習射隨筆．「的前」回顧（下）

寫得有啲囉唆的日本弓道修習感想的下篇（夠晒囉唆）。繼續戴頭盔：文句夾雜廣東話口語，內容主觀，存在誤解和偏見，當中任何意見只係筆者對自己有意見。

關於日本弓道入門的學習階段，請見筆者另文介紹：

教本上的弓道最高目標：「真善美」⋯⋯ 我就未敢話自己明喇。

筆者的個人體會：日本弓道承傳了「禮射」 ——具有儀式性、表演性的射箭，所以只係中靶係唔夠嘅，要有型地射中，仲要穿上禮服，優雅、從容又不失威儀地射中。

只要開始學習就會發覺，同樣的行射，前輩做起來穩如泰山，自己練仿若泰山壓頂，人在震，弓在搖。點先做到舉重若輕？鍛鍊不懈。台上三分鐘，台下十年功。

由2020年開始學習弓道，約每禮拜上一天練習課，到上「的前」花了差不多三年時間。固然因為COVID大流行期間道場被迫停止開放，以及為生活上其他事情忙碌，投放的時間和努力不比其他同門，不過花上三年的時間肯定算慢。

實際修習月數係25個月，各階段的歷時如下：

徒手練習　４個月 素引き　　５個月 巻藁　　１６個月

滯留在巻藁階段很久，練習陷入樽頸，一直掌握不到扣弦動作，跌箭、走火時有發生，很長一段時間令人無法放心自行練習。

如果話，現代運動射箭的學習曲線，係先緩後急的易學難精，我會話，弓道係從一開始就陡峭地拾級而上。

其射法、弓具獨特，不似西洋弓可快速上手，單單係將箭射出去的基礎，也絕非幾個星期就能夠掌握。

縱然理解學習要循序漸進，但「素引」前只可以單憑徒手或橡筋練習，手上欠缺弓箭的觸感和重量，單憑想像的感覺好虛，令人迷惘。而無箭可射自然冇乜成就感，加上其他與「將箭射出去」冇明顯關係的練習，難免會覺得枯燥乏味。

再者，進入下一學習階段的滿足條件未必咁清晰，很容易會有停滯不前的挫敗感，慢慢失去學習動力。再加上道場日常的清潔和維護，有不少體力勞動與dirty work，例如堆安土、鋪草皮、洗廁所、砌傢具、不一而足，很快就會懷疑自己：「我喺度咁辛苦到底做緊咩嘢？」「我抌錢抌時間係來學射箭而唔係做呢啲嘢呀！」

事實上唔少學員「素引」之前就冇再來練習。沒有愛，大概冇辦法堅持落去。愛從何來？我自己都唔知，可能其實冇都唔定？哪天放棄也不奇怪。

以上種種僅為個人感想，學習體驗與個人的學習方法和態度、悟性、學習時期、道場指導風格、溝通方式等等有關，各人經驗肯定會有相當差異。

上文提到，唔少人開始學冇耐就放棄；不過仍然有班充滿熱情嘅師兄師姐堅持練習，「苦工」之餘互相交流學習心得和購物情報。我唔知道佢哋每個人愛上弓道又選擇呢個道場的原因。也許是在寸金尺土的香港出現戶外道場相當難得？或者被館主匪夷所思的人力財力投入程度所感召？又或者單純係自己練習的地方自己維護？總之，目前的道場並非來消費的地方，亦冇人敢公器私用，或者唔幫手但又多多要求。

（本文同步發表在 Medium）