佇高鐵站用台語拆票（台文）

拄著這種櫃台，第一个想法是講華語。抑無按呢，人少的時陣，講台語，有一擺是早起７點外，人誠濟，感覺足緊張，我規个講華語，彼陣若講台語，敢若我佇咧共人亂，哈！

有當時仔講華語，有當時仔講台語。有一擺想著，車廂內的放送，有４種語言，in應該有受著訓練，想著這點了後，就攏用台語講。櫃台內面賣票的人有人應台語，有人應華語，聽有就好。閣慣勢一位佇外口講台語的所在。

這兩冬，佇客運站拍車票的時陣，礁溪佮台北這兩爿攏講台語啊！（一開始佇礁溪站講，幾若擺了後，才佇台北彼爿講）

我誠少出去佮人鬥陣，來算看覓，我講台語的所在：

￭佇厝內；

￭買物仔的時陣，用台語問；

￭拆車票用台語；

￭佮人講話的時，用台語講，對方可能嘛改講台語；伊若繼續用華語講，表示伊聽有，我就繼續講台語；伊若聽無，伊會問。其實逐家攏聽有；

￭佇捷運車廂內底，欲落車的時，有人窒佇我的頭前，進前攏用華語講：「借過。」前幾工仔想著，「借過」本來就是台語，我規氣用台語講：「借過」，等in徙位，我閣用台語講：「多謝！」

￭靜坐冥想的時，嘛用台語詞引導，袂曉講的詞，結束了後才閣查教典。

￭那講的時陣，嘛那想這字欲按怎寫？袂曉寫的，有閒的時才查教典。

慣勢講台語進前，需要一段時間的過程練習，講起來是誠好笑。無佮人交陪，就家己講予家己聽。嘛真多謝網路，會使看人寫的，嘛學較緊。（11/18修改）

（2023.11.17.）

請指教！

註：教典