（台文POJ版）
Éng-kòe góa tùi lán Tâi-oân ê bîn-sio̍k-bûn-hòa bô chih-chiap, tit-kàu kū-nî se̍k-sāi chi̍t-tīn chò siā-hōe-ūn-tōng ê iú-chì liáu-āu chiah tau̍h-tau̍h-á khai-sí chiap-chhiok sio̍k Tâi-oân siā-hōe thoân-thóng ê bûn-hòa-oa̍h-tāng.
Chhit-niû-má-seⁿ mā-sī góa thâu-pái chai-iáⁿ ê thoân-thóng bîn-sio̍k-cheh, sui-bóng góa mā bô siáⁿ leh kòe só͘-ūi ê 『情人節』lah！ Thiaⁿ-kóng goân-thâu sī ùi Tâi-lâm lâi--ê, koh kap 「Chò 16 hòe 」 ê bîn-sio̍k ū khan-liân, sûi koat-tēng beh lâi chhōe Tōa-Tâi-pak-khu lāi ū leh chò chhit-niû-má-seⁿ chè-tián ê biō lâi-khì chham-hóng khòaⁿ-māi.
Sin-chng 「義妙聖仙宮」 sī tī Thah-liâu-kheⁿ-khe（塔寮坑溪）khe-kîⁿ khiā-khí ê sè-keng-á biō, biō-lāi-té ê chú-sîn sī Koan-sèng-tè-kun, hú-sū ū Chhit-niû-má, Thó͘-tī-kong, Chè-kong kap chē-chē chiòng sîn-hu̍t thian-peng-chiòng.（chù-kái：góa ū chù-ì tio̍h chi̍t-sian sè-sin ê Koan-im-hu̍t-chó͘ khǹg tiàm biō-lāi pān-sū-toh ê chiàⁿ-tiong-ng, eng-kai sī khai-ki hu̍t-chó͘ o͘h！）
Biō chú-chhî A-chúi-sai pún-sin sī tē-saⁿ-tāi ah, kāng-sî mā-sī Chè-kong-oa̍h-hu̍t ê ki-sin, ta̍k-tang kū-le̍k chhit-goe̍h chhe-chhit chit-kang mā ē chiap Case thè Chhit-niû-má pān-sū chiàu-kò͘ hū-jîn-lâng kap gín-á sìn-chiòng, kái-koat lâm-lâm-lú-lú koh-iūⁿ ê loân-ài chiòng-gāi, ka-têng būn-tê kap cha-bó͘-lâng ê hoân-ló-tāi. Chò--ê chin-chiàⁿ sī ho̍k-bū chiòng-lâng lī-ek chiòng-seng ê sū-gia̍p. Ka-chài in chhù-lāi-lâng lóng ē lâi tàu-saⁿ-kāng, ìn-siōng-tiong ū khòaⁿ tio̍h in khan-chhiú, cha-bó͘-kiáⁿ kap kiáⁿ-sài, hāu-seⁿ kap cha-bó͘-sun kui-ke-hóe-á tī biō lāi-gōa sì-kè bô-êng-chhih-chhah, liâm-mi chiau-thāi sìn-chiòng, oa̍t-thâu hoah lâng tàu chhoân kim-chóa, chún-pī sio-hiuⁿ kap sàng chúi hō͘ ta̍k-ke lim. Chi̍t-keng sè-sè-keng ê biō mā-sī chin nāu-jia̍t, hun-kang chin sūn-sī chū-jiân.
Góa thàn i hioh-khùn ê chi̍t-sut-á sî-kan kā chhéng-kàu chit-keng biō ê kò͘-sū, A-chúi-sai mā chin hoaⁿ-hí kap góa khai-káng kóng-kó͘, kóng i chá-nî khì Chi-ná tú-tio̍h ê ki-iân kap chhù-bī-tāi, bóe-chhiú koh kā biō-lāi-té siōng te̍k-pia̍t ê hit-chun 「kui-lia̍p chhiū-thâu chò ê Hó͘-iâ」 chhiáⁿ lâi-kàu gōa-kháu ke-á-lō͘ hō͘ góa thang hip-siòng kì-lo̍k, hip-liáu koh sûi hiàm in hāu-seⁿ kā sîn-chun kng tńg-khì an-tì. Góa kám-kak tùi in hāu-seⁿ chok pháiⁿ-sè--ê, thâu-pái lâi chia tō lô-hoân in...Chóng--sī, ū kám-siū tio̍h in hoaⁿ-hí koh tiâu-ti̍t ê hó-sèng-tē.
Sî-kan beh kàu 2 tiám-pòaⁿ chún-pī beh pān-sū ah, góa tō seng lī-khui mài kā in chak-chō. 20 hun kòe-āu tńg-lâi koh khòaⁿ-tio̍h A-chúi-sai ê sî, i í-keng chiâⁿ-chò Chhit-niû-má sèng-kà ê ki-sin, iōng kap tú-chiah oân-choân bô-kâng-khoán ê siaⁿ-sàu kap chu-sè leh thè sìn-chiòng kái-tap būn-tê ah. Góa chē tiàm piⁿ-á ná khòaⁿ ná lo̍k-iáⁿ（ū keng-kòe biō hng tông-ì）, che mā-sī góa thâu-pái tī chiah-nī-á kīn ê só͘-chāi koan-chhat sîn-bêng kàng-kà pān-sū, chin-chiàⁿ sī kî-hoàn ê keng-giām. Nā ū ki-hōe lán it-téng ài lâi hó-hó-á thé-hōe chi̍t kái.
