Chìn-chêng khì Pe̍h-soa-tun Má-chó͘ sûi-hiuⁿ ê sî-chūn bat kap hiuⁿ-teng-kha hó-iú kóng tio̍h sòa--loaih beh lâi chham-ka peh-goe̍h ê Ke-lâng Tiong-goân phó͘-tō͘. Kū-nî in-ūi e̍k-chêng pān kah khah kán-séng, kin-nî e̍k-chêng khah thè koh tú-tio̍h soán-kí-nî, só͘-tì ū khah téng-chin teh soan-thoân kap chún-pī.
Chhut-hoat chìn-chêng góa ū seng tī bāng-lō͘ téng-koân chhiau-chhōe Ke-lâng chāi-tē chò Tiong-goân-phó͘-tō͘ ê le̍k-sú ián-piàn, chhōe tio̍h Lāu-tōa-kong-biō kap Sam-sìⁿ-kong-biō ê chu-liāu, só͘-tì koat-tēng beh lâi chit nn̄g-keng khòaⁿ-māi chi̍t-ē.
Hit-kang hó-thiⁿ ji̍t-thâu chin iām m̄-koh mā khah hong-piān hip-siòng, lō͘--lih keng-kòe Ke-lâng-siâⁿ ê ke-á-lō͘ kong-kéng hō͘ lâng kám-kak phú-phú bông-bū, kó͘-chá chhī-á ê khì-bī. Kui pâi ê lâu-á-chhù khòaⁿ-khí-lâi lio̍h-á lah-sap-siòng, tiong-ng chhah kúi-ki sin-khí-hó ê hiān-tāi pān-kong-tōa-lâu, sek-chúi cheng-chha sán-seng chi̍t-chióng li̍p-thé ê iûⁿ-hîn, chhin-chhiūⁿ bô-kâng sî-kan kap khong-kan têng-tâⁿ hō͘-siong thàu-lām hāi góa chi̍t-sî hiám-hiám beh poa̍h-tó...Eh, góa ná leh lō͘--nih chē-chûn？Chū Ke-lâng-chhia-thâu thâu-chêng-tiâⁿ chi̍t-lō͘ keng-kòe bat chhut-hiān tī hì-kio̍k lāi-té ê Thian-kiô, oan-oan-khiau-khiau m̄-chai ē khì-kàu tó-ūi ê hāng-á-lō͘, koân-kē khí-lo̍h ê lâu-thui, chē-chē keng khòaⁿ--khì-lih hiuⁿ-hóe bô kài ōng ê biō-á, góa bōe-su sī chi̍t-chiah sì-kè kiâⁿ-kha thit-thô ê lô-hàn-niau-á, ná sàn-pō͘ ná kám-siū chit-ê chheⁿ-hūn ê siâⁿ-chhī.
Lāu-tōa-kong-biō khí tī-leh chi̍t ê soaⁿ-kiā-piⁿ ê siā-khu ji̍p-kháu, sì-kho͘-ûi-á hō͘ lâu-á-chhù ûi--khí-lâi chhin-chhiūⁿ leh kā biō pó-hō͘ ê khut-sè, biō ê gōa-chhiûⁿ iōng kó͘-á-teng chê-chê pâi kúi-nā chân ná chi̍t-tè âng-kì-kì ê kha-tián, kā siā-khu ê khì-hun chong-hông kah chin nāu-jia̍t, m̄-koh lō͘--nih soah bô khòaⁿ tio̍h kúi-ê-á lâng, kiau-chhia kap o͘-to͘-bái mā chin hán-tit khòaⁿ, kám sī góa bô châi-tiāu khì khòaⁿ-tio̍h ê sè-kài ū khah chē “Lâng” tng teh sin-khu-piⁿ oa̍h-tāng ne？
Soah--lo̍h ùi An-lo̍k-lō͘ kiâⁿ kàu soaⁿ-kha chit-ê chin khoah ê Koàn-chhun-siā-khu（in-ūi siā-khu mn̂g-kháu ê tōa-lâu gōa-piah tah 3 ê KMT gī-goân hāu-soán-jîn ê khăng-páng koh ū 中國青年救國團 ê pó͘-si̍p-pan tī lāi-té）, chit-ê siā-khu hù-kīn ū nn̄g-ê thoân-thóng chhài-chhī-á kap hù-kīn ê lâu-kiàn-tio̍k khiā chò-hóe mā sī chin tàu-tah.
Óng Sai-kiû-niá ê lō͘-tô͘ tú-tio̍h chit-keng chin súi ê thoân-thóng chng-á-chhù hō-chò 「Siu-tek-ki 修竹居」, sèⁿ Tân ka-cho̍k ê kū-chhù, tī 2020 nî ê sî-chūn hō͘ chhī-chèng-hú chí-tēng chò kó͘-chek ài pó-chûn, m̄-koh lō͘-bóe soah bô kè-sio̍k chò chéng-lí, khǹg--leh pàng hō͘ siàn-hong ak-hō͘, si̍t-chāi sī chiâⁿ phah-sǹg.
Lâi-kàu Sai-kiû-niá soaⁿ-kha Su-īⁿ-siā-khu, kui-ê khong-kan lú tiām-chēng kan-na ū piⁿ-á ko-sok-kong-lō͘ ê chhia-siaⁿ lām hong-siaⁿ, nn̄g-chân-lâu ê chhù-bóe-téng chit-ê 70thóng-hòe ê a-má leh nê-saⁿ, ba̍k-chiu kim-kim khòaⁿ--góa, góa kā tìm-thâu kiâⁿ-lé i sûi oa̍t-thâu kè-sio̍k bô-êng i ê.
Siā-khu-bóe tō-sī Sam-sèⁿ-kong-biō, chiah í-chá ū siu chi̍t-kóa óng-seng ê kan-khó͘-lâng, chò-sit-lâng, ó͘-khòng kang-lâng ê pâi-ūi, só͘-í mā hō-chò Gī-bîn-biō, Bān-siān-tông. Tī góa chhōe-tio̍h ê chu-liāu lāi-té Sam-sèⁿ-kong-biō eng-kai sī Ke-lâng-siâⁿ siōng chá khai-sí pān Tiong-goân phó͘-tō͘ ê biō-sī, nā ū kî-thaⁿ chu-liāu bô-kâng kóng-hoat mā chhiáⁿ ta̍k-ke hō͘ góa chai-iáⁿ, chin kám-siā！
