一期一會

一期一會，日文：いちごいちえ，羅馬字：Ichigo Ichie。一個源自日本傳統茶道文化嘅詞語。意思就係一生人入邊只有這一個機會，要好好珍惜。當中嘅＂一期＂，並不是大家以為的期間、瞬間、一日等等短暫的時間，而是指一生人由出世到死亡果一個期間；而＂一會＂是指相會，那一刻在做的事情。

呢一個詞語嘅來源眾說紛紜，但普遍都係認為是來自日本傳統茶道文化。相比起現今社會，以前嘅社會雖然無今時今日正在面對嘅疾病，但是因為科學比較唔發達，甚至乎對於疾病沒有任何研究，所以死亡率偏高。而＂一期一會＂正正就係向唔同嘅人說明，即使每日都再做相同的事，相同的景色，但是每日也許也會有少許不同，而果一個瞬間，一生人只會面對一次，錯過了就無得返轉頭。而日本傳統茶道文化入邊，每一次嘅會面都係獨一無二，因為沒有人知道下一次可唔可以再會面（需要明白，以前嘅日本無依家幾咁方便，由東京到大阪要步行3-5天，而且當中更有機會遇上山賊），所以每一次能夠見面嘅時刻，大家都會好好珍惜，因為無人知道會唔會係最後一次見面，要好好活在當下，享受當刻。

相比起我上次講嘅＂一生懸命＂，＂一期一會＂呢一個精神雖然仍然存在，但係講嘢已經越來越少，通訊科技嘅發達令到人與人之間嘅距離拉近，好簡單一個訊息已經可以搵到朋友出來見面，或者簡單搭一程長途巴士或者內陸飛機已經可以到達對方的地方，而且加上現代人生活節奏急促，要坐定定、心無雜念咁樣好好同朋友見面，我相信好少人可以做得到，所以呢一個精神其實亦都開始沒落；而且過度嘅商業化包裝，令到呢一種精神變得蕩然無存。（呢個之後再講）

曾經詢問過一個日本土生土長的朋友，到底甚麼是一期一會？雖然我對佢回答嘅每一個字我都明白，但係當要明白果種感受嘅時候，我完全想像唔到，應該係話理解唔到。對於日本傳統嘅茶道文化，大家嘅印象可能係食粒和菓子，飲一杯好苦嘅茶，就係咁多。但係其實各種動作背後都有唔同嘅意義。首先就係對於食果粒和菓子，我相信對於大部份人黎講，都係會得出一個結論，就係好甜，超級甜。雖然大家成日都係度講笑咁話，台南人嘅甜度，係其他地區嘅人不能夠接受。但如果同日本傳統茶道所提供嘅和菓子相比，絕對係小巫見大巫。以前嘅人，因為覺得純粹喝茶好傷胃部，所以會在品茶之前吃和菓子暖胃，但時移世易，除了因為覺得和菓子和茶十分配合之外，更因為可以突顯之後所飲的那一杯茶的味道，所以通常和菓子店會弄得特別甜。而果種甜其實唔係正常人可以接受，對於我地來講，食糖可能都只係純粹為了攝取糖分或者想食啲甜的東西；但係果一粒和菓子，食完之後有一種黐口嘅感覺，除了會令到你所有味蕾都覺得甜之外，更會有一種好膩嘅感覺，絕對唔係好受。當品嚐日本傳統茶道嘅時候，雖然可能會因為地方唔同而提供唔同嘅茶，但是主要都是離不開抹茶、煎茶、玄米茶、昆布茶、蕎麥茶等種類，不過最主要的還是抹茶。當大家沖茶嘅時候，都會發現一個類似掃把嘅物體攪拌，果一個物體叫做「茶筅」，是沖茶時最為重要的道具，作用就係均勻將茶葉融入熱水當中。之後就係開始飲用，因為通常茶和水的比例會開得比較濃郁，所以味道亦都會較為濃烈，絕對有助解除首先吃和菓子油膩的感覺。當慢慢細味品嘗嘅時候，就會有一種放空嘅感覺。一路西美品嚐嘅時候，同朋友一起談笑風生，果一種活在當下嘅感覺，簡單來講就係一期一會。

