最近睇返自己嘅文，突然發覺原來都好耐冇寫口語(廣東話)嘅文，內疚完之後，就要行動，於是就有咗呢篇嘢。
而家動筆寫呢篇文嘅時候，正係五點半至六點嘅黃金塞車時段。塞車嘅憂鬱，唔同地方都有自己嘅演繹方式。而屬於香港嘅，就有分狗鐵、巴士同私家車三大類。個人覺得若論塞同迫鐵路，日本比較值得講，香港狗鐵又貴又廢，最重要係冇日本嗰種推人入車廂嘅震撼畫面，所以唔多想講。另外鄙人為一介廢青，冇車亦冇車牌，冇機會喺私家車入面體驗車笛奏鳴曲，寫唔到呢方面嘅鬱躁。
有見及此，我今次係寫塞巴士嘅哀愁。
塞巴士嘅情況，理所當然，分坐同企兩種。由於企實在係慘得嚟又簡單 — — 咪即係罰企之餘仲要同慣性對抗囉，因此冇乜嘢好寫。
至於坐的話，就不得不提個人習慣。基於遺傳問題，我深得阿媽真傳，一上巴士，就會瞓覺。兩眼一開一合間，已經到站，夠鐘落車，彷如打機用傳送點一樣咁方便。呢點由細到大成日俾我老豆笑。
睇到呢度，可能你會即刻有個疑問：「既然你話自己一上車即瞓，噉呢篇文係你夢遊嗰陣打嘅？」喺度解釋返，我呢個一上車即瞓嘅技能，自從我買咗智能電話同上咗台之後就慢慢冇咗。無他，手揸住部機，你可以做嘅事實在太多，玩玩吓就夠鐘落車。我哋有咗智能電話之後，生活快咗方便咗，但係時間亦都少咗，箇中原因個個不同，然而殊途同歸。
不過講還講，有咗部機之後，塞車嗰陣嘅抑鬱又的而且確少咗。理由好簡單，就係你唔使再好似以前噉只能望住窗外面慢慢移動嘅風景。上Facebook、Instagram、X登，再唔係打吓機，聽吓歌，塞兩三個鐘都唔係問題啦。你要擔心嘅只係你夠唔夠電同使唔使去廁所啫。
返返嚟，上述嘅情況只係適用喺頭幾年。如果講緊近一兩年嘅我，其實搭車嗰陣主要都係瞓覺。同時間，喺我嘅觀察，雖然車上面的而且確有人用電話，但係主流嘅仍然都係瞓覺。返工返到要喺車上面偷時間休息，或者呢個就係香港人嘅悲哀啦。
講到瞓，喺車上面瞓教，其實都係一門學問嚟。事關你唔需要好似企咁辛苦，但係你一瞓著咗嗰陣，都係唔知自己做緊咩㗎嘛？先唔好講擘大個口流晒口水嗰啲，始終只要你啲口水唔滴到人嘅，都唔影響人嘅，最多樣衰啲啫。只不過我見過唔少人，係會瞓埋過人哋嗰邊(包括我自己在內)。而弔詭嘅係，通常瞓到歪嚟歪斜嘅都係呀叔，或者少數後生(睇你好唔好彩同唔同我同車)。反正我就未試過有女性瞓咗埋嚟(不限年齡)。呀，其實都冇乜女人會坐埋嚟我隔籬位(笑)。
上面講過，我而家搭車嗰陣都好少用電話，其實諗深一層，呢個講法係唔準確，甚至係有錯。因為我只係唔會再點用電話嚟打機——唔知點解，唔係好鍾意玩音樂遊戲以外嘅電話遊戲，但係一玩音樂遊戲，我就會出好多手汗，所以都係不能多玩。結果我最常都係用部電話嚟聽歌。最近搭車返屋企嗰陣都係聽松任谷由実喺2016年推出嘅專輯宇宙図書館。最大原因主要係因為香港已經開始入冬，五點半至六點呢呢個時段正處於地面開始黑，但係天邊仲有啲餘輝嘅時間，非常適合聽呢隻碟。若然有聽下日文歌，又會喺呢個時段放工放學嘅人不妨一試。
