你敢有聽過「乞龜粿」？🐢
【跋大龜 pua̍h-tuā-ku】
你敢有聽過「乞龜粿」的活動？你有去廟裡跋過大龜--無？
阿東我捌佇廟裡跋過幾若改的大龜，幾若百斤的大龜喔！😎
乞龜粿 khit-ku-kué
這个傳統的廟會活動嘛會使叫做「跋龜粿 pua̍h-ku-kué、跋大龜 pua̍h-tuā-ku」，準若佇網路google，會當看著真濟佮「澎湖元宵節 乞龜」相關的資料。啊若是其他地區，可能會佇神明生的時，會有跋龜粿 。像佇阮遮，阮村裡的廟的例，是佇「中壇元帥 Tiong-tuânn guân-suè」(太子爺公)的聖誕祝壽當日暗時跋，定會吸引村民做伙來鬥鬧熱，神、人共樂！
龜粿 ku-kué
一般來講，大龜攏是幾百斤起跳的，在廟宇、村莊的規模，就有大小和書量的精差，內底通常是白米、壽麵，閣有一寡仔糖仔餅。大龜掠外，閣會有「鳳片龜 hōng-phiàn-ku」、「塗豆龜 thôo-tāu-ku」、「錢龜 tsînn-ku」，猶閣有用麵粉酥、傳統雞卵糕做的龜，另外猶有跋發財金！予村民跋轉去，保庇一家大大細細健康平安福氣、趁大錢。
按怎跋
村民會佇廟宇人員的見證之下，用「跋桮 pua̍h-pue」的方式來乞龜粿，比啥人較濟桮，就代表是神明允的、這隻龜想欲綴你轉去，保庇厝裡平安。若是拄著有兩个人平濟桮，欲按怎？這時陣著愛「並桮 phīng-pue」！
跋著了後...
若是跋著大龜，就會共彼隻請轉去厝裡，不過，大龜通常攏是幾百斤，所以需要倩「ti-ko-ki」（譯：堆高機）來鬥相共，若是閣較大隻的，可能著愛貨車，甚至是拖車矣！隨炮聲共大龜請轉去了後，通常會囥佇大廳、店亭仔 (亭仔跤)，頭向厝內，面前排案桌，桌頂擺果子、花，早暗清香、清茶共拜。過幾工，會去廟裡請示神明何日何時通共大龜「放生」（著！就是愛用這个動詞）。時辰一到，就會拜拜、放炮，了後，厝邊頭尾就會做伙來共內底的食品，鬥拆拆咧、分裝。（經驗：通常攏愛一點鐘以上，因為會有足濟黏布僫拆，愛沓沓仔拆，驚共白米、壽麵的包裝拆破去...）紲咧，就會共遮的物件佮厝邊頭尾、親情五十分享，和親情朋友分享福氣！
現代
照例，若跋著大龜，隔轉年，嘛愛做一隻大龜還轉去廟裡（有專門咧做大龜的店家），而且會疊( tha̍h ，添加)重量，抑是疊發財金，來表示誠意，所以過去的大龜攏會一年並一年閣較大隻！近來，廟宇為著減輕主家的經濟負擔，所以會限制重量的斤數，希望會當增加村民來跋大龜的意願。
經驗
我會記得阿東我頭一改去跋大龜，是佇國中三年仔，彼陣戇戇就予序大鼓舞落去跋，彼改跋著一隻「塗豆龜」（規隻是用塗豆糖做的）。後來，逐年攏會去廟裡看人跋、家己嘛會閣lueh跋，會記得敢若連紲三、四年攏有跋著第二大隻的大龜，厝邊頭尾攏會滾耍笑講攏是仝一隻欲綴我，不過嘛是代表和太子爺公有緣！
逐年入秋，天氣開始變涼冷的時，就會智覺著差不多廟裡欲跋大龜矣，因為「中壇元帥」的聖誕就佇舊曆九月初九，氣溫明顯變化，是愛疊薄的外套的時節，這是一種身軀的感受和生活文化記持的連結。 暗暝，厝邊隔壁攏會相招去廟裡看人乞龜粿，看今年是啥人跋著，抑是家己跪落去跋看覓，向望太子爺公會使賜福。涼涼的暗暝，有歌仔戲布袋戲的聲音，廟裡的燈光是光焱焱，廟前的布蓬是鬧熱滾滾，五花十色代表福氣的大龜恬恬佇遐。這是一个傳統廟會的活動，嘛是神佮人的連結，更加是一个桶箍，共村民的緣分箍做伙。
