邊個嘅傀儡，係佢嘅自由；你可以話佢蠢，但絕對唔係偽。如果當年佢選擇搵周恩來做首相，然後引入社會主義制度的話，咁佢仲係唔係「偽」？

除此之外，我都幾喜歡吉林呢個城市。因為佢有一種特別嘅味道……滿州國新京嘅味道。當我踏入皇宮嗰陣，心頭仲有一絲震撼嘅感覺 — 好似目睹電影《末代皇帝》嘅開國場面咁。

可能我前世係旗人都唔定……

「哥哥呀，」初雪望住皇宮裏面溥儀個廁所，有啲不明所以。「點解要展覽個廁所呀？」

「等我睇睇先……」我望一望說明嘅牌片。「呢度話呢個廁所係溥儀皇帝辦公嘅地方。因為佢長期患有便秘，日常花喺廁所嘅時間非常多，所以好多公務都係喺呢度完成……」

「嘻嘻！乜你哋咁㗎！」初雪笑得好開心。「人哋話晒都係王，就算真係身體唔舒服要去好多廁所，都冇必要當展覽品咁展出啫……」

「呢個冇錯係皇帝，」我笑笑口答佢，但同時都壓低聲線；雖然，我唔覺得會有好多人識聽我哋嘅語言。「但佢唔係中國人認可嘅英明皇帝。政府為咗要突出佢『昏君』同俾日本控制嘅傀儡形象，自然要幫佢展出一啲『佐證』；喺廁所辦公好明顯係好好嘅證據啦。你諗吓，你會唔會覺得，一個皇帝出緊恭個樣會好英明神武吖？」

「都唔係吖，」初雪仍然笑得好開心。「一心二用，我覺得佢幾勤力、仲幾聰明喎。」

「好啦，咁今晚你去廁所嗰陣，我拎幾本書俾你讀，等你一心二用啦！」我笑佢。

「好核凸呀你……咦……」佢摙住個鼻走開咗。

睇完皇宮，再參觀埋喺花園嘅幾個圖片展 — 不外乎都係關於日本侵華同九一八之類嘅歷史圖片。然後，我哋就離開皇宮，去我哋嘅第二站 — 遊樂場。初雪曾經同我講過，佢咁大個女都未入過遊樂場玩機動遊戲；於是，我準備咗呢個「驚喜」俾佢。

