初雪（拾貳）
試問人在旅途時 愛下去可有未來
大家有冇發現，點解我會咁執迷有關南北韓嘅故事？
我聽到一個C字頭嘅法國時裝品牌名稱；啱一半，其實又唔關得晒佢事。
2000年初，對比起南韓喺經濟上嘅強勁反彈，香港都仍然處於一個載浮載沉嘅狀態，失業率長期維持高水平。啱啱返香港嘅我，當時「報考」某報業集團嘅財經記者一職。喺大堂度，睇住好幾批、每批十幾人咁等住考筆試；其實我都打定輸數 — 作為一個喺外國生活咗十幾年嘅人，我冇信心我嘅中文文筆可以過得到報館呢一關。
當日嘅試題，係喺公文袋裏面嘅兩段news clippings中任揀一段，然後寫幾百字嘅感想。我打開我嘅公文袋，見到其中一段clipping，係有關南北韓分隔幾十年後、兩地舉辦第一次嘅親屬聚會嘅新聞。圖片見到兩個老人家相擁、哭成淚人。
我好記得，當時我喺試卷上寫嘅一段嘢：
「臨別依依，兩位古稀老人相擁飲泣、不忍分離。或許，他們心底裏明白，分易分、聚難聚。如果兩韓關係在短期內沒有戲劇性好轉的話，他們此別、將成永訣。三八線上的一面破鏡經過短暫重圓後，繼續維持分離；一段段骨肉分離的悲歌，將會化成統計數字，埋藏在塵封的檔案櫃中。」
後來，我嘅副老總阿姐同我講，就係呢段文字，我喺五十幾份試卷中突圍而出，成為佢哋當時唯一嘅新入職記者。
可以話，我事業嘅起點，就係一段有關南北韓嘅作狀文字。
Day 11，早上八點半。
一陣敲門聲驚醒咗我。
唔知係心虛定係未瞓醒，我真係有啲怯，究竟係之前喺圖們影相留落嚟嘅蘇州屎，定係幫朴太太佢哋「策劃偷渡」惹嚟嘅蘇州屎。然後，我再望一望床邊，初雪唔喺度；佢去咗邊呢？
喺第二次敲門聲嘅催促下，我慢慢行過去開門；心中盤算：就算有麻煩要拆，都開咗門先見步行步啦。
開門一睇：原來係朴太太；嚇得我吖……
「馮先生早晨；」朴太太好客氣咁打咗個招呼。「唔好意思咁早打擾你，我同媽媽諗住落去食早飯，然後我想去市場買啲日用品之類嘅嘢。想睇吓你方唔方便一齊食啲嘢，然後陪我走一轉？」
「哦，冇問題呀；」我答佢。「咁我換件衫，轉頭 — 」
當我個頭都未轉之際，房門側邊嘅廁所門突然打開 — 你哋冇估錯，我嘅「真空+底褲」喺呢個perfect timing，由廁所走出嚟……
「初雪小姐早……」聲音快過眼。好明顯，朴太太俾初雪呢身Wonder Woman式嘅打扮嚇咗一嚇，「晨」唔出……
「朴太太早晨……唔好意思呀……」個「呀」字剛落，初雪已經光速跑返入去房裏面有掩體嘅地方喱埋。
「唔好意思呀……咁我哋喺餐廳見啦。」朴太太笑咗一笑，然後走咗。
閂好門後，我行返入去睇吓初雪 — 佢已經一舊菇咁喱埋咗喺「被竇」裏面。
「性感嘅初雪小姐，」我以開玩笑嘅口吻同佢講。「你可以出返嚟喇。」
「哥哥唔准笑人㗎！」佢行埋我身邊，輕輕打咗我一吓。「我諗住早啲起身梳洗完，先至叫醒你；點知一出嚟就……點算呀？好醜呀……」
「有冇諗過，平時係咪著返條褲會好啲呢？」我乘機進言。
「朴太太唔會每朝都嚟敲門嘅；」佢一臉頑皮。「我最多朝早起身著返條褲啫。」
「萬一佢夜晚拍門搵我，咁點算？」我仍未放棄。「不如你都係著返條褲啦……」
