唔知有幾多人會食早餐？喺香港生活食份早餐都好似好奢侈咁。唔係因為佢貴，係因為由出門口返工到踏入公司門口，當中嘅阻礙可以係五花八門，鑊鑊新鮮鑊鑊金（除咗地鐵礙誤同九巴甩站，呢兩單就行常事），每次明明最多30分鐘嘅行程，返到去其實都已經過咗45分鐘，試問仲點去食個Good Morning？
不過香港地勝在有小舖嘅存在，佢哋永遠都會係香港人有需要嘅時候伸出援手，整份快靚正嘅三文治出嚟，加多杯熱飲，真係暖到返公司。
其中我想講嘅例子，就係返工途經嘅一檔小食。即整嘅三文治，份炒蛋一定熱過你係堂食嘅「大家活」或「老麥」嘅炒蛋，加多杯鴛鴦廿蚊仲有找，唯一麻煩啲係佢只係收Cash唔收八達通。係就係要等三四分鐘，咁你等紅綠燈等Lift等車都無咗喇，有咩所謂。不過我知有好多人都打緊份好工，可以喺開工時間喺自己個位到放底碗落嘛麻油嘅餐蛋丁，邊食邊Check Email，我係會羨慕你，我亦都體會唔到呢種優質生活，所以餐蛋治已經係終極，鴛鴦可以倒落個杯到唔覺！餐蛋丁呢啲好嘢⋯⋯收唔埋！特別係當你上司都食緊凍冰冰嘅三文治個陣，佢會好Hurt！
「我條靚係度食餐蛋丁，我就連想叮一叮熱份三文治都無時間，做咩鬼嘢？佢時間管理一定好好、工作能力好好啦？俾多啲嘢佢做！」成件事好正面。
講返餐蛋治，其實對我嚟講係童年回憶嚟。係小學個陣，返學途中一定有個拉住買餸車嘅靚師奶（係真係幾靚），佢會一早起身整定幾款三文治，例如腿蛋、餐蛋，芝腿、吞拿魚嗰啲，總之就最基本個三四款，我就次次都會要份餐蛋治，無嘢飲都只係收五蚊(真係清朝咁嘅價錢)，雖然我個時每日收入得十蚊，我都願意俾一半日薪去買呢份三文治，因為覺得係值！
返嚟現代，你覺得有幾多份早餐係值廿蚊？唔好講凍嘅快餐式早餐，佢哋連午餐個啲即叫即炒都可以係凍住咁俾你食，最慘係仲要等佢炒，我真係唔知點先可以做到即叫即炒個凍嘅炒飯俾你，又係能人所不能嘅事！咁個一刻，你就知道你唔可以要求啲咩，唔好話食唔食得夠健康，食你唔死咪當賺咗一日。當然工廠區有好多選擇，只要你唔介意用鹽嚟餸米糊……又或者係餸穀物……大家知，佢哋煮嘅飯多數都係好偏激，佢同哋態度一樣，但你都會諒解佢哋，因為真係收得平，你唔會挑剔佢。所以係個時時候，我係會好掛住呢份好好味嘅餐蛋治。有時呢一份早餐，係重要到令我可以唔洗食午餐，捱到三點三，又係另一個天堂！炸髀、薯條、西多、熱狗，就算係個麵餐細碗咗，叫兩份都平過食份正常嘅午餐！不過聽落好奇怪，三點三邊有時間食咁多嘢？呢個時候，有兩樣嘢可以幫到你。第一個係煙盒！可以係無煙，只要你行出去嘅時間，係身到攞一盒堂出嚟show俾大家睇下，睇唔到嘅就用手指拍兩下，等人聽到你去邊到做啲咩。大家都會放你走，老細都唔夠阻你。因為全城禁煙嘅時代，室內要保持空氣清新嘅關係，無人敢阻你去排毒。
全城室內禁煙最大嘅好處，除咗串合咗志明與春嬌之外，就係製造Tea Time，喂你老闆都好清楚，食支煙，宜家係要離開公司等Lift落到樓下過埋隔離街穿入去兩幢大廈條隙到先有個垃圾桶蓋俾你打下邊爐。單單呢個過程都已經用咗10分鐘！而呢一個時候你就需要第二樣嘢，一個做「到會OO」嘅朋友！
大家都可能試過叫外賣，會專人運送個種，你係絕對唔明白，點解係樓下送上嚟都要成個鐘嘅？原因就係佢哋送之前會打個邊爐，之後你就會發現志明與春嬌戲入面講嘅嘢係真架！佢哋同你Friend底，真係會開心share個客嘅雞翼薯條俾你食架！再唔係咪佢餸開邊間，你搭單餸埋，佢又有煙食，食舖又有生意，三家都有著數。何樂而不為？
講講下早餐，無喇喇寫到下午茶。不如寫埋晚餐同宵夜喇？
咁又唔好，因為放咗工，就係自由自在嘅時間，做咩都得喇！無咩好講。
「不過認真一提，以上內容全部虛構，我是十分認真工作的員工，上司老闆客戶也是世界級的好！我十分熱愛我的工作，辦公時間內會專注做事，直到完成一天的工作才會慢慢離開。」
以上說話致給認識我本人的老細及上司
搵食唧~~
完
作者：多媒體廢作人
作品：2016《叛神軍團》、2016《Slow Music》、2016《筆示驅魔傳》、2017《DSE幻想校園》、2017《格子控的執著》、2018《混個半神當就這麼難嗎？》。個人網：https://andy729hui.like.community/
