（呢本書有提供官方網站試讀）
素聞呆總打過好多份工，但寫書一事佢一直無講，直到出版社FB公佈封面嗰下先知道，趁住書展就去捧場。
出嚟打過一段時間工既人，就會明白書裏面嘅心得係非常實際嘅建議，而且言簡意賅唔會兜大圈，絕對唔係啲知名巨商活過半世人想留低一兩本用自己三七臉繑住雙手微笑做封面嘅名言雋語書，或一味sell正能量往前衝唔怕蝕底就有回報嘅心靈雞湯可比。
自問唔可以厚住臉皮自稱職場新鮮人，有啲教訓已經喺挫折同被背叛之中學到，睇呢本書時就相當有共鳴。但有啲位未諗通，埋藏喺心底，都可以畀作者輕輕化解。例如佢指出職場裏面所有人各自都有自己嘅目標，見識過有個人嚟返新工係為咗結識戀愛對象，幾個月之後無收穫就拍拍屁股辭職走人；我就明白，既然啲目標係可以咁唔關工作事，面對啲同事上司下屬客戶嘅各種行徑，心態實在唔使太過執著。乍看短短幾句，其實係作者喺職場打滾多年所領悟出嚟嘅心得，有助讀者喺各種情況下維持心情同工作質素穩定，十分值得一睇。
作者：呆總（FB專頁：呆總的碎碎唸 ）
出版：星夜出版（官方網站）
出版日期：2021年6月
購自：2021香港書展星夜•夢繪攤位