「唔制！」佢繼續一臉頑皮；其實呢個樣嘅佢好可愛。「你再叫我著褲的話，我今晚連呢條都唔著！」佢指一指佢條底褲。
到我唔敢再駁落去……
早餐過後，我同朴太太出咗市中心買日用品。初雪受朴太太所託，陪金老太上房休息。
喺百貨大樓行咗一輪，朴太太想要嘅日用品都大致上買晒。我留意到，佢亦都買咗啲男裝嘅T恤同牛仔褲、仲有波鞋；我諗佢應該係聽咗韓先生嘅經驗之後，準備定啲必需品俾佢表弟。
行完百貨大樓，當我哋正準備離開之際，地下嘅化妝品部吸引咗我嘅注意。一直以嚟，我都想買啲化妝品俾初雪 — 話說某個早上，當佢如常化個淡妝準備同我出街嗰陣，我留意到佢個粉餅經已用到裂咗。我知道佢每個月嘅零用好少，可能唔捨得買；我諗，我應該送啲化妝品俾佢。
「朴太太，我想你幫我一個忙。」我同佢講。
「有乜可以幫到你？」佢望住我。
「我想買啲化妝品俾初雪，」我老實同佢講。「但係我又唔識揀，你可唔可以幫我揀？」
「冇問題，好簡單啫。」佢笑一笑。
我哋行咗去一個有Laneige化妝品賣嘅櫃檯，由於延吉係一個完全兩語嘅城市，朴太太可以用韓文同本地人溝通。佢揀咗啲粉底、胭脂同眼影之類嘅嘢，然後續隻試上手背俾我睇，又同我解釋呢堆嘢嘅用途同效果 — 坦白講，我係一個對化妝品毫無認識嘅典型男人，呢啲嘢莫講話你教我點用，你就算幫我化埋個妝，我都唔會識邊啲打邊啲。
揀好化妝品，我再加多支唇膏，然後就去俾錢。
買完嘢，我哋搭的士返酒店。
「馮先生，你好錫初雪小姐呀；」朴太太笑笑口望住我。「你哋拍咗拖幾耐呀？」
「其實時間好短，都係幾個星期咁啦。」我唔敢呃佢，因為我擔心，金老太都可能會咁問初雪。韓國人唔問呢啲嘢，就唔係韓國人啦。
「介唔介意話我聽，」朴太太再問。「其實佢係咪北朝鮮人？」
「唔……冇錯，佢係北朝鮮過嚟工作嘅。」其實琴晚初雪都表露咗身份，朴太太就算係真唔知又好、明知故問都好，呢啲冇得呃佢。
「佢應該唔會係官方嘅人嚟㗎呵？」佢個樣有啲擔心。
「唔會，初雪係侍應嚟嘅；」我答佢。「佢都係普通平民，你可以放心。」
「咁我放心喇。」佢鬆咗口氣。「係呢，咁你哋日後……打算喺延吉結婚，然後繼續喺呢度生活。」
我知道，佢心裏面嗰句係：你有冇打算幫初雪脫北？
「其實，我暫時都未考慮到呢一點，」我老實答佢。「見步行步啦，到時或者再有其他方法呢。」
「咁又係，」佢打圓場。「慢慢發展吓先啦。我覺得初雪小姐份人都好純品，希望你哋可以順順利利啦。」
朴太太嘅說話，帶出咗一個好重要而我又諗唔掂嘅重點：究竟，我同初雪，會唔會有將來？
同日晚上十點，鐵林夜市「明洞」大牌檔。
朴太太依照之前嘅約定，嚟咗見面嘅地點：一個叫「明洞」嘅大牌檔 — 一種喺漢城非常流行、亦非常普遍嘅街邊檔，等待要見面嘅人。我同初雪就陪佢一齊，等佢有個照應。
我哋坐咗大約十五分鐘，一個大約卅幾歲嘅男人入咗嚟、視察咗一陣，然後就坐咗喺我哋張細檯嘅空位。
「你係……南先生？」朴太太問佢。
「哦，」佢點一點頭。「我要嘅嘢，有冇準備好？」
「有，」朴太太喺手袋度攞咗張紙出嚟。「美金十萬蚊嘅匯款證明，日期係前日；所以，錢應該已經到咗戶口……」
