編輯嚴選

【開講讀者投稿】：何玟珒〈傷心大樓〉

　　畢業了後，無法度繼續蹛佇咧學校宿舍內面，愛去外口稅厝。為著揣著心目中理想的房間，彼當時我看過真濟奇怪的厝。有一間佇咧舊大樓內底的套房，我看了真佮意。大樓的位置交通利便，套房的空間開闊，一樓閣有管理員佮電梯。傷[1]重要的是，伊的價數是我會當負擔的程度。我好奇這間套房的價數遮爾仔俗，哪會猶未租予別人？我問彼个𤆬[2]我看厝的人，伊講這个大樓起好了後，到今年已經三十外冬矣。

　　「所以？」

　　「較早的時陣，臺南的大樓無遮爾濟，二、三十年前，對庄跤來市區拍拚 的人若是生活較艱苦，想袂開的時陣，定定就會揣較懸的建築，對遐跳落來。」伊偷偷看我的反應，「二十年前捌有人自殺，對這棟大樓的樓尾頂跳落來……毋過，彼佮這間房間無關係，這間套房毋捌出代誌。」

　　「二十年前……若按呢，這幾年來，這棟大樓敢猶有發生啥物代？」 「……三樓幾年前捌有人佇房間內底吊脰[3]。毋過，彼嘛佮這間房間無關係。」伊按呢佮我講。

　　行出大樓，我雄雄想起兩年前我捌租過的房間，彼當時我的憂鬱症頭嚴 重，規工覕佇咧房間內底，頭殼內底定定咧想自殺的代誌。彼个時陣，我想欲 死佇咧房間內面，佮規个外口的世界攏無交插。

　　這馬想想咧，彼當時，我若是真正按呢做，厝主一定會感覺家己真衰尾。我無想欲予別人歹過日，無適合的所在會當自殺，所以我活落來過日子。只是按呢。選擇生存抑是死亡，彼攏毋是啥物了不起的代誌。

[1]「傷」：Siōng。

[2]「𤆬（tshuā）」：帶領、引導。

[3]「吊脰（tiàu--tāu）」：上吊自殺。

【寫流成河】為刊登讀者投稿的專門欄位。作為本期《開講Khai-káng》的壓軸系列，為的就是鼓勵台文系學生嘗試寫作——我們認為，持續書寫不僅能夠精鍊筆鋒，更是梳理思維與觀點的必要途徑。 《開講 Khai-káng》期許你我在這條思想與對話的長河中，能透過文字留下清晰可見的刻痕，讓河的路徑不只是靜靜流過，而有粼粼波光。

【寫流成河】是專門刊登讀者投稿ê欄位。這个專區成做每期《開講 Khai-káng》ê煞尾，是為著鼓勵台文系ê學生來寫作——阮認為，不斷ê書寫m̄-nā會當磨練文筆，koh是整理思維kah觀點ê必要途徑。 《開講 Khai-káng》期待大家tī這條思考kah對話ê溪流內底，會當用文字刻下一痕koh一痕ê記錄，予溪水毋若是恬恬leh流落去，koh閃爍著淡薄波光。