我相信對於我地來說，一期一會真係難以比較理解。首先對於茶來講，如果係便利店買入來飲用，唔好講一期一會呢種咁深層次嘅感覺，我相信果一刻你純粹係為了解渴嘅需求比較大。對我地來講，飲茶呢一個動作可能就真係搵個地方、搵個時間，一個人或者一班人，用熱水沖唔同嘅茶慢慢品嚐，又或者係食完飯之後飲杯熱茶消解油膩。（例如普洱、烏龍茶、高山茶等等）但係始終對於我地來講，飲茶就係飲茶，好難可以稱得上一期一會，始終大家嘅文化背景完全唔同。當然啦，你亦都可以話嗰一刻係對於我哋來講，屬於我地表達一期一會嘅方式。總之就係一種活在當下，珍惜眼前人嘅感覺。

但可惜嘅係，傳統文化不斷受到商業嘅影響，令到一期一會有少少本末倒置。當然，疫情前或者將來疫情過後，你仍然可以去日本感受日本傳統茶道文化嘅精髓，但係相比起古時嘅日本，失去嘅絕對係人與人之間嘅溝通，因為而家你只需要比800到1000円左右就可以享受到一次日本傳統茶道。對我個人來講，就算2000円都唔係一個比唔起嘅價錢。之但係，過度嘅商業化令到整個活動純粹是變成一個體驗活動，完全失去了一期一會當中人與人溝通最大嘅精髓。當然你絕對可以話，我唔識日文，純粹只係想體驗日本傳統茶道文化。當然你係無錯，但當你明白背後嘅故事，你就會感覺得到只是純粹嘅的體驗而不是深刻的交流。不過又好現實，除非你真係識到一個日本朋友，而且仲要係一個日本傳統嘅家庭，如果唔係我都好相信大家應該無緣可以體會到真正嘅一期一會感覺。我唔係想大家心入裏那一團火熄滅，而是你膚淺享受整個過程或者服務，但畢竟對方只是提供服務的人士，難以進行深入嘅交流，那又如何稱得上一期一會？

另一個令到呢個詞語嚴重商業化就係係亞洲唔同地方都有出現，就係大部份商家會在商品上面印上＂一期一會＂誤導消費者，尤其是在季節性商品上面特別嚴重。對於大部份對日文沒有深入研究嘅消費者來講，一期一會可能就係指果一個期間能夠會面嘅意思。例如唔同季節當做嘅水果、夏天限定嘅飲品、甚至乎我在服飾宣傳上面都有印一期一會。當然，絕對唔可以話呢一種宣傳方式係錯，或者將呢個詞語誤會，但係相比起真正嘅意思，絕對係扯不上。容許我調返轉咁講，的而且確係係果一個期間偶然遇見，但畢竟對於大部份食物和飲品，大部份人都只是純粹想品嚐，根本唔會理解背後一期一會嘅真正意義，純粹只係比呢一個詞語吸引，覺得錯過了就沒有可能再一次遇見。我唔會直接用惡劣形容，反而我覺得係一種好嚴重嘅取巧。如果你話佢係咪欺詐？如果以香城嘅商品說明條例來講，佢的而且確唔可以列入欺詐範圍，因為真係期間限定，過了真係未必會再見，但對於這種取巧行為，我個人真的是十分討厭。

另一方面，日本嘅柔道亦都有＂一期一會＂呢一種概念，意思大約係指唔好心存僥倖，唔好諗住有再下一次機會報復，每一次也要視作最後一次，因為永遠無人知道之後會發生咩事。相比起日本其他運動，柔道雖然算係比較安全嘅項目（理論上），但始終牽涉到人與人之間嘅互動，稍有不慎，都會導致身體有嚴重嘅創傷，甚至乎難以康復。所以呢一套精神，就係想學習柔道嘅人每一次比賽嘅時候，都要出盡全力，搏盡無悔，唔好帶着後悔或者遺憾離開賽場。其實呢一種精神都算值得我們借鑒，因為不少現代人，不管是小孩還是成年人，遇到挫折便會放棄，將問題交予其他人便當解決了問題，但到頭來其實無解決過任何問題。雖然我地每日生活都唔係比賽，或者只係好普通出門返工、放工同人迫火車返屋企無限輪迴嘅地獄，但係正如我一開頭咁講，當你細心留意嘅時候，你就會發現原來身邊嘅景色每日都有逐少逐少嘅改變，呢一種正正就係一期一會嘅精神之處。可能你未必發現到，但當有一日你感覺到能夠活在當下嘅時候，你就會明白呢一種精髓。

相比起我之前介紹過嘅一生懸命果一種努力不懈的精神， 一期一會彷彿已經變成左一個商業用嘅詞語，雖然本質沒有太大改變，但來到現代嘅時候，仲有幾多人明白背後嘅真正意義？