我望一望張匯款單，的確係十萬美金；收款人係一個鄭姓（譯音係韓國鄭/ 정 /Jeong）嘅澳門XX銀行戶口。老總講得啱，北韓同澳門，真係有啲唔尋常嘅外匯來往……
「呢層我哋會查。」南先生冷冷咁答，然後擺低咗張紙仔喺檯面。「三日後，帶埋尾數五萬美金，去圖們嘅『友誼賓館』，辦好入住手續後就打呢個電話。」
「咁我哋到時會唔會見到我表弟？」朴太太好關切咁問佢。
「會，所以你落好腳就要即刻打呢個電話，」南先生再指一指張紙仔。「等我哋嘅人有時間準備；否則，乾等嘅只會係你。」
講完之後，南先生就走咗。
「我諗，我哋要同東元先生商量一吓，早一日去圖們準備好……」朴太太半自言自語。
「我哋聽朝一早就同佢講。」我答佢，佢點一點頭。
返到酒店，朴太太返咗房休息，我同初雪都返咗房。
「哥哥呀，」初雪問我。「十五萬美金，即係幾多錢呀？」
「我唔知美金兌北韓圜點計喎……」我都搲晒頭。
「咁中國圜呢？」佢再問。
「人民幣呢……」我用一兌八嘅匯率心算緊。「大約一百二十萬人民幣左右啦……」
「一百二十萬！！」佢兩隻眼碌到一百二十萬咁大。「初雪打幾世工，都未賺到一百二十萬呀……」
其實，聽到十五萬美金嗰陣，我個心都經已冷咗一截 — 就算我同初雪情投意合，我都唔知去邊搵十五萬美金嘅「脫北費」；更加唔好講，之後嘅「十萬里長征」（如果當年班黃俄俾人剿到著草都算「二萬五千里長征」，咁由東北陸路去泰國仲唔係十萬里長征？）……
Day 12早上，酒店餐廳。
我哋搵埋東元食早飯，順便傾吓去圖們嘅安排。
「友誼賓館……」東元沉吟。
「係唔係有咩問題？東元先生？」朴太太有啲不安。
「啊……唔係件事有問題，」東元從佢嘅沉吟驚醒。「不過，呢間賓館…….」
「間賓館有問題？」我問佢。
「點講好呢……」東元思索緊。「友誼賓館係一間比較老舊嘅賓館，位置亦都比較偏僻，喺圖們市區嘅邊皮。亦都係因為咁，所以呢間賓館就成為脫北者同佢哋同喺外國嘅家屬見面嘅熱點之一。」
「咁都好吖，起碼佢哋會了解我哋呢啲家屬嚟嘅原因，應該會比較方便？」朴太太問東元。
「話雖如此，但係……」東元欲言又止。「賓館由於比較老舊，有啲日久失修嘅情況，環境唔係好理想。另外，亦都由於地理位置偏僻，賓館喺之前就發生過劫案，甚至有人命嘅傷亡……」
「咁點算呀？」朴太太有啲六神無主，望一望東元之後，徬徨咁望住金老太。
「唔……」東元不住思索。「你哋嘅約定係點㗎？」
「三日後，喺賓館入住好就電話聯絡佢哋……」朴太太答佢。
「一般脫北者會見家屬，都會喺半夜進行，盡量掩人耳目……」東元解釋佢諗到嘅對策。「我哋唔好太早去圖們，太早去到都冇意思，只會夜長夢多。我提議當日早上起行，時間已經好充足。會面後如果冇必要，我哋連隨就離開圖們，寧願返到嚟延吉先至休息；朴太太同金老太，你哋意思點？」
兩位韓國女士互望咗一陣，然後緩緩點頭。之後，朴太太同東元講：「就照你嘅意思去做啦！拜託晒你；東元先生！」
我哋食完早飯後，兩位韓國女士先行離開。然後，我同東元商量咗一陣，主要都係關於去圖們嘅細節、同埋其他採訪嘅安排。傾完後，東元亦都離開、返機場睇鋪。
