第五回：US$100K實戰倉大跌市中入貨
在高人 (?)Z的指點下，開倉第一日已經入咗唔少貨，當日剛好遇上美市大跌，看到已入貨全線價格下滑，心頭不禁一涼，誰知高人竟對我說：你嘅運氣唔錯，自從市場從 COVID19 逐漸恢復之後 ，啲平貨已經越來越少，起碼少咗九成， 再過一排 ，可能冇曬平貨， 只有合理價或者冇咁貴嘅貨， 如果係咁嘅牛市， 其實係一個唔係咁好嘅投資環境 。所以一般人遇到股災，會好唔開心， 但係如果我遇到， 就會成為一個人格分裂嘅人： 一方面自然反應就會係： 慘！個倉好傷噃！ 心情唔好 。但另一方面， 「智慧」話畀我聽 ：好呀！ 發達啦 ！ 可以預期嗰啲好嘢同埋唔好嘢( 即係受當前因素影響而應該跌，同埋主要受氣氛影響而 其實唔應該跌嗰啲 ) 一齊跌， 咁先有平貨執。道理唔難明 ，不過實際操作上係要好強嘅修煉， 好似練九陽神功咁， 好多層， 每一層都要修煉突破， 亦好容易走火入魔，以後有機會再同你詳細講。(第二日見到大部分貨已經開始回升，心情亦放鬆咗。)
阿木：咁可唔可以講下點解叫我入嗰啲貨嘅原因呢？
高人(？)Z ：先講 MYI 及MQY。 呢兩支都係投資於美國市政府債券嘅CEF (封閉型基金)， 由 BlackRock (全球最大資產管理公司之一) 管理 ，有良好聲譽。 美國市政府債券，本來就係十分穩健嘅項目，市政府違約率甚低， 而這兩支嘅投資級別債券都佔其組合85%以上，可謂穩健中的穩健。另外， 呢兩支 CEF 都唔駛交美國股息稅， 而在現今 0息嘅世界，竟還可享有年利率 4.14% / 4.57% (以入貨價計)嘅利息(重係月月派息)， 兼且比資產淨值 NAV 存有折讓 ，實在係「抵」。
再講下 MPW： Medical Properties Trust。 MPW 係一支 一般人所熟悉嘅 REITS 類型 - equity REITS (房地產投資信託基金)， 主要投資於全世界嘅醫院物業， 其中約六成係美國，兩成係英國， 其餘分佈於歐洲/澳洲等。 佢有專業管理， 通常租約期甚長， 租金收入有長期保障， 例如近日收購的佛羅裡達州產業，租賃期直至2041年，期間有依通脹狀況而加租嘅條款。 MPW 策略進取， 近來努力收購， 係呢個低息又通貨膨脹嘅時代 ，用快速貶值嘅 「錢」去換取不能印出來嘅「物業」， 實在係一個好嘅策略。依買入價計，可即享有( 除股息稅後)年利率約 3.73% 嘅利息回報， 雖然並唔算高， 但考慮及其加租及升值潛力， 實在係有良好值博率嘅項目。
阿木：咁其他嗰啲呢？
高人(？)Z ：....... (想知道請繼續關注阿木嘅blog)
