電子尪仔冊輕鬆看

讀冊機 mooink Pro

進前過年歇睏，上元了後會當開工矣。這站我看誠濟尪仔冊，攏是用讀電子冊个機器看个，今仔就來介紹用讀冊機看尪仔冊。

電子冊有分平台，我攏是踮 Readmoo 買个，Readmoo 最近个尪仔冊愈來愈濟，前一站仔是線頂冊展，攏總三本 75 折，最近是東立三本 79 折閣會當敆其他个優惠券（到明仔載！），就買閣較濟，有進前看過無買个，嘛有無看過个。其中《咒術迴戰》我有佇線頂看過一點仔（〈倒流著位無容易〉），毋過看甲誠慢，彼陣看到交流戰篇，一直相拍个部份感覺較無聊，但是這擺用讀冊機重看，一睏頭隨予我看超過。

我用个讀冊機是 Readmoo 出个 mooink Pro，專工看 Readmoo 買个冊，螢幕 10.3 寸，敆手寫个功能。畫面比一般日本尪仔冊个一頁閣較大，若是兩頁一面來看迒頁就會較細。雖然講畫面放大，嘛袂講袂明，因為日本尪仔冊个單行本本來就比週刊較細，原稿可能閣較大張？一面一面看比無法度看規面个電腦螢幕加較輕鬆，上重要个是會當看迒頁。電腦若欲用大螢幕看，就愛坐佇桌仔前，若欲倒眠床用簿仔型電腦看，毋但較細，嘛較重，讀冊機一台輕輕，mooink Pro 才 240 公克，閣無成電腦遐呢燒，𢯾佇咧身軀若烘爐，熱天个時真正擋袂牢。

原本看《咒術迴戰》感覺看無啥看有个相拍場面，按呢看加外清楚，順順仔看超過原本个進度。可能是第二擺看抑是真正因為畫面較大，一寡進前無注意个細節嘛看著矣。其他親像《大正處女奇譚（大正処女御伽話）》這種我進前就看了个冊，嘛是歡歡喜喜閣看一擺。

唯一較麻煩个是，雖然會當一揤就變雙頁來看迒頁，因為雙頁是共讀冊機提橫个咧看，欲變轉來單頁个時，袂自動變直个，愛加揤一下，若一直提橫个來看，就會比一般个尪仔冊閣較細，失去了伊个優點。