我同初雪就出咗去市中心行街。嚟咗個幾星期，除咗個為食妹話肚餓要去夜市食嘢之外，我哋一直都未有機會喺延吉嘅市中心行吓街。
於是，我哋兩個又好似喺瀋陽咁，手拖手行街。人嘅適應能力真係好強，我已經開始將初雪當作女朋友看待；佢就更加唔使講，自從喺瀋陽渾河河畔嘅一句「你會唔會係我嘅初戀？」之後，我知道呢個女仔經已完完全全咁，當咗我係佢男朋友。
以我往時嘅謹慎性格，係呢啲情況下，我又會有好多嘢諗；事實上，當年我同Chloe就係咁。但係今次，我又冇好刻意咁，想劃清我哋之間嘅界線。除咗仍然唔想因為買賣關係而同初雪上床之外，其餘嘅嘢，其實我唔抗拒。
今日唔知聽日事，就算俾你plan好晒，最後開大定開細，仍然要100%睇天。與其係咁諗來諗去，倒不如開開心心、見步行步。唔理智，但起碼開心。
當我哋喺度對住街上嘅店鋪指指點點嗰陣，電話響：
「馮先生，我是新羅飯店小英啊！」電話傳嚟小英刻意提高八度嘅聲音。「你好嗎？跟美姬玩得開心嗎？」
佢唔提返呢個名，我都差啲唔記得咗初雪嘅「藝名」。
「開心，我們玩得很開心。」不過，唔知我嘅「開心」，同小英嘅「開心」，係唔係講緊同一樣嘢啫。
「開心就好！對啊，馮先生，」小英繼續。「美姬陪了你也差不多兩星期了，你想她再陪你多久呢？」
「我想，我還要她陪我一兩個星期，確實日子未定；」我答佢。「這樣吧，我把一些錢放在酒店的前檯，你們找人過來拿；還是不夠的話，待我送她回來哪天再計算清楚好了；行嗎？」
「當然沒問題！麻煩了你不好意思；」小英非常有禮。「對了，我能跟美姬談一下嗎？」
「可以。」我將電話遞俾初雪，同佢講：「小英搵你。」
「언니 ！」初雪好興奮咁同小英打招呼。「我好掛住你呀！」
然後，佢哋閒話家常咗一陣，初雪好興奮咁話俾小英聽，佢呢幾日去咗大城市玩，又食咗「壞人菜肉飽」。聽得出，初雪同小英應該幾好感情。
佢哋傾咗一陣，然後又道別咗一陣。電話傾完，初雪好開心咁俾返個電話我。
「你哋傾咗啲乜呀？」我笑笑口同佢講。「好似好開心喎。」
「係呀，姐姐好錫我㗎！」初雪笑得好開心；然後，佢突然間變得有啲嬌羞。「姐姐問我，係咪打算……嫁去香港喎……嘻嘻，佢笑人嘅……」
我冇答佢，只係陪佢一齊笑。初雪係一個直來直往嘅人，佢呢句說話，應該唔會有任何隱藏嘅意思。不過，佢咁樣一講，又再次提醒咗我一個現實：
我仍然唔敢肯定，我同初雪會唔會有將來。就算有，呢個將來，亦都唔係容易嘅事。我哋要面對嘅事情，並唔係我願意搬上嚟延邊長住就可以解決得到。喺呢一刻，我仍然未能夠完整咁預計得到，我哋所面對嘅問題，究竟係咩規模。
風 吹過萬里沙 途中是我碰著途中的你 也許祇因眼中 都有孤單的倒影 走 方向在那邊 尋找是我也在尋找的妳 夜了半夢還是半醒 某種感觸便再也說不清
難說出應不應該 跟你在這刻濃濃的愛 試問人在旅途時 愛下去可有未來 難說出應不應該 跟妳在這刻全無拘束的愛 妳若停在我的路 妳會否仍然是妳
（待續）
本故事人物及情節如有雷同，實屬巧合。
分享至
成為作者繼續創作的動力吧！
© 2024 vocus All rights reserved.