咁我而家都開始有鋪儲Steam game癮，不過暫時仲未叫忙到機都唔得閒打，得閒咪開黎玩兩野咁。比左錢買左啲0同1齋儲唔郁，除左有條件退貨之外亦賣唔返出去，抽空context咁講聽落仲衰過買NFT…
之前見平就買左隻Avalanche Studios出品嘅舊game—Just Cause 3，已經係7年前嘅game。2018年出埋第4集，但係我自己真係買呢隻game之前完全未聽過呢個IP……淨係計知名度，2015年有Fallout 4、Witcher 3、Dark Souls 2，2018年有 Assassin’s Creed Odyssey、Monster Hunter World、Yakuza 0，除左生不逢時都唔知點形容。
Just Cause好似已經係呢間studio嘅招牌，咁唔識呢隻亦都好難識其他啦，佢其他product比較有印象就係Rage 2，由好多人好期待到出黎個評分變到褒貶不一。係，冇啦。
順便講下發行商SE。我對SE嘅印象從來都得佢地嘅招牌FF(利申：任何一代都冇玩過)，同埋啲電話IP全部都純粹係用黎吸開發遊戲嘅經費，咁作為比佢啲電話IP吸過嘅一群(係，就係百萬亞瑟王，好彩已經算走得快)，真係難免對呢間公司印象比較偏負面，仲要真係冇乜玩過佢啲PC/Console game，真係同呢間公司有緣無份。
原諒我玩嗰陣淨係掛住炸人拆樓完全冇cap過圖，呢篇文就算有圖，高達八成都會係喺google偷返黎。
咁講返正題。Just Cause 3係一隻點樣嘅遊戲？要形容就好簡單：拆樓，爆炸，恐怖份子simulator。雖然呢集個劇情係咁樣：
喺上集劇情結束6年後，主角Rico返到鄉下Medici—一個虛構嘅地中海共和國。該國喺Sebastiano Di Ravello將軍嘅軍事獨裁下日漸敗落。為左恢復同胞嘅自由，Rico同舊朋友Mario Frigo領導嘅革命軍聯手，試圖推翻Sebastiano嘅統治。
將wiki第一段轉左做廣東話，本身想轉哂但係太長又冇必要就算數，其實就同啲普通動作片嘅劇情相差無幾，好直接，亦都唔係重點。你可能會問：「明明主角係對抗獨裁政權，咁點解係恐怖份子simulator啊？」
因為呢隻game除左個gameplay係好典型嘅動作片，連劇情都係好典型嘅動作片，直筆甩—開場同啲friend trash talk互屌兩句、無啦啦同啲三唔識七但係志同道合嘅人並肩作戰、無啦啦又有隊友混戰之中死去、無啦啦又有啲之前已經插哂flag嘅人終於出左事……除非你一生人入面完全冇睇過啲動作片爽片，唔係嘅話劇情上基本係毫無驚喜。亦因為咁，基本上冇人會期待呢隻game嘅劇情，我都係玩左一排先發現有得skip之後，從此一入劇情就skip唔再睇。
個人黎講唔睇劇情有兩個原因：第一，冇玩過前作嘅情況下，喺個系列中間插入去，會睇到一頭霧水唔知咩事都人之常情啫，當然你可能會話「咁你去追返以前啲劇情咪得囉」，但係個動機始終都係for fun唔係背書啊，真係冇呢個興趣。第二，雖然劇情以打獨裁政權為軸心，但係九成時間都真係同我上面講嘅一樣：拆樓，爆炸，恐怖份子simulator。
呢個位要駁返去gameplay嘅部份。介紹左玩家扮演嘅Rico先—一個有wingsuit可以滑翔(甚至可以搭載噴射功能，技術上可以永遠唔落地)、戴住隻grappler可以成個spiderman咁飛黎飛去同倒吊、識用任何槍械、由電單車到直昇機噴射機都識揸嘅萬能傭兵。
除左以上特點，仲有一個特別之處係，Rico真係好硬，我講佢個body。佢可以同個機槍佬對槍，互射射足四五秒都未比人射死。呢個對隻game黎講係優點同時係缺點，因為佢嘅tankiness係fix死左，其他技術可以透過解挑戰拎gear去升級，就係唯獨是呢樣無辦法改變。同時，玩家面對嘅敵人嘅火力越黎越強，由普通可能幾個著軍裝，連避彈衣都冇，你射佢一下就死嘅，拎枝AK咁嘅卒仔，到後期成堆成隊軍隊咁full gear，硬到拎手榴彈炸唔死，甚至拎枝RPG兜頭射埋去都冇事、一堆無人機追住玩家黎射、直頭令部座駕半無敵嘅能量盾，對習慣左前期好似玩無雙咁亂打都贏，到後期會比人射到懷疑人生，固定嘅體質真係會令人感覺個落差有啲大。
然後隻game嘅主要玩法，就係控制設定得咁強大嘅Rico去唔同嘅據點、城市、村落，完成指定嘅任務，例如拆左Sebastiano嘅雕像，拆左啲發電站，拆左啲propaganda喇叭同宣傳車，完成哂就可以「解放」個地區。係，全部都係拆野，同埋隻game真係寫liberate。