「嘩！」初雪好大個「嘩」字寫晒上面。「呢度就係樂園（ 놀이공원 ）啦？！好大啊！好好玩呀！」

坦白講，呢度其實最多係個進化版荔園，同日韓嘅主題公園真係冇得比。但係對於初雪嚟講，呢度已經係世界最好玩嘅樂園。

我將喺遊行場門口買嘅兔仔耳頭箍戴上佢頭上，然後就拖住呢隻「朝鮮兔」入去玩機動遊戲。

「哥哥，呢個。」佢指住個「咖啡杯」𠱁𠱁轉。

幾分鐘後，初雪交叉腳落返嚟，一直都唔係好企得穩。

「初雪呀，」我有啲擔心。「你冇事吖嘛？」

「我唔係初雪，」佢指一指頭上嗰對兔仔耳。「我係小饅頭兔兔（ 소만두 토끼 ；又係佢自己嘅傑作 ），我冇事！」

一轉咖啡杯就傻咗，其實都幾慳皮。

「兔兔呀，」我問佢。「咁你仲想玩啲咩呀？」

「呢個！」佢指住隻海盜船。

十分鐘後，「小饅頭兔兔」攬住個垃圾桶嘔緊。

「點呀，冇事嘛？」我遞緊水俾佢嗽口。「嘔得咁辛苦，不如唔好再玩啲咁激嘅嘢喇，我哋可以玩啲冇咁暈嘅機動遊戲嘅……」

「唔制！我要玩！」初雪成個大細路咁，呢三個星期以嚟，呢一刻佢最似細路。「我等咗好多年，今日先有得嚟遊樂園呀！我點都要玩！」

既然係咁，不如去打大佬啦！

「哥哥……」初雪望住啱啱隆隆而過嘅過山車，面露惶恐之色。「佢……好驚呀……會唔會跌落嚟㗎……」

「唔會㗎，有安全欄吖嘛！」我拉住佢。「快啲嚟啦，我哋去玩勁嘢喇！」

於是，我拖住擰晒頭、萬不情願嘅初雪上咗過山車。

「哥哥……好驚呀……」坐好咗之後，佢繼續向我求饒。

「唔使驚，拖住我。」我拖住佢隻手，佢點一點頭。

然後，我突然間意識到，我永遠冇法好好保護初雪。

冇錯，喺過山車上面，我可以offer我隻手俾佢、俾一種安全感佢；但係，亦都僅此而已。我既冇辦法阻止過山車開動，更加冇辦法防止潛在嘅意外發生。我拖住佢上咗過山車，但我所能夠供給俾初雪嘅所謂「安全感」，其實都係假嘅安全感 — 假使意外發生，我最多只能夠陪佢一齊死。

三個星期過去，再過幾日，我就要離開初雪。表面上，呢三個星期，我好似帶俾佢好多嘢、見到好多新事物、有個「哥哥」愛錫佢。但係幾日之後，一切將會打回原形。南瓜車、玻璃鞋、王子，所有嘢都會消失得無影無蹤，彷彿冇發生過。留低嘅，就只有一個無助嘅女孩，繼續面對佢嘅不幸人生。

而我，除咗俾咗佢一啲假嘅安全感、假嘅希望之外，我嘅出現，並冇改變任何事情。

過山車離開站台、再返回站台。一切嘅高低起伏，最後都只能殘存喺初雪嘅記憶之中。

去完遊樂場，再同初雪去食「壞人菜肉飽」。然後，我哋返咗酒店。

「哥哥，」可能我今日實在靜得要緊，初雪好關切咁望住我。「你係咪唔舒服呀？」

「初雪呀，」我忍唔住講出我心裏面嘅說話。「不如，我帶你離開朝鮮，好唔好？」

當時我心裏面諗嘅係，只要我再俾一筆錢小英，同佢講我想初雪再陪我一頭半個月，然後我立即帶初雪搭飛機去雲南、連夜出境；咁當我哋去到泰國嗰陣，飯店都應該未發現初雪嘅「叛逃」。

再諗深一層，我只要動用我喺DC嘅一啲關係，要將初雪帶入美國大使館，其實都唔係咁難。House Foreign Affairs Committee裏面，大把議員想同個脫北者一齊開記者招待會，呢個photo op會係佢連任嘅鐵票；我只要包靚隻故仔，就一定會有人落疊。

「就算我唔理我屋企人嘅生死，同你遠走高飛；」初雪好認真咁望住我。「離開咗朝鮮，我憑乜嘢喺呢個陌生嘅世界中生存？」

「咁有我喺度嘛！」我答佢。「哥哥會照顧你。」

「我知道哥哥好錫初雪、會照顧我，」佢眼中開始有淚光。「咁唔通我下半世，就一直倚靠住哥哥生活？我唔想成為哥哥嘅負累……」

呢個問題，我唔識答佢。的確，如果初雪只係一心做我嘅女人、倚靠我去維持佢嘅生活的話，咁除咗環境唔同之外，成件事嘅本質係冇變嘅。佢只係從一個獨裁者手上、跳到去另一個獨裁者手上；佢仍然要倚靠一啲佢控制範圍以外嘅嘢去生存。

