毋是日本時代，是二二八

阮老母以前講的：

「暗時仔，阿公攏袂使睏佇眠床頂，愛覕起來。早起時仔，天咧欲光的時，有人𤆬 （tshuā）兵仔來，指講：『這間。』兵仔挵門，門開，入去共查埔人掠走，真濟人就按呢無轉來。」阮外公的兜是日本宿舍，地板徛懸，閣有天篷，通覕的所在較濟。

「有一工，阿公的一个朋友，攑一支銃來，講欲寄囥佇阮兜，阿公毋予伊寄，若有人去報案，人來厝內搜著，彼就害矣！不得了的代誌。」

阿母按呢講幾若年，有一擺，伊講煞了後，我問：「彼是日本時代？」

「毋是，二二八。」講規半晡，我一直想講是日本人做的代誌，原來毋是。

自彼擺了後，阿母就無閣講遮的代誌矣！我嘛毋知影是啥物原因無閣講，伊嘛無共我解說啥物是「二二八」？其他的，伊毋捌共我講過的代誌，攏認為我毋捌，無想著我有去學校讀冊，我家己有看冊，毋是攏毋捌。「二二八」這个詞，伊干焦講過彼擺，就恬恬去，毋捌閣講，嘛無問過我知影啥物是「二二八」無？

伊講話就是按呢，無頭無尾，想著啥就講啥，過程講甲足詳細，毋過無講伊咧講佗一件代誌。