［性別講看覓］—同性戀若袂使結婚，有可能……

一般的人是查埔愛查某，查某愛查埔，毋過有一寡仔人是查埔愛查埔，查某愛查某，外國的統計是量約仔有一成。

愛情、情慾是誠直接感覺的代誌，欲愛啥人，是無法度勉強的。有人是雙性戀，同性、異性攏會使，就是愛這个人，無管伊的性別。異性戀的人是較濟爾爾，毋是一定的，動物中嘛有同性鬥陣的情形。

以早，北一女有一个校長講：「我們學校沒有同性戀。」是伊毋知，毋是無；有的爸母講：「我的囡仔無可能是同性戀。」是伊的囡仔無講，毋是無。

同性戀的代誌，台灣這幾若年吵來吵去，新聞刊遮濟，同婚嘛通過５年矣！毋免閣講，我欲講的是，咱轉去同志袂使結婚的時代，咱家己，抑是序細可能拄著的代誌。

同婚公投，抑是佇辯論彼幾若年，我真想欲揣遐反對同志結婚的人當面共in講，毋過彼當陣仔，我的身體無好，嘛無當面拄著嘴講反對的人，抑是拄好的機會，我嘛無彼个氣力專工去講。

我欲共遐仔反對同志結婚的人講的是：

「若是同志袂使結婚，in為了家庭應該愛結婚的壓力，會去揣一个人來結婚，予爸母交待，抑是佇社會、公司內面莫予人感覺伊無結婚誠奇怪，彼嘛是壓力。你的後生，抑是查某囝可能拄著這款人。

你的查某囝歡歡喜喜結婚了後，感覺我的翁婿敢若無誠愛我；後生無細膩佮女同志結婚，感覺某無啥愛插我，對我誠冷淡。囡仔生落了後，這个感覺愈來愈明顯，有的人一世人攏毋知影伊的翁，抑是伊某彼个秘密；有的人幾若年了後就知影。」這是誠不幸的，本人希望的幸福人生佇佗位？

我的朋友講，伊有一个朋友予伊的翁騙，結婚，生２个囡仔了後，才知影伊是男同志，落尾離婚，伊翁離開，攏毋插，伊一个人𤆬２个囡仔，愛家己賺錢，經濟足歹。另外一个朋友講的是，離婚了後，大家佮大官來搶囡仔，in就是愛後生結婚、生孫，彼个有夠衰尾的查某人辛苦生囝、𤆬囝的結果是雙手空空，啥物攏無。

有的女同志佮查埔結婚了後，將伊的同性情慾壓落來，一世人平安過去。有的人壓袂落來，幾若年了後，閣出去揣女朋友（有人是隱瞞的，偷偷仔來；有人是有予翁知影），in嘛願意共囡仔𤆬大漢，毋過拄著情慾的對象佮囡仔的老爸無仝人，是人生誠大的困難。

異性戀的人，無細膩佮同志結婚，是不可能幸福的，爸母無相愛的囡仔嘛誠可憐。若是同志袂使結婚，每一个人攏有拄著這款不幸的可能。所以，予相愛的人去結婚，in就毋免因為予人逼，凊彩揣一个人結緍，等於騙人，害著幾若个人。

毋是同婚通過，同志會使結婚就天下太平，有的人猶是毋敢去登記，毋敢予人知影伊的伴侶是同性，驚予人用奇怪的眼光佮態度對待，只要做人的爸母，一定愛in的後生、查某囝結婚，生囡仔，「假結婚」的代誌猶原袂煞。

●上好按呢問

咱若拄著查某囡仔，問伊：「你有男朋友無？」是預設伊是異性戀，無的確伊無男朋友，伊有女朋友，按呢伊袂按怎應你？對查埔囡仔問：「你有女朋友無？」嘛是仝款的意思，預設人是異性戀。

上好問：「你有佇戀愛無？」「你有伴侶佇做伙鬥陣無？」表示你是有概念的人，伊會看in的交情，共伊佇戀愛中的歡喜共你分享，抑是拄好佇失變艱苦，嘛會使對你哭哭一下，予伊的心內較快活一下。