而且，佢完全冇退路。

「咁……唔通幾日後，我哋就咁就分開？」我有少少激動。「幾日後，唔通我就要親手送你返去個火坑入面？」

「哥哥，」佢滿眶眼淚望住我。「初雪有件事，想你應承我。」

「咩事？」我望住佢。

「唔好再覺得，初雪同你嘅關係，係一宗買賣；」佢慢慢除低佢嘅T恤。「唔好拒絕我嘅初戀……」

然後，我哋開始kiss……

最後，我同初雪結果都發生咗關係。

夜深嘅時份，我慢慢醒咗。初雪唔係床上面，我再望一望房裏面，初雪披住張床冚，企咗喺窗邊，睇緊長春嘅夜色。

「小饅頭，」我行埋去，攞咗佢張床冚、披喺自己身上、再用床冚攬住我哋兩個。「做咩唔瞓覺呀？」

「哥哥……」初雪轉身攬住我。「仲記唔記得，我哋喺圖們陪朴太太交錢嘅事呀？」

「記得，」我答佢。「俾人搵鎗指住，又點會唔記得？」

「其實，當我企喺你同嗰個賊之間嗰陣，」佢好細聲咁講。「我有諗過，如果個賊向住我開鎗的話，就好喇……」

「點解要諗埋啲咁嘅傻嘢？」我問佢。

「如果佢開鎗的話，咁我呢一世，就可以永遠同哥哥喺埋一齊……」佢嘅聲線開始變。「我永遠都係哥哥嘅女人，哥哥永遠都係屬於我嘅……」

然後，我感覺到佢嘅哭泣。

「傻妹，」我輕輕抹去佢嘅淚水。「呢個世界，唔係咁㗎……」

「點解我唔可以同哥哥一生一世？」初雪淚水仍然繼續落下。「哥哥走咗，初雪唔知以後可以點呀……」

「初雪仍然會開心咁過佢嘅日子，」我繼續幫佢抹眼淚。「然後喺某年某日，有一個喺初雪生命中最重要嘅人會出現。之後，你哋會組織一個家庭，然後快快樂樂咁生活落去。最初，初雪好可能經常會諗起哥哥；然後，日子耐咗，初雪諗起哥哥嘅次數越嚟越少。不過，哥哥並冇從初雪嘅生命中消失；只不過係隱藏咗喺初雪嘅生命片段入面，過佢應該要過嘅活。」

「咁初雪會唔會永遠失去哥哥？」佢望住我，好認真咁問我。

「唔會，」我答佢，然後指一指佢嘅頭。「哥哥永遠都會活喺呢度。」然後，我拎起佢隻手，指一指我個頭。「初雪永遠都會活喺呢度。今生今世，冇人可以奪去我哋嘅記憶；只係屬於我同你嘅記憶。」

除此之外，我實在唔知點樣去合理化，我哋生活緊嘅地上所發生嘅一切荒謬絕倫嘅事情。我實在合理化唔到，點解初雪唔可以自由自在咁、選擇佢所喜歡嘅生活地方同埋方式、仲有佢喜歡嘅人。

一生都是命，半點不由人。

Day 21，長春市中心。

喺長春嘅最後一日，我帶咗初雪去shopping。

我同初雪講，香港嘅習俗，拍拖嗰陣，男仔要買好多嘢俾個女仔，咁個女仔先會幸福。初雪信以為真，所以今日冇再拒絕我買嘢俾佢。

我哋買咗一啲衫褲、一對鞋、仲有啲小飾物。初雪亦都揀咗支墨水筆，諗住返去送俾佢準備上高中嘅細佬（回帶：佢有兩個細佬，一個已經唔喺度。）。最初我都擔心，唔知佢可唔可以帶咁多「外國貨」返北韓。後來佢同我講，話小英曾經講過，佢哋呢啲女仔係經「特別照顧」出國嘅，返去嗰陣，唔會有人為難佢哋；所以我都放心買嘢俾佢，只係確定，我買俾佢嘅嘢當中，冇made in Korea或者made in USA嘅貨品。

我冇同初雪講嘅係，其實我今日整日嘅心神都非常不穩。

即將同初雪分開，固然係一個理由。但其實，喺我哋去買嘢嘅過程中，我又一次經歷，三年前我同Chloe被迫分開嗰陣、係最後嘅日子、我不斷同佢去shopping、不斷買一啲我走咗之後、佢會需要嘅嘢嗰陣嗰種心痛。

人生匆匆幾十年，喺我嘅頭卅年都仲未過晒嗰陣，我已經分別幫自己辦理兩次「身後事」。

我一直以為，時間可以沖淡一切；點知，到自己設身處地咁經歷一連串別離嘅痛嗰陣，我先發現，原來呢句嘢，又係啲未試過生離死別嘅人，作出嚟安慰人嘅搵笨柒之作。有啲傷痛，無論過咗幾耐，當再挖返出嚟嗰陣，都一樣咁痛。我哋之所以覺得好似好咗，其實只不過係做人做耐咗，既麻木咗兼忍耐力好咗咁解；同時間無關。

三年內同兩個唔同嘅女人啃兩次骨，睇嚟我都係時候諗吓，飲電油會唔會好過食飯……

（待續）

本故事人物及情節如有雷同，實屬巧合。