願意志與勇氣永垂不朽。《香港保衛戰紀——18個需要記住的香港故事》

大家細個可能會聽過祖輩講「三年零八個月」（日據時期）好慘，要食樹皮，白米裏面滲咗沙，但係淪陷之前發生過嘅香港保衛戰就唔係好多人講。有人會覺得，呢個戰役已經係八十年前嘅事，連參與過呢個戰役而又仍然在生嘅人都唔多了，仲睇嚟做咩呢？

我哋學地理，可以認清自己喺空間中嘅位置；學歷史，可以認清自己喺時間上嘅位置。人類能夠藉著前人留下嘅記錄認識過去發生嘅事，因此人類具有繼承前人思想同價值嘅能力。相信呢個都係點解當近年香港嘅未來陷入混沌不明嘅狀態時，好多有心人想到要回頭尋溯過去，學習曾經生活喺同一片土地上嘅前輩所留下嘅經驗同智慧，重新肯定自己喺香港人嘅時間軸上嘅位置。據我所知呢兩年出版嘅香港歷史相關書籍，除咗本文介紹嘅《香港保衛戰紀——18個需要記住的香港故事》外，仲有同樣係蜂鳥出版嘅《香港簡史》、《空白的一百年——教科書不會告訴你的香港歷史》、亮光文化嘅《教科書不會教的36個香港歷史人物》、明報出版社嘅《古事尋源》等等。

可能因為香港保衛戰歷時僅十八日，而且軍隊人數唔多，坊間有一種講法係話香港守軍無心抵抗，輕易投降。但當你細讀呢本書，就會發現事實上參戰嘅多個部隊，都展露非凡嘅勇氣同堅持，連日軍都曾為戰死嘅將領就地安葬立碑，可見守軍嘅志氣連敵人都禁不住欣賞。香港保衛軍艱苦抵抗嘅另一個證據係，香港保衛戰及後續行動嘅軍人獲頒多面軍功獎章及大英帝國勳章，包括位屬最高殊榮嘅維多利亞十字勳章。呢個亦係《香港保衛戰紀》一書別具特色之處，以功勳為其中一個面向，去介紹多個與香港保衛戰有關嘅人物。

由於香港義務教育關於本地歷史嘅部分貧乏得可憐，有啲人會誤以為成個香港保衛戰都係當時嘅宗主國英國打嘅，甚至話係中共嘅抗日游擊隊（俗稱「東江縱隊」）打嘅，同香港人毫無關係。《香港保衛戰紀》一書喺揀選各章節嘅主角人物時，就刻意包括多個唔同嘅種族同國籍，香港居民及非居民，當中尤以前港大校長賴廉士嘅愛徒，本地高材生李耀標為表表者，佢潛逃出戰俘營後，多次深入險境進行情報活動及軍事任務，更成為香港最早期嘅華人軍官之一。全書亦以香港大會堂紀念花園嘅十二邊形神龕作結，強調獻身保衛香港嘅烈士來自不同國家、族裔、宗教，而且包括作戰人員、後援人員、唔屬於任何組織嘅平民等等。

而且我哋喺書中可以睇到，一眾保衛香港嘅勇士之中，雖不乏外地出生或外籍人士，但當佢哋被時代選中嘅時候，為香港奮勇作戰，喺戰俘營捱到重光之後，亦繼續留喺香港貢獻，並喺生命嘅盡頭，以香港為最終歸宿。就算佢哋呱呱墜地嗰一刻唔係香港人，佢哋一生所做嘅選擇、對香港呢個地方嘅付出，又豈能以一句「外人」否定呢？

是以，喺屋企以外睇呢本書嘅時候，有時都會覺得唔好意思，因為隨時都會忍唔住感動落淚。當時局困頓嘅時候，我哋可以遙想呢一班早已為香港獻出半生，甚至獻出所有嘅前輩，佢哋經歷過嘅苦難唔會比我哋少；亦可以想想身邊仍然同行嘅人，只要你去問，不乏二話不說就幫忙嘅同伴。由過去到現在，我哋都從來唔孤單。

最後，引用書中香港前天文台台長希活嘅說話：「也許，我們不幸生於亂世。但也許，我們這一代人有絕佳的機會塑造一個更美好的世界。」喜聞《香港保衛戰紀》一紙風行，甫出版就橫掃多間書店暢銷榜首，願彰顯意志與勇氣嘅香港歷史繼續廣泛流傳，為世世代代嘅香港人增添勇氣與力量。

作者：Watershed Hong Kong（FB專頁）（IG） 出版社：蜂鳥出版（FB專頁） 出版日期：2021年11月 購自：蜂鳥出版官方網站 電子書：讀墨、Kobo 、Google Book