紅魔鬼賽後評 足總盃 諾定咸森林 0-1 曼聯 (28-2-2024)
紅魔鬼賽後評
足總盃 諾定咸森林 0-1 曼聯 (28-2-2024)
1. 星期三晚食完飯有咩做？最好就梗係同小朋友坐定定一齊睇波喇。將小朋友培養為紅魔鬼，由細要做起吖嘛。
2. 嗱，我就最鍾意戴頭盔既，呢篇文係個鳩佬響度吹水自high，勿認真，我冇識波牌架。
3. 開波之前，首先傳黎惡耗，就係今季卸下咗隊長一職之後表現出色既中堅麥佳亞唔知受咗啲乜嘢傷，總之就出唔到，而隊長般奴同埋華拉尼都上陣成疑，就咁睇呢啲消息真係以為曼聯今場又要讓半隊波出去。
4. 好彩，坦克可能係鳩UP、可能係心理戰，又可能係真係趕得切復出，總之般奴同華拉尼都出現響正選陣容上面，加埋上場疑似拉傷既連迪路夫同埋比人爆頭既卡斯米路都冇問題可以出場，個陣睇出黎都叫冇咁嚇人…
5. 講返場波，曼聯今場好快就入局，短短十五分鐘之內創造咗三次既黃金機會，先係角球開長，安東尼接禁區邊入少少起腳中楣；再黎就係麥湯文尼接應達洛治美妙傳中空晒頂得有力度冇角度；仲有唔少得既華舒福十二碼點附近起腳射飛。呢三個波入面，最有機會既真係麥湯文尼近門無人看管下頂太正既果球。
6. 森林企穩陣腳之後雙方就成咗拉鋸戰，有段時間森林既射門或者進攻似乎多啲，睇落好似好危險，但實際上又係隔靴搔癢居多，論威脅度反而冇曼聯咁好，Awoniyi把握左閘替工安拉拔傳個醫院波射得比奧拿拿救到係佢哋半場最有機會既果球。倒戈既艾蘭加有唔少機會殺入禁區，本身都諗住可以製造到威脅，但質素所限，最後比波、拎波都係爭啲。
7. 反而曼聯既麥湯文尼接應達洛治既傳中近門一頂，森林門將Turner反應極快救出底線呢下就真係算神救。
8. 結果曼聯都以上半季好「曼聯」既方式結束上半場，就係創造咗唔少黃金機會，但唔係自己把握唔到，半場零比零返完更衣室。
9. 下場一出黎，到曼聯未企穩陣腳，比森林急攻一輪，但真係處理得唔好，啲攻門係比自己糟蹋晒，又係果啲睇落好似有啲危，但最後射出黎、傳出黎唔係果回事既感覺。加多句喇，對森林比對手有呢啲空間都算(其實都好易死)，星期日對曼城果陣咁樣既話人哋應該唔會客氣。
10. 話時話，坦克都係決定擺華舒福響正中鋒，我聽個旁述話，去到六十幾分鐘既時候，奧拿拿掂波既次數仲多過佢，而呢場波，曼聯形勢上面雖然唔係特別佔優，但都叫有唔少攻勢，佢咁既數據即係話佢主動現身幫波似乎太少。再係咁表現落去，賀龍因傷缺陣既影響應該會更加顯露出黎。
11. 另外，做替工踢左閘既防中安拉拔，雖然響比賽初段唔係好入局，有幾次失誤，但入局之後既表現算唔錯，尤其是佢進攻既時候做法幾特別，可能知道自己overlap唔到，又或者係做唔到達洛治果種傳中，佢會縮入中間幫手組織攻勢，而事實佢又冇乜點傳失，比啲波都啱啱好，唔係横傳後傳果隻，加埋後面防守都冇乜失誤，咁既表現算係有啲意外驚喜。
12. 仲要讚下安東尼，佢算係擺脫咗最近既頹勢，助攻助守表現唔錯，尤其是當戴亞路入替咗佢之後，兩個人既表現真係好大對比，而Amad今次加埋補時都大概有半個鐘去表現自己，但除咗一次門前彈射撻大Q、後場扭失波(但好彩自己追得返)之外，感覺上佢唔係好入到局。而家曼聯正值傷潮用人之際，希望呢位上季新特蘭既最佳球員可以盡快pick up到個狀態喇。
13. 到後尾既時候，曼聯開始叫做控制到個局勢，但係反而比之前創得唔算太多有效攻勢。實際上比起上半場果四次黃金機會，下半場曼聯啲攻門其實唔算特別有威脅。
14. 我以為都要去到加時，點知世事往往就係咁奇妙，倒戈既艾蘭加一次犯規，般奴開出自由球，伏兵近柱既卡斯米路一頂入網。有人話華拉尼越位，但其實佢冇影響到呢個進攻，甚至個波只係去到近柱就已經比卡斯米路頂入，華拉尼又冇阻到一個有機會防守到卡斯米路既防守球員，所以我會覺得VAR既決定係正確。
15. 完場前有段小插曲，就係般奴開角球時比Felipe叉頸，VAR覆檢完之後連電視都唔駛睇…我又諗起上季卡斯米路果個冇咁明顯既動作都有紅牌…不過算，英超球證，慣架喇。
16. 幾驚我第二次寫post match review都要寫曼聯輸波，不過綜觀全場，雖然曼聯唔算完全控制戰局，但佢哋既表現都算唔錯，贏波合理。不過睇住左右既攻勢流暢度對比，就會發覺欠缺一隻正宗左閘既曼聯，響左面既攻勢係幾咁受到限制。全場最黃金果兩次機會，都係右閘達洛治後上傳中，而左路冇咗隻左閘幫手既加拿祖，只能夠成日單打獨鬥，甚至一打二，唔係話冇威脅，但對比起有Shaw既時候，左面既攻勢真係幾唔立體下。另外賀龍出唔到場，係咪繼續用福仔打正前呢？又或者有咩方法可以令佢有改善呢？真係要教練團幫手諗諗。
17. 黎緊星期日作客對曼城，根據坦克記者會上表示，唔會有傷兵可以復出，只可以用尋晚既兵源出戰。即係今季表現良好既麥佳亞、近期腳風大順又勤力肯跑既賀龍都唔會出得到，更加唔好提梳爾、馬天尼斯呢兩個後場build up戰術既核心。
18. 雖然唔想咁講，但星期日真係輸少當贏…
#不專業足球筆記 #足球專欄 #專欄 #我愛紅魔鬼 #英超 #足總盃
#紅魔鬼賽後評 #MUNFUL #曼聯 #諾定咸森林 #足球 #賽後評
#英超賽後評
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