然後到底關恐怖份子simulator咩事？就係因為Rico嘅設定係咁強大，去到邊個目標都係做破壞王，啲地板同啲樓又炸唔爛，啲敵軍又會源源不絕咁樣趕過黎支援(送死)，作為反抗軍唔小心炸死平民亦都唔知點解冇懲罰愧疚冇責任，所以玩家只要心理變態啲就可以玩得好草菅人命，所以先會咁樣去形容。筆者完全冇打算講「咁樣做就會變恐怖份子」嘅意思。順帶一提，真係唔建議去學Rico，唔係想講啲咩，係真係物理上唔建議，除非你真係咁趕住去異世界，咁我冇辦法阻止你……遊戲還遊戲，現實係真係冇人可以好似佢咁硬淨。
已經大概咁介紹左隻game，係時候講下優點同缺點。
講真，玩左接近40個鐘，基本上過哂啲劇情，已經拆樓拆到有少少麻目左，要數優點真係有少少難。
最大嘅優點：Open world。話就話有主線任務，但係玩家係絕對可以無視哂佢地，去過哂啲支線先，甚至解放哂所有地方(唔少任務嘅前置條件都係要佔領左指定地區嘅指定數量地點先)再返轉頭跑主線。亦都可以好似我上面咁講，心理變態啲，玩法自由啲，隨心所慾咁拆野同炸人。我試過就咁拎住把機槍企喺個路中心，見野就射，毫無目的毫無收穫咁射左半粒鐘，真係幾紓壓。
再黎就係有稍為考慮平衡同多元性。呢隻game雖然係預左人開無雙，但係就唔會有比玩家一種武器由頭打到尾嘅情況，除左啲經典嘅步槍手槍散彈槍，用槍法作為最大嘅武器。RPG同Rocket Launcher呢種武器固然會有同現實一樣嘅限制—威力強大但係彈藥數少，就算係啲唔現實嘅武器都會有限制，譬如解完DLC任務拎到嘅武器Eden Spark，係一把可以喚雷嘅槍。只要用把槍指定一個點，嗰個點幾秒後就會持續落雷，直到把槍能量耗盡。咁佢嘅破壞力固然強大，但係對住稍為硬嘅建築物同敵人，甚至喺室內，玩家都要用其他武器(玩家可以帶住三款槍喺身)去戰鬥，令戰鬥冇咁單一。
然後缺點就犀利。首先呢隻game雖然三個平台同時發售，但係PC版用鍵盤玩就硬係會水土不服咁樣，揸飛機嘅制set得極度奇怪，對遊戲過程相當重要嘅wingsuit更加係可以用難受黎形容。話就話可以改制，但係都係會唔舒服，即係到頭黎都係要expect人用手制。基於呢個缺點，我已經直接放棄去玩啲挑戰拎gear，即係放棄左強化嘅機會同解成就，呢到少計都玩少左1/3 content。
其次就係Open world。上面先講完係優點，咁點解而家又會變左缺點？因為佢open得太離譜，越後面越過份。一個地區可以整到比前面嘅地區大三四倍，但係比玩家liberate嘅地點數量係一樣嘅，即係每個地點同地點之間嘅距離係明顯地長左，下下要行成3到4km。咁到底係一個咩嘅概念？grapple未升級最遠可以一下移動150m左右，陸地黎講電單車同車最快都係180km/h左右，仲要一轉彎就會跌到落130前後，直昇機都係240km/h左右，最快嘅Jet先去到340km/h，即係行3km都要半分鐘，仲未計call rebel drop(主角可以有限次數咁call Mario空降啲武器啊交通工具啊落黎，唔好問點解「空降」可以跌唔爛啲野)、起飛、到目的地之後要搵位降落，成件事係會令人好煩燥。更煩燥嘅位係咩？佢個地圖係大得毫無意義，個地區除左啲比玩家liberate嘅地點，其他地方都係啲雜物，比玩家睇風景架咋……但係，有邊個會想喺貼圖咁普通甚至唔好睇嘅遊戲入面睇風景？
仲有就係多bug啊，神奇物理引擎啊，一啲好舊時代嘅設定啊……真係創作力量同幻想會嚇你一跳。有邊個會估到解除卡進度bug嘅方法係自殺？有邊個估到一部轟炸機垂直掉炸彈可以炸爛自己？有邊個估到2015年原來咁遙遠，仲會有啲因為用緊唔關事嘅A功能，而令B功能唔用得，想用B就要取消左A先得嘅無謂設定？
呢個credit仲要係硬食唔比skip唔比加速，只可以講相當有年代感。更過份嘅係，本身打完Sebastiano，仲有兩個地點未解放，諗住去搞掂埋佢嘅時候，發現個rebel drop bug左，call極都係空氣。我覺得件事真係太白痴，直接提早封game算。
因為隻game劇情好睇亦冇睇，講起上黎都真係幾困難。綜合黎講，Just Cause 3如果要評分，10分會有5.5分。「下？store嗰個位IGN同Forbes嗰堆game評網最低都比8分喎，你係咪唔識打機架？」，咁用2022年標準真係去唔到…本身係覺得啱啱好合格6分，JC3嗰種自由暢快帶點無厘頭的確係爽快。但係諗到啲bug同臨尾夾硬要人揸Jet去打沉啲Jet，我就忍唔住扣左佢半分。總結就係，如果有去到而家夏特咁85% off，而你又好得閒好無聊想有創意咁搵啲野發洩下，呢隻game係值得推薦。
其實會講呢隻game都係因為佢個主題。呢幾年都多事發生，我有一日就覺得，如果冇重新認真思考過呢兩個字，咁呢幾年都真係白過。不過諗諗下，想講嘅野講黎講去都係三幅被，咁啱又冇睇劇情，真係冇咩好講。好建議想思考呢個問題嘅人睇下呢條片。Far Cry可以話係劇情加強版嘅JC都不為過，所以基本上都通用嘅。
完，下次諗到有咩想寫再